Read Zeme Naga LUKA 17 Bible Online

LUKA 17 - Zeme Naga bible

LUKA 17

¹Zai Isua ne pe gu kenieme je, “Tewkaugairabe hangge keduaibe ramme ze â wang sing gu de lei; kane chi keduaibe ramme châu dagene pat ra mei, chipaupeu ze â pe duângga gu lei!

²Ai kecheime ramme ruage hangkat je pa ne tewkau gai ra sua â, pe guang ge mâ-niakbe chukâng reu gai lu ze sungkling ge pechu â tuâgai’ndibe ze pe hang yi’nteu gu lei.

³Ning sikina ne hemui tâ tew dizai â, pechu ’ngngiam lau, zai pa ne heli dizai â, pechu lun be lau;

⁴mai kat ge lua sena ning peireige tâsiabe tew gai lu lua sena ’nreiwang ze, ‘I kaheli de lei,’ acheu dizai â, nang pechu lun sing ra lei,” ze kacheu de lei.

⁵Chi apostolme ne Heguangpeu je, “Anui keneibe tewpung gai lau!” kacheu de lei.

⁶Dadege Heguangpeu ne, “’Nzeyichêupum kat gum ze ningnui keneibe bam dizai â, ai meitikchibang je, ‘Ning runne ning ma li lu ze sungkling ge tau gai le lau,’ ze ningnui acheuchi duî lei, zai chize ningnui kuâpheu gu lei.

⁷“Ningnui ruage mige pe gu tâtewpeu hening pu mei nune meli reî mei ze bam ze, helu ’mbene pa wang dai dezai, ‘Mâ-teu ra wangkelua ze ’ntau gai zu lau,’ ze pa ne acheu gu mei?

⁸Kane, ‘A hang hegî teseu hang teleu du lau, zai ning kia ’ngkang gai lu I teu sak kam mak tâne achu ’nggua lau; zai na dezai nang â teu ze sak lau,’ ze acheu mak ra mei?

⁹Pa diegaibe tewbeibe ziegene pe gu tâtewpeu je pa ne toa semei?

¹⁰Zai ningnui du chigum ze ningnui je tâtew ra diegaibe tew kam lu dezai, ‘Anui â tâtewme ’nta kau ramme lei; anui tewrabe tâ runne anui â tew lei,’ ze acheu lau,” ze kacheu de lei.

¹¹Jerusalem ’mbe tatbe ge, Samaria benai Galili pa tatpela ze tat ti de lei.

¹²Zai keloa kat ge pa gut kai dege, ka’mpame hangkereume pechu kahedau de lei, chime ze kedeu ’mbene sap lu ze,

¹³penui rankai ’nrung ze, “Isua, Geteiliapeu, anui je ngau’nggia gai lau,” ze kacheu de lei.

¹⁴Pa ne penui je ngau lu dege penui je, “Tat ze tingkume dage ningnui runne ningnui pum sing ne liâ be lau,” acheu bei de lei. Zai acheu ze penui tatbe luage penui ’nchi kam di de lei.

¹⁵Zai penui ruage hangkat ne pa yi di de lei be chî lu dege, wang dai lu pe rankai ’nrung ze Hera je toa de lei;

¹⁶zai Isua pî kangge ’ngkumkeu lu, pe suiyibe sam salia de lei. Chunage pa ze Samaria’mpeu lei.

¹⁷Dadege Isua ne, “Hangkereume je tew’nchi gai mak mei? Hangsekuime ze ’ndai’ngge la lau?

¹⁸Ai hesangkedeu’mpeu runne zangno mî de wang dai ze Hera je toabe ngau mak mei?” ze kacheu de lei.

¹⁹Dadege pa ne pechu, “Zuachu lu tatchu lau; nang keneibe ne ningchu tew’mmi bei de lei,” acheu bei de lei.

²⁰Zai Pharisaime ne pechu, Hera heguangram wangkeurabe hî ’nneu bei dege, pa ne penui je kak ze, “Hera gu heguangram â hela ge ’nchetkaibe piekuabe gene wangkeu ra mak lei;

²¹‘Pie le lau, aige ni!’ ze mei nune ‘Wîge ni!’ ze mei du penui ne rang ra mak lei; pie le lau, Hera gu heguangram â ningnui ruage la daseu,” ze kacheu de lei.

²²Zai pa ne kenieme je, “Ziemmena Na gu naimikpui ramme ruage naimikpui kat ningnui ne ngauneirabe ting ze wangchang de lei, zai chize ningnui ngau ra mak lei.

²³Zai ningnui je, ‘Chige ni!’ ze mei nune ‘Aige ni!’ ze mei du penui acheu gu lei. Tat se lau, penui chai sui se lau.

²⁴Tingkepitplikkaibe luage tingmik katlam gene kêdabe mik katlam bachang gum ze ziemmena Na du pe gu tingnaimikpui ge chigum gu daseu.

²⁵Kane pa mâ-pelane misongga hereulie-raî gu, zai henai reheime ne pechu tuâpat kai gu lei.

²⁶Noabe ting ge gum ze, ziemmena Na ting ge du chigum gu lei.

²⁷Noabe dui’nnei ge gut ti ze hedui naîwang ze penui je tew’nggakamrabe riâ chang mak tâne teu sak ze, meneu ze, henâu kai ze bam de lei.

²⁸Lotbe ting ge du chigum de lei—penui, teu-sak ze penui lui de lui, zua de zua, zai ling ze penui hekitew ze bam de lei,

²⁹kane Sodom gene Lotbe zuapattibe mai gîmsing ge tinggîm ’mbene hemi benai Salphar ruikeu ze, penui ’nteumena je tewchat kam ’ndi lei—

³⁰chigum ze ziemmena Na ju liâgaibe tingnaimikpui ge du chigum gu lei.

³¹Chipau mai ge â heki’mpûm ge bambepeu pe kilûng ge merua bambe lu ra peize wangkeu se lau; zai helu ge bambepeu je du chigum ze peize wang dai se lau.

³²Lotbe nâu je ’nningtâu bam lau.

³³Mi-mige de pa keringbe tew ’nring ra peube kau â, pa keringbe ’ngga gu lei, kane mi-mige de pa keringbe gagaibe kau â, pa keringbe tew’nring gai gu lei.

³⁴Ningnui je I rang lei, chipau mai tingmuî ge â jeî kat ge ziemmena hangna jei bam gu lei; zai hangkat je â nguatat tu, zai kêdabe hangkat je â sâudiak kai gu lei.

³⁵’Mpuimi hangna chêutâu-herua bam gu lei, zai hangkat je â nguatat tu, zai kêdapui je â sâudiak kai gu lei.”

³⁶“Hangna helu ge bam gu lei; hangkat je â nguatat tu, zai hangkat je â sâudiak kai gu lei,” ze kacheu de lei.

³⁷Dadege penui ne pechu, “Heguang gau, ’ndaige lau?” kacheu de lei. Pa ne penui je, “Herum bambe bâm ge lawai ramme wang’ndui gu lei,” acheu bei de lei.