Read Zeme Naga LUKA 2 Bible Online

LUKA 2 - Zeme Naga bible

LUKA 2

¹Zai chipau ting ge, Kaisar Augastabe ne kedeirei ge bamme leine gu heji raw ra hang âzah pei gai bei de lei.

²Chi heji rawraîlangbe ze Siriaram ge Kureniasbe ne laksaibe changbe ting ge de lei.

³Zai haimena penui heji raw ra hang penui ram ram ’mbe tat kam di de lei.

⁴Zai Josepbe ze pa du Dabidbe kiduî’mpeu, Dabidbe kiria gene patpeu changbe ziegene Galili ge Nazareth namdi gene Judia ge Dabidbe gu namdi Bethlehem, kacheube bâm ’mbe hang di de lei,

⁵pe nâu hang rangchakkai’ndipui Marile ’ngngiêne pungpui je ngua lu heji raw ra hangge zeu.

⁶Zai penai chige bambe ting ge, Marile hena lung ra beting chang di de lei.

⁷Zai pe na meraibe ’mpeumi napoine je lungkeu lu ze pa’nnum ramme ne pechu ’nnum gai de lei, zai hesangki ge penui hang bâm gabe ziegene hekaune-kuak ge pechu ’njei gai de lei.

⁸Zai chipau huâzie ge melireîme, tingmuî ne penui gu melidung ze reî ze ketaîloa ge bam lei.

⁹Zai Tingwang gu angel’mpeu hangkat ne penui je lia de lei, Tingwang ngeudibe ne penui je sireba gai de lei, dadege penui hing-desang di de lei.

¹⁰Zai angel’mpeu ne penui je, “Hing se lau; zai pie le lau, mi suiyi-kadesangbe Sam Karchibe, chi ziemmena ’nteumena dage wangchangrabe ze ningnui dage I pungkeu lei;

¹¹nemai ge ningnui hang Dabidbe gu namdi ge Tewka’nringpeu je lungkeu la de lei, Heguang Krista zeu.

¹²Zai aize ne ningnui hangge ka’nchetbe chang gu lei: pa’nnum ne ’nnum lu, hekaune-kuak ge ’njeigaibe ningnui ngau gu lei,” kacheu de lei.

¹³Zai luakatne angel’mpeu dage tinggîm baudime wangkeu ze, Hera je penui toa ze, acheu sa ze,

¹⁴“Hulangbe ge Hera ngeudi ze bam lau, zai kedeirei ge pa ne pe suiyime ziemmename dage peize desieyibe bam lau!” ze kacheu de lei.

¹⁵Zai angelme penui dagene tinggîm tat ti dege, melireîme penui karai kat-kat dage, “Kei lei anui du Bethlehem ’mbe zuatat ze Tingwang ne anui je chî ra tewgaibe, ai mâ-wangchangbe ze pie gai ni kei lei,” ze kacheu de lei.

¹⁶Dadege penui tatkelua ze tat ti de lei, zai Marile benai Josepbe zai hekaune-kuak ge ’ngngiêne je ’njeigaibambe penui ngau de lei.

¹⁷Zai penui chi ’ngngiêne je ngau lu dege, pe rasam penui dage rangliabeibe sam ze penui ne chîlia kam gai bei de lei;

¹⁸zai chipau rasam keseume leine ne melireîme ne sam saliabe ge ’nningdaulak ti de lei.

¹⁹Kane Marile â airamme pelane pe lung ge ’nning ze bam lei.

²⁰Dadege melireîme â penui je rangliabeibe luigum ze seu lu, zai ngau lu dege, Hera ngeutew ze pechu toa ze wang dai di de lei.

²¹Zai hezie padesatbe riâ chang di ze, pechu rumgeten gai lu dege, henarak ge pechu ’ngkau gai makge angel’mpeu ne peibe heji Isua, acheu ze pe ji ’ntak kai de lei.

²²Zai Mosabe gu hingde luigum ze, tew’nchirabe ting chang dadege, Tingwang dage pechu peipat kai ra hang Jerusalem ’mbe nguahang lei

²³(Tingwang gu hingde ge, “’Mpeumi lungkeuraibe leine â, Tingwang dage ka’nchibe chang gu lei,” ze rawgai’ndibe gum zeu)

²⁴zai Tingwang hingde ge rangbe luigum ze, “Temaune kena mei, nune depeinepoine kena mei” ne herâtew ra hangge zeu.

²⁵Chunage Jerusalem ge hangkat pe ji Simeonbe kacheupeu bam lei, chipaupeu â mâ-pelingtew zai mi râsie ze tei’ntip ze Israel hang lunghegeikatenaibe ngaurabe je kuâ bam lei, zai pe peireige Herui Ka’nchibe bam lei.

²⁶Zai Tingwang gu Krista je pa ngau mak tâne kechaibe pa ngau ra mak lei be Herui Ka’nchibe ne pechu teilia bei lei.

²⁷Dadege Herui ne rang bei ze kellumki lungge pa gut ti de lei; zai ’ngngiêne Isua je pe pui benai pe peu ne besie luigum ze pe peireige tâtew gai ra hangge nguagutbe luage,

²⁸pe ba ne pechu pua lu, Hera ze acheu ze toa ze,

²⁹“Tingwang gau, chunage ning sam luigum ze ning guâ ka’ngguapeu je temichai ze peize rimna de zu lau.

³⁰A mik ne ning gu tewka’nringbe ngau lu de lei,

³¹ziemmena zat leine bambe gene nang ne tewgaibeibe,

³²Jentailme dage teiliarabe hang kebabe, zai ning gume Israelme ngeudibe zeu,” ze kacheu de lei.

³³Zai pe peu benai pe pui ze pe rasam sabe geze ’nninglu-lu bam di de lei;

³⁴zai Simeonbe ne penui ze ’nnam gai ze pe pui Marile je, “Pie le lau, ai napoine je â Israel ge misonggame je tewkaurabe benai tei’nsapchurabe hangge kelâng gai de lei, zai ka’nchetbe chi tu’nruirabe hangge chang ra hangge zeu;

³⁵(Eu lei, ning lung ’nsangdu, hiazutkie ne hia’nzûtpela gu lei) misonggame lung ge ka’nningbe ramme ze teilia’nchiepuang gai ra hangge zeu,” ze kacheu de lei.

³⁶Zai kemeu’mpui hangkat, pe ji Annale, Phanu-elbe na, Asher zat kau bam lei; zai pa ze chîng-kezuzie di de lei, pa meilube chângge pe napeu dage kum sena runne bam gai lei,

³⁷zai kum riakdesat ze medai riâ kemîpui chang ze bam lei. Pa kellumki gene tat mak ze kemuî-keba teseurei ze Hera je kellum ze bam bam lei.

³⁸Zai chipau hî sing ge pa hang ze Hera dage pe suiyibe rasam pau gai de lei, zai Jerusalem je ripatkairabe hangge kaheguîme leine dage ’ngngiêne (Isua) rasam pa ne salia bei de lei.

³⁹Zai Tingwang gu hingde luigum ze, mâ-leine penui tew kam lu dege Galili ’mbe penui kebambe namdi Nazareth ’mbe wang gai dai di de lei.

⁴⁰Zai napoine chîngchu ze pe ranchi di, zai kaningchingbe ne pui ze bam di de lei; zai Hera ka’nggiabe pe peireige bam di de lei.

⁴¹Chunage patingkum ’nsangne Tat’ntuahengi ge pe pui benai pe peu â Jerusalem ’mbe tatkanzie lei.

⁴²Zai pe kum kereu ze kena chang dadege hengî sie tewbe luigum ze, penui Jerusalem ’mbe hang di de lei;

⁴³zai hengî kam lu, penui wang dai dege, napoine Isua â Jerusalem ge bam gai di lei. Zai pe pui benai pe peu â chize chî mak lei,

⁴⁴kane nguatebeîtewme ruage bamdibe hang ’nnum gai ze mai kat tebeî â penui tat ti de lei;

⁴⁵zai pechu penai ngau mak dege, Jerusalem ’mbe pechu peuzutza wang kadai de lei.

⁴⁶Zai hezie kechumne châng dege, kellumki ge geteiliame ruage ’ntau lu ze, penui sam ’ngking ze, penui je sam’nneu ze bambe penai ngau de lei;

⁴⁷zai pe sam seulume leine ne pa mâ-chika’mmibe tak benai pa samkakchibe tak deze ’nninglu-lu bam de lei.

⁴⁸Zai penai pechu ngau lu ze ’nningdaulak bam lei; dadege pe pui ne pechu, “A na gau, nang ’ndaitew anai je aigum tew lau? Ni, ning peu benai I ningchu anai lunghereu ze peu bam de lei,” kacheu de lei.

⁴⁹Zai pa ne penai je, “’Ndaigum ze ningnai achu peu rei se lau? A peu ki ge I bam ra lei be ningnai chî mak mei?” ze kacheu de lei.

⁵⁰Zai penai je pa ka’mpaube penai ’nningchi lak ti de lei.

⁵¹Zai penai dage pa nguakeu ze Nazareth ge wang de lei, zai penai kuapheu ze pa bam lei; zai pe pui â airamme leine pe lung ge kai bam de lei.

⁵²Zai Isua â ’nningchingbi-bi zai di-bi bi bam lei, zai Hera benai ziemmena ne ka’nchâbe ge pa bam de lei.