Read Zeme Naga LUKA 11 Bible Online

LUKA 11 - Zeme Naga bible

LUKA 11

¹Zai Isua bâm kat ge kellum bam de lei, zai pa kellum sau gai dege, pe gu kenieme ruage hangkat ne pechu, “Heguang gau, Johanbe ne pe gu kenieme je geteilia gum ze anui je du kellum ra geteilia lau,” kacheu de lei.

²Dadege pa ne penui je, “Ningnui kellum dezai, acheu sa lau: “Anui Peu, ning ji peize ’nchi lau. Ning gu heguangram peize wangkeu lau.

³Nai’nsangne ge anui gu nai’nsangne gu hetak pei bam lau;

⁴zai anui je anui gu hemui ramme lun gai lau, anui gu hepâupungme leine je anui lun daseu; zai anui je keduaibe ge ngua gai se lau,” ze acheu zeu.

⁵Dadege pa ne penui je, “Ningnui ruage mige pe kangpeu bam ze muisum hî ge pe dage tat lu pechu, ‘A kangpeu gau, achu tingkukuak kechum peilêu lau;

⁶a kangpeu tebeîtewbe gene wang gai ze, mâ de pe hangge pei gai ra a dage ga daseu,’ acheu bei ze;

⁷kilûng ’mbene pa ne kak ze, ‘Achu tewkeleu se lau; chuna â ’ngkam kainam ’nde lei, zai a name du a taige jei lamui lei; I chu lu ningchu mâ de peichi lak ti de lei,’ ze chauge ne acheu ra lau?

⁸I ningnui je rang lei, pa ze pe kangpeu changbeibe ziegene mâge â pechu pei ra pa ne zuachu mak leusedu, pa ne sau mak ze kiebambeibe ziegene pa ne zuachu lu pa ka’nnang-nangbe ramme pa pei gu lei.

⁹Zai ningnui je I rang lei, kie bam lau, ningnui je pei bu lei; zai peu bam lau, ningnui ngau gu lei; zai gekeu bam lau, ningnui je lat kai bu lei.

¹⁰Gekie-kieme â ngau-ngau lei; zai gepeube kau â, dau-dau lei; zai kagekeube kau je â lat kai bu lei.

¹¹Ningnui ruage châu peu-ge ne pe na ne hekâ kie bei ze hekâ kelei ge pechu henêu pei ra lau;

¹²nune pa ne ’nruibûm kie bei ze, pechu heruîmegapui pei ra lau?

¹³Chidaze ningnui kesiame ne ningnui name hang kelayibe pei ra chî zai â, ningnui peu tinggîm ge kebampeu ne pe dage gekieme je Herui Ka’nchibe ’ndaizeu pei be ra lau?” kacheu de lei.

¹⁴Chunage pa ne samsapatlakbe herui kat je kelitua lei; herasiabe pat ti dege, samsapatlakpeu ze sa di de lei, dadege baudime ’nningdaulaklu-lu bam lei.

¹⁵Kane penui ruage hanggesame ne “Herasiabe wangpeu Be-elzebul ji gene herasiabe ramme je pa kelitua lei,” ze kacheu de lei;

¹⁶hanggesame ne pechu kedak ra hang tinggîm ’mbene dak kie ze bambe luage zeu.

¹⁷Kane penui ka’nningbe pa ne chî lu ze, penui je salia ze, “Heguangram leine ne pe runne pechu kuipâng dizai â, kâu di tai lei, zai kilûng-kelak du chigum dizai â, timra kam di tai lei.

¹⁸Zai Satan du pe runne pechu tewtimra dizai â, ’ndaigum ze pe gu heguangram sapchi ra lau? Be-elzebul ji gene herasiabe ramme je I kelitua lei ze achu ningnui kacheu daseu.

¹⁹Zai I ne Be-elzebul ji gene herasiabe ramme je kelitua dizai â ningnui name ze châu ji gene penui je kelitua ra lau? Chidaze penui ne ningnui gu samramme chang gu lei.

²⁰Kane I ne Hera ba kang gene herasiabe ramme je kelitua lei dizai â Hera gu heguangram ze ningnui dage wangchang di de lei.

²¹Peranchipeu hereipuâ tei’nsang lu pe ki heguangki reîbambe luage â, pe gu merua ramme yi ze bam lei;

²²kane pa sua peranchipeu ne wang ze pechu duî lu dege â pa ne pe gu hereipuâ chi pa ’nnumka’mmibe zat ramme teitat lu ze chi pe gu hereichâ ze ka’nzi de lei.

²³A dage bammakbe kau â, achu ka’nggi lei; zai achu gekumgaihâmakbe kau â, tewkatimra lei.

²⁴“Herui kahebâbe ze hangkat dagene hela pat lu dadege, katemibe peurua ze, gechangbe bâm ramme ge tatrua bam lei; zai katemibe ngau mak dege pa ne sa ze, ‘I zuapatbe bâm a ki lam’mbe I helatwang dai gu de lei,’ ze kacheu de lei.

²⁵Zai pa wang dege, heki biak lu, mâ-reheî’ntiaria gai laleube pa ngau de lei.

²⁶Chidadege â pa tat ze pa sua kesiabe herasiabe kêdabe hangsena je ngua lu wang ze chige penui bam lei; chi ziemmena kebambe tak ze keraîbe lua suadu nâlangbe ge â sia’nteu di de lei,” kacheu de lei.

²⁷Zai chipau sam pa sa lage, baudime ruage ’mpuimi hangkat ne ’nrung ze pechu acheu sa ze, “Ningchu lungkeube henarak ze pe paurega lei, zai hetung nang tungbe ze pe paurega lei!” kacheu de lei.

²⁸Kane pa ne, “Chi suane â Hera gu sam seu lu chize teime ze penui paurega lei,” acheu bei de lei.

²⁹Zai baudime pe dage wang’ngkiebi-bi gai dege, pa ne penui je acheu ze sachu di de lei, “Aipau rehei â kesiabe rehei lei; chize ne mâ-ka’nchetbe peu lei, kane Jonabe gu mâ-ka’nchetbe runne zangno mâ-ka’nchetbe penui je pei be ra mak lei.

³⁰Ninebi ge bamme hangge Jonabe ne mâ-ka’nchetbe chang gum ze ziemmena Na du aipau rehei hangge ka’nchetbe chang gu lei.

³¹Samrambe ge tingpîme wangpui ne aipau reheime dage nguazuachu ze penui je tew’ngkui gai gu lei; pa â kedeimik deulang ’mbene Solomonbe gu kaningchingbe rasam seu ra wang daseu, zai pie le lau, Solomonbe suadu kedibe aige la lei.

³²Samrambe mai ge Ninebi ge bamme ne aipau reheime dage nguazuachu ze aipau reheime je tew’ngkui gai gu lei; Jonabe sampaube gene penui â penui lung heli di daseu, zai pie le lau, Jonabe suadu kedibe aige la lei.

³³“Mi-mige de hemibung ’ntau lu ze mâ-chit ge mei nune ’ntui kangge mei kai mak lei, kane kegutme leine kebabe ngau ra hangge pebâm ge kai lei.

³⁴Ning mik ze ning pum gu hemibung de lei; ning mik ’nchi dege â ning pum pelane reba bam lei; kane ning mik yi mak dege â ning pum muî kam di de lei.

³⁵Chidaze ’ntîng le lau, ning dage kebabe bambe ze kemuîbe chang me ra hangge zeu.

³⁶Chidaze ning pum pelane reba bambe ge kemuîbe mâ de ga ze bam dizai â, pelane ba’nchichiak tu lei, hemibung ’mbi sireba bambe zene kebabe ningchu pei gum zeu,” ze acheu zeu.

³⁷Pa mâ-sa lage Pharisai’mpeu pechu mâ-nguateu ra kû de lei; dadege pa gut lu mâ-teu ra ’ntaukeu gai de lei.

³⁸Zai pa mâ-teu ra hangge pe ba ’ntikmakbe Pharisai’mpeu ngau lu dege, ningdaulak ti de lei.

³⁹Heguangpeu ne pechu, “Chunage ningnui Pharisaime â hepiak benai hekuak ramme hela hui lei, kane helung ge â sutteube benai helungriaksiabe ne pui lei.

⁴⁰Ningnui kemieme ramme de lei! Hela tewpeu ne helung du tew mak mei?

⁴¹Kane chi helung ’mbe kebambe ramme ka’nggiabe kela hangge pei lau; chidezai pie le lau, ningnui hangge mâgetaleine ’nchi gu lei.

⁴²“Kane Pharisaime gau, ningnui duângga gu lei! zai ningnui ne namplane, ’ngngane, zai hegineu leine kereu ge kat kai lu ze peling benai Hera kehungbe ge â ningnui ’nningkakelam lei; mâkedabe ramme du sâu gai mak ze airamme ningnui tew sing ra yi lei.

⁴³Pharisaime gau, ningnui duângga gu lei! Ka’nduibeki ramme ge bâm yilangbe ze ningnui ’nchâ zai hechaiki ramme ge hebakellum peibe ramme ningnui ka’nchâbe ziegeneu.

⁴⁴Ningnui duângga gu lei! ningnui â ’nchetkaimakbe heraw ramme gum lei, zai ziemmena ne chî mak ze chiramme peireige tatrua lei,” ze kacheu de lei.

⁴⁵Hingde geteiliame ruagene hangkat ne pechu kedak ze, “Geteiliapeu gau, aipau sam sabe zene nang â anui je du katelia de zeî lau,” ze kacheu de lei.

⁴⁶Dadege pa ne, “Ningnui hingde geteiliame nung gau, ningnui du ningnui duângga gu lei! ziemmename je kahereube put ramme pung ra ningnui ne tua gai ze, ningnui â ningnui bakêrang kat te chi heput ramme ge deîgaihâ mak tâzeu.

⁴⁷Ningnui duângga gu lei! ningnui peume ne kemeume je tewchatkaibeibe ze ningnui ne penui raw ramme hangge teleuka’nsui daseu.

⁴⁸Chigum ze ningnui peume tâtewbe ramme ningnui ne sakkitew ze, ningnui suî hezuâ gai ka’nsui lei; penui ne penui je tewchat bei ze ningnui ne penui raw hang teleu ka’nsui daseu.

⁴⁹Chipauziegene Hera gu kaningchingbe ne du sa ze, ‘Kemeume benai apostolme je I ne lang gai gu lei, penui hanggesame je penui ne tewchat ze tewsâ gu lei,’ ze kacheu de lei,

⁵⁰chidezai kedeirei ’ndamchube gene kemeume leine jai tewpatkai’ndibe ze aipau reheime ne peiruî ra hangge zeu,

⁵¹chi Abelbe jai gene chu ze herâtewbe-kaira benai kakellumbe bâm kakgene tew’nggagai’ndipeu Zekariabe jai riâ changbe zeu. Eu lei, I ningnui je rang lei, aipau pâu ze aipau reheime ne peiruî gu lei.

⁵²Ningnui hingde geteiliame nung gau, ningnui duângga gu lei! ningnui ne mâ-gechîbe gu chabi teitattibe ziegeneu; ningnui ze du gut mak, zai gutrame je du ningnui ne nam nan zeu,” ze kacheu de lei.

⁵³Chigene pa pat ti dege leisirawme benai Pharisaime pechu peize misongga ze sam sa gai ra pechu tewkeleu-desang bam lei,

⁵⁴pe mui gene samsapatbe gene penui pechu nîm le ra lîmkua zeu.