Read Zeme Naga LUKA 15 Bible Online

LUKA 15 - Zeme Naga bible

LUKA 15

¹Chunage ’mpuâhame benai hemuime leine pe sam ’ngking ra pe tailam zuawanghechut kai de lei.

²Zai Pharisaime benai leisirawme katelum de lei, acheu sa ze, “Aipaupeu ze hemuipungme je ’nchâ, zai penui je mâ-nguateu zeu,” ze acheu katelum de lei.

³Dadege pa ne penui je aipau sam’nda ne salia de lei:

⁴“Ningnui ruage mige pe gu meli haî kat bam ze chipau ruagene kat ga dizai â, hênamkang ge riaksekui ze sekui je sâu gai nan ze gadibe ze ngau mak tâne châu peu mak kau la lau?

⁵Zai chize pa ne ngau lu dege, chize pe keîtoa ge kai lu pe suî’nta ze bam de lei.

⁶Zai pe ki ge pa wangchang dege, pe kangme benai pe kiningme je kûwang’ndui lu ze penui je, ‘Achu ningnui suiyi’ntagaihâ lau, a gu meli gadibe ze I ne ngau dai lu daseu,’ ze kacheu de lei.

⁷Chigum ze ningnui je I rang lei, tinggîm ge katelingme riaksekui ze sekui keyime helung-heli dai sua ra ’nangtadime je sua â, hemui kau hangkat helung-heliwangpeu pumgîm ge tinggîm ge hesuiyi’nteu ze bam gu lei.

⁸“Zai ’mpuimi hangkat mige pe gu rangkângpum kereu bam ze kat tew’ngga ’ndizai â, hemibung ’ntau lu, heki biak ze chize ngaudau mak tâne châu peu mak ta ra lau?

⁹Zai chize pa ne ngau lu dege â, pe kangme benai pe kiningme je kûwang’ndui lu, ‘Achu ngua ningnui suiyi’ntagaihâ lau, a gu rangkângpum gadibe ze I ne ngaudau lu de lei,’ ze kacheu de lei.

¹⁰Chigum ze ningnui je I rang lei, hemui kau hangkat helung-heliwangbe peireige Hera gu angelme suagene hesuiyi ze bam lei,” ze kacheube sam zeu.

¹¹Zai pa ne sa ze, “Hangkat pe na ’mpeumi hangna bam lei;

¹²zai penai ruage henabipeu ne pe peu je, ‘A peu gau, kilûng-heurâ a dam hang changrabe achu pei zu lau,’ ze kacheu de lei. Dadege pa ne penai hangna hangge pe gu keringbe heurâ ze ’nzi gai bei de lei.

¹³Zai bechâng dege henabipeu â pe gu bambe leine teiwang’ndui kam lu, heram kedeu ’mbe tat ti de lei, zai chige kerubit ze bam ze pe heu ketadau tew’ngga kam gai ’ndi de lei.

¹⁴Zai pe gu kebambe leine tew’ngga kam gai dege, chipau heram ge herakûm kedibe wangchu di de lei, chidadege â pa pe duângga di de lei.

¹⁵Dadege â chipau heram ge hangkat dage pa ’ngkeuwang gai di de lei, pechu pe gu helu ’mbe tat ze pe gu kebak ramme guî ra langgaipeu dage zeu.

¹⁶Zai kebak ramme ne teipi ramme teubeibe pa du teu’nggeugit kai nei dun ze bam de lei; zai pechu mî ne de mâ de pei mak lei.

¹⁷Zai pe runne pechu ’nningchiwang dege pa acheu sa ze, ‘A peu ki ge tâtewme teu-ze-sak kam lak bam ze kane I â aige ’njei ze ga gai gu de lei!

¹⁸I chu lu a peu tailam tat ku de lei, zai pechu, “A peu, Tinggîmme benai ning mikngau ge I hemui gai ’ndi de lei;

¹⁹ning na hang achu kû ra bui ta de lei; ning gu tâtewme ruage hangkat hang gum ze achu chak kai lau,” ze I acheu ra de lei,’ ze kacheu de lei.

²⁰Dadege pa zuachu lu pe peu tailam wang di de lei. Kane pa kedeu ’mbe tatbambe luagene du pe peu ne pechu ngau lu ’nggia-desang di ze pakpat lu pechu pam ze kakeput te lei.

²¹Zai pa ne pe peu je, ‘A peu, tinggîmme benai ning mikngau ge I hemui gai ’ndi de lei; ning na hang achu kû ra bui ta de lei,’ kacheu de lei.

²²Kane pe peu ne pe gua ka’ngguame je, ‘Kelua ze paî yilangbe teipat ze pechu bâ gai zu lau; zai pe ba ge baroine kap kai zu lau, zai pe pî ge pîchûp kai gai zu lau;

²³zai getumpoine guîka’mmibe teiwang lu ze tewchat le lau, mi suiyi’nta ze nguateu zu kei lei;

²⁴ai a na chai di ringchu kadai de lei; zai ’ngga di ngaudau kadai de lei,’ ze kacheu de lei. Chidadege â penui suiyibe tâ tewchu di de lei.

²⁵“Chunage pe na chîngbipeu ze â helu ge bam di lei; zai pa pe ki lam’mbe wanghechut dege, heleutewbe heleu’mmung kuâ ramme benai kelimbe ’ncheu pa seu de lei.

²⁶Dadege pa ne tâka’ngguame ruage hangkat je kû lu chize ’ndaikau tewbe kau mei ze ka’nneu de lei.

²⁷Dadege pa ne pechu, ‘Ning kinapeu wang bei ze ning peu ne pechu yi ze hedaulube ziegene guî’mmilube getumpoine pa ne tewchat kai bei lei,’ acheu bei de lei.

²⁸Kane pa â pe râta di ze, kilûng ’mbe gutmeu di lei. Pe peu ne pat ze pechu kiam de lei.

²⁹Kane pa ne pe peu je, ‘Ni, patingkum aitiege ningchu I ’nggua ze bam lei, zai ning gu samde mâdau de I pheumakbe ga lei; chi acheusede nang â a kangme je ngua a suiyi’nta gai ra hang melipoine katte mâdau de achu pei mak lei.

³⁰Kane ai ning name ruage hangkat ne ning gu keringbe heurâ ramme hepumzuateume dagene nguateu’ngga kam lu wang bei ze nang ne pe hangge guî’mmilube getumpoine tewchat kai bei zeu!’ ze kacheu de lei.

³¹Dadege pa ne pechu salia de lei, ‘A na gau, nang â a dage pehî’nsangne bam la dezeî lau, a gu leine ze ning gu kam de lei.

³²Chidaze mi suiyi’nta ze mi suiyi ze bam ra betâu sing lei; ai ning kina chaidibe ze ring dai di de lei; zai pa ’nggadibe ze pechu ngaudau lu de lei,’ ze acheu zeu,” kacheu de lei.