Read Zeme Naga LUKA 19 Bible Online

LUKA 19 - Zeme Naga bible

LUKA 19

¹Pa Jeriko ge gut kai lu, tatpelatat ti de lei.

²Zai chige hangkat pe ji Zakaibe kacheupeu bam lei; pa â ’mpuâhame ruage pemuiteupeu zai keheupeu lei.

³Zai Isua ze châu mei be pa ngau ra peu lei, kane ziemmena kiedibe ziegene, zai pa â bekauchei dadege ngauhung lei.

⁴Dadege pa pe sua ’mbene pakrum lu, Isua je pie ra hang ’ndutchî bang ge pa keuchu de lei, chipau ’mpuî ge pa pat ku dadegeu.

⁵Zai Isua chipau bâm wangchang dege pa ne ’ngngangpie lu pechu, “Zakaibai, wangkeu kelua lau; nemai ning ki ge I rêu sing gu lei,” kacheu de lei.

⁶Dadege pa wangkeu kelua lu, pe suiyi-desang ze pechu nguarêu gai ra pei de lei.

⁷Zai chize penui ngau lu dege, penui ’nteumena ne, “Hemui kau dage rêu ra pa gut te lei,” ze katelum lei.

⁸Zai Zakaibe sap lu, Heguangpeu je, “Pie le lau, Heguang gau, a heu pa’mpi kelaksiame hang I pei gai de lei; zai miramme dagene mâ-mâ choa ze I luteulube la zaidu bak medai I ruî kadai de lei,” kacheu de lei.

⁹Dadege Isua ne pechu, “Nemai aipau ki ge tewka’nringbe wangchang de lei, pa du Abrahambe na dadegeu.

¹⁰’Nggadibe je peu ra, zai tew’nring gai ra hang ziemmena Na â wangkeu daseu,” kacheu de lei.

¹¹Zai airamme penui ’ngking bambe luage, pa sam’nda kat sachu kadai de lei, pa Jerusalem wanghechuttibe ziegene benai penui ne Hera gu heguangram ze liâ gai ra ’nnumgaibeibe ziegeneu.

¹²Chipauziegene pa ne sa je, “Betaudibe ziemmena hangkat ne heguang rezie lu ra hangge heram kedeu ’mbe tat lu wang kadai de lei.

¹³Zai pe gu tâka’ngguame ruagene hangkereume je kû lu, penui je gechâk rangkângpum (mina) kereu pei bei de lei, zai penui je, ‘I wang dai mak tâne aize ne helîhedet-kua lau,’ ze acheu bei de lei.

¹⁴Kane pe ramname ne pechu ngaugailak ze heguttewpeu je lang gai ze, ‘Aipaupeu ne anui peireige heguang chang ze samram ra hang â anui nei me lei,’ ze kacheu de lei.

¹⁵Pa heguang rezie lu lu wang dai dege aime tâka’ngguame pa ne rangkâng peigaime zene helîkahedetbe gene ’ndaikau giepat lu mei be chî ra pe dage penui je ku gai ra samdie gai bei de lei.

¹⁶Railangpeu pe suage wang lu, ‘A pau gau, ning gu rangkâng zene rangkâng kereu tewpatsuâ lu de lei’ kacheu de lei.

¹⁷Dadege pa ne pechu, ‘Ka’ngguapeu keyibe kau, zai lungsangtewbe kau gau, tâtew’mmi-desang de lei! Mâ-kecheîne peireige nang lungsangtew ze bambe ziegene namdi kereu peireige nang ne ning suitew ra de lei,’ acheu bei de lei.

¹⁸Zai pakenapeu ne wang lu, ‘A pau gau, ning gu rangkâng zene rangkâng mengeu tewpat lu de lei,’ kacheu de lei.

¹⁹Dadege pa ne pechu, ‘Zai nang ne namdi mengeu peireige ning suitew ra de lei,’ acheu bei de lei.

²⁰Dadege kêdapeu wang lu, ‘A pau gau, aige ning gu rangkâng ze paî ne dum lu ze I ne ka’ndibe la de lei;

²¹nang â ning laîsiapeu dadege I â ningchu hing lei; nang kaimakbe nang â lu, zai lingmakbe nang â gat daseu,’ kacheu de lei.

²²Pa ne pechu, ‘Nang ka’ngguapeu helungriaksiabe kau! Ning mui ge sam sapatbe zene ningchu I ne tew’ngkui gai gu lei. I ziemmena pelaîsiabe, kaimakbe gene lube nang chî mei? Zai lingmakbe gene gatbe nang chî mei?

²³Acheuzaine ’ndaitew ze a gu rangkâng ze rangkângki ge nang kai mak lau, I wangbe ge peling I lu le ra hangge zeu?’ ze kacheu de lei.

²⁴Dadege pa ne pe taige sapme bau je ‘Pe dagene rangkâng lu lu ze rangkâng kereu bambepeu je pei be lau,’ acheu bei de lei.

²⁵(Dadege penui ne pechu, ‘Heguang gau, pe dage rangkâng kereu la lei!’ kacheu de lei.)

²⁶‘Ningnui je I rang lei, mi-mige de kebambe kau je â pei dai suâ bu lei; kane pe dage kegabe kau je â pe dage kebambe ze du lutat tu lei.

²⁷Kane ai a reime penui peireige I ne heguang ze bam ra lugailakme je aige nguawang lu ze, a suage bichat kai zu lau,’ ze pa kacheu de lei,” ze kacheu de lei.

²⁸Zai aize acheu sa gai lu dege, pa penui sua raî ze Jerusalem ’mbe hang di de lei.

²⁹Bethphage benai Bethani ge pa wangchang tena dege, Olibet kacheube deiloa ge kenieme hangna je pa ne lang gai ze,

³⁰“Ningnai je teidabe keloa ge tat chu lau, chige ningnai gut dezai hekunmerângne keî bambe ningnai ngau gu lei, pe peireige mî de mâdau chuagaimakbe zeu; chize heipat lu, a dage gauwang lau.

³¹Mige ne ningnai je ’nneu ze, ‘’Ndaitew ra chize heipat lau,’ ze acheu lêuzai â ‘Heguang ne aize betâuka’nnang lei,’ ze acheu be lau,” ze acheu bei de lei.

³²Dadege langgaibeime hangna tat ti ze penai je pa ranggaibe luigum ze ngau de lei.

³³Zai hekunmerângne je penai hei lage, pa’mpaume ne penai je, “’Ndaitew ze hekunmerângne je ningnai hei lau?” ze kacheu de lei.

³⁴Dadege penai ne, “Heguang ne aize betâuka’nnang lei,” ze acheu bei de lei.

³⁵Zai Isua tailam chize gauwang de lei, zai hekunmerângne peireige penui paî tap kai lu, bepeirei ge Isua je teichu gai de lei.

³⁶Zai pa acheu chuatatbambe ge ’mpuîki ge penui ne penui paî ramme kâmchiepela ze tat te lei.

³⁷Zai Olib loa zuk ge pa wangchang tena dege, kenieme baudime leine ne pa tâ-kedibe ramme tewbe penui ’nteumena ngau lu penui suiyi’nta ze penui rankai Hera je toa ze,

³⁸“Tingwang ji gene wangbe Heguang je peize yi lau! Tinggîm ge peize yi lau zai hulangbe ge pengêudi lau!” ze kacheu de lei.

³⁹Dadege baudime ruage, Pharisaime hanggesame ne pechu, “Geteiliapeu, ning kenieme je ’ngngiam be lau,” kacheu de lei.

⁴⁰Pa ne kak je, “I ningnui je rang lei, aime ne zîng bam dizai â, chi tingchu ramme ne ’nrungpat ku de lei,” acheu bei de lei.

⁴¹Zai pa wang’nna ze namdi ngau lu dege chipau namdi peireige hap kai di de lei,

⁴²acheu ze sa ze, “Nemai du desieyibe hang tâtewbe nang ne chî lu nung laîzai! Kane chuna â nang ngaurabe gene tei’mbai ’nde lei.

⁴³Ningchu â hekut sunam ze bamguâ ’nde ra, zai pemik ’nsangne ruiguâ’nderabe beting ze ning hangge wang gu de lei,

⁴⁴zai nang benai ning name ning dage bamme je kedei ge tewkau gai gu de lei, zai nang ge penui ne tingchukâng kat kêdabe tingchukâng peireige sâu gai ra mak lei; ning hangge beting wangrabe nang ne chimak-taibe ziegeneu,” ze kacheu de lei.

⁴⁵Dadege kellumki ge pa gut lu ze, chige kezuame je kumpatchu di de lei,

⁴⁶acheu sa ze, “‘A ki â kakellumbeki ze kû gu lei,’ ze acheu ze raw gai lei; kane ningnui ne chize hegasut-teume ki hang tew gai bei de lei,” ze kacheu de lei.

⁴⁷Zai patingnai’nsangne kellumki ge pa mâ-geteilia bam lei. Tingkugechîngme, zai leisirawme, zai baudime ruage besuitewme pechu deî’ngga ra peu di de lei;

⁴⁸kane ziemmena ’nteumena ne pe sam ’ngkingrim bam di dadege penui tewrabe ’mpuî peulak ti de lei.