Read Zeme Naga LUKA 14 Bible Online

LUKA 14 - Zeme Naga bible

LUKA 14

¹Mai kat ’ntakbambe mai ge Pharisaime ruage pemuitewpeu ki ge mâ-teu ra pa gut dege, penui pechu ’nchetchi (rikchi) bam lei.

²Zai pie le lau, pe suage mige pumberâ ’nnâkkaibepeu bam lei.

³Dadege Isua ne hingdechime benai Pharisaime je ’mpau ze, “’Ntakbambe mai ge tewka’mmibe besie mei, besie mak lau?” kacheu de lei.

⁴Kane penui kuâneu mak rim bam lei. Dadege pa ne pechu tei lu, tew’mmi gai lu, tat ra lang gai bei de lei.

⁵Zai penui je pa ne, “Ningnui ruage mige pe gu hekunmerângne mei nune getumsei mei bam ze mâ-kuiki lungge kêugut kai di ze ’ntakbambe mai ge kelua ze lupat kai mak ta ra mei?” kacheu de lei.

⁶Zai aipau sam penui ne kakchi lak tai lei.

⁷Chunage ’nnâgaibeime ne wang ze penui bâm yilangbe ramme kakelângbe pa ngau lu dege, penui je aipau sam’nda pa salia de lei,

⁸“Kahegiabe gu luube-bâm ge mige ne ningchu kû gai dezai betâu dilangbe bâm ge nang ’ntau gai se lau, nang suadu kedipeu je pa ne kû gai gu lei;

⁹zai ningchu kûgaipeu benai penai hangna ne wang ze ningchu, ‘Aipaupeu hang bâm ’mbia lau,’ ze acheu gu lei, chidezai â, nang pebâm nalangbe ge ’ntau ra ’ngngamchu gu de lei.

¹⁰Kane ningchu ’nnâ gai dezai tat ze pebâm nalangbe ge ’ntau lau, chidezai ningchu kûgaipeu wang dezai pa ne ningchu, ‘A za gau, hubi ’mbe hang du lau,’ ze acheu gai ra hangge zeu; chidezai ningchu mâ-nguateume bambe gene ningchu ning ngeutew’ndi gai bu de lei.

¹¹Mi-mige de pe runne pechu ’nningka’ndibe kau je â tewhelêu gai bu lei, zai mi-mige de pe runne pechu kecheiluîtewkeu kau je â suang gai bu lei,” ze acheu zeu.

¹²Pa ne pechu ’nnâgaipeu dage de salia ze, “Nang ne hegî teseu hang mei nune luube gu teseu hang mei ze teleu dezai, ning kangme mei, nune ning sikiname mei, nune ning kiduîme mei, nune ning ramname keheume mei je ’nnâ gai se lau, makchai â, penui ne ningchu kûruî dai gu lei, zai ningchu peiruî dai bei ta du lei.

¹³Kane nang luube-bâm teleu dezai kelaksiame, chuakannime, zai pîsiame, mikchitme je kû lau,

¹⁴dezai ning hang yi gu lei, penui â ningchu peiruî dai lak daseu. Lungsangtewme ringchukadaibe ge ningchu peiruî gu lei,” ze kacheu de lei.

¹⁵Pechu mâ-nguateume ruage hangkat ne aipau sam seu lu dege pechu, “Hera gu heguangram ge luube takkuak puateurabe kau ze yi de lei!” ze kacheu de lei.

¹⁶Dadege pa ne pechu, “Mige luube-bâm kedibe teleu gai ze, misonggame je kû gai de lei;

¹⁷zai teurabe hî dege, pa kûgaime je, ‘Wang zu lau; chuna â kedâ kam lu de lei,’ ze rang gai ra hang pe gu pe guâ ka’ngguapeu je lang gai de lei.

¹⁸Zai penui ’nteumena ne ’mbia ra penui samzeu hang peuchu di de lei. Railangpeu ne pechu, ‘Helu I ne lui gai lu chize I pie ra tat sing ra ’nnang gu lei; ka’nggia ze achu lun gai lau,’ ze kacheu de lei.

¹⁹Zai kêdapeu ne, ‘Getumsei pechin mengeu I lui gai lu chiramme, yibe siabe pie gai ra I tat lei, ka’nggia ze achu lun gai lau,’ kacheu de lei.

²⁰Zai kêdapeu ne, ‘I â a nâu kû gai lu ze I wangchi lak lei,’ kacheu de lei.

²¹Chidadege chi tâka’ngguapeu ne pe wangpeu dage wang lu ze aize pauliâ bei de lei. Chidadege â heki ’mpaupeu pe râta ze pe gu tâka’ngguapeu je, ‘Namdi gu puidi ramme ge benai heki kak ramme ge pat kelua lu ze kelaksiame, chuakanime, mikchitme, zai pîsiame je nguagut chu lau,’ kacheu de lei.

²²Dadege chi tâka’ngguapeu ne, ‘A pau gau, nang diegaibe tâ ze â tew gai ’nde lei, zai hekisiâm ze â larei lei,’ ze acheu bei de lei.

²³Dadege heguang ne chi tâka’ngguapeu je, ‘’Mpuîhimdi ramme ge benai ’mpuîrikki ramme ge pat chu lau, zai ziemmena ramme je ’nchi-chine nguagut kai zu lau, a ki tewpui gai ra hangge zeu.

²⁴Ningnui je I rang lei, I kûgaibeime ruage mî de a gu luube-teseu ’ndâutau ra mak lei,’ ze kacheu de lei,” ze acheu zeu.

²⁵Chunage baudime pechu nguatat ti de lei; zai pa ’nreiwang lu penui je,

²⁶“Mi-mige a dage wangbe kau ze, pe peu benai pe pui zai pe nâu zai pe name zai pe sikiname ’mpeumi benai ’mpuimi je zai pa keringbe je ’nsangdu ngaugailakbe kau chang makchai â, eu lei, pa â a kenie chang lak lei.

²⁷Mi-mige de pe gu heling pua mak ze a chai suibe kau â, a kenie chang lak lei.

²⁸Ningnui ruage heki kehube tewchu nei ze, chize tew kam ra hang pe dage rangkâng ’nsang le duî mei be ’ntaukeu gai raî lu riamgaimakrabe kau châu la lau?

²⁹Makchai â hekipung pa ne dîmchu gai lu ze tewtui lak tizai, chize kengaume leine ne pechu teihenuitewchu gu de zeî lau,

³⁰acheu ze sa ze, ‘Aipaupeu ze heki tewchu gai lu tewtui lak lei,’ ze acheu zeu.

³¹Nune heguang kat ne heguang kêdapeu je herei ra hang tatbe ge, raîlangbe ge, pa ’ntaukeu gai raî lu chang-’ngkaime pechu ’nggi ra wangme je ziemmena chang kereu ne tingkang dui mei be châu hekîgaimakbe kau la lau?

³²Zai mak zai â, heguang kêdapeu kedeu ’mbe bambe luagene desieyibe tew ra hang hegutpeu je lang gai ze desieyi ra kiam lei.

³³Chigum ze ningnui ruage, mi-mige de pe dage kebambe leine sâu kam le makchai â, pa a gu kenie’mpeu chang lak lei.

³⁴“’Nchaî â yi lei, kane ’nchaî ne tâm dizai â, ’ndaigum ze tew’ngkum dai ra lau?

³⁵Chize â kedei hang de yi mak zai keradei hang de yi me lei; ziemmename ne chize tuâ nan tai lei, seu ra pe kun bamme peize seu le lau,” ze kacheu de lei.