Read Zeme Naga LUKA 20 Bible Online

LUKA 20 - Zeme Naga bible

LUKA 20

¹Mai kat â kellumki ge baudime je pa mâ-geteilia ze sam keyibe sa lage, tingkugechîngme benai leisirawme ne gechîngme je ngua lu pe dage hang ze,

²pechu, “’Ndaikau gu rezie ne aipau tâ ramme nang tew mei zai châu ne aipau rezie ningchu pei bei ze nang tew mei be anui je rang lau,” kacheu de lei.

³Pa ne penui je kak ze, “I du ningnui je sam kat ’nneu gu lei; achu chunage ranglia lau,

⁴Johanbe gu baptisma ze tinggîm gene pat mei nune ziemmename dagene pat lau?” kacheu de lei.

⁵Dadege penui karai tu ze, “Anui ne, ‘Tinggîm gene lei,’ ze acheu dizaine â, ‘’Ndaitew ze ningnui pechu ’nnum’mmi mak lau?’ ze acheu gu lei;

⁶kane anui ne, ‘Ziemmename dagene lei,’ acheu dizaine du baudime ’nteumena ne anui je tingchukâng ne tuâ gu de lei; Johanbe â kemeu’mpeu lei be penui ’nnum’mmi sing di daseu.” Ze kacheu de lei.

⁷Chidadege â ’ndai’nggene pat mei be penui â chî me lei ze penui ne kak te lei.

⁸Dadege Isua ne penui je, “I du ’ndaikau gu rezie ne aipau tâ ramme I tew mei be ningnui je rang ra mak lei,” acheu bei de lei.

⁹Dadege â baudime dage aipau sam’nda pa saliachu di de lei: “Hangkat ne helu ge grepchîria tau gai lu ze, chi tewdekirame dage pei gai nan ze heram kedeu ’mbe bamnak kai ra hang tat ti de lei.

¹⁰Zai beting chang dadege pa ne pe gu ka’ngguapeu hangkat je grepchî merie tewkadekime dage grepchî pe damrabe teiwang ra lang gai bei de lei; kane grepchî merie tewkadekime ne pechu bêu bei de lei; zai pe barua lang gai dai bei de lei.

¹¹Dadege ka’ngguapeu kêdabe kau je lang gai bei de lei; zai pechu du bêu bei, zai tew’ngngam gai lu ze pe barua lang gai dai bei de lei.

¹²Zai pakechumpeu je pa lang gai kadai de lei; aipaupeu je tewhejam gai lu hela ’mbe tuâpat kai bei de lei.

¹³Dadege grepchî merie ’mpaupeu ne, ‘I ’ndaikau tew ra lau? A na kehungpeu je lang gai gu lei; pechu â penui ne hengêutew lêu gu lei,’ ze kacheu de lei.

¹⁴Kane chi grepchî merie tewkadekime ne pechu ngau lu dege, penui karai dam ze, ‘Pe heu lurapeu ze ai de lei; pechu anui tewchat ne kei lei, chidezai pe heu ze anui hang chang le ra hangge zeu,’ ze kacheu de lei.

¹⁵Dadege â grepchî merie gene penui ne pechu tuâpat ze tewchat ’ndi de lei. Acheuzai â grepchî merie ’mpaupeu ne penui je ’ndaikau tew gai gu lau?

¹⁶Pa ne wang lu grepchî merie tewkadekime je tew’ngga nan ze chi grepchî merie ze miramme je pei ’ndu lei,” ze acheu zeu. Penui ne aize seu lu dege, “Chigumbe â peize wangchang se lau!” ze penui kacheu de lei.

¹⁷Kane penui je pa ne pie gai lu acheu sa ze, “Acheuzaine aize rawgaibe ’ndaikau lau: ‘Hekitewme ne tuâpatkaibeibe chukâng zene pemikchukâng betâu dilangbe chang di de lei,’ kacheube zeu?

¹⁸Mi-mige de chipau chukâng peireige keugaibe kau â, sia kam gai du lei; kane chize ne mi-mi peireige keu gai dizai â chize ne pechu sîmruai ’ndu lei,” kacheu de lei.

¹⁹Zai chipau lua sing ge tingkugechîngme benai leisirawme pe peireige penui ba pat kai ra tew de lei; kane baudime je penui hing di lei; aipau sam’nda ze pa ne penui peireige sa gai lei be penui chîdibe ziegeneu.

²⁰Chidadege â laksaibe ne samrambe rezie kangge pechu peipat kai ra hangge pa ne ’ndaikau sa mei be nîmteilerabe chîam hang mâ du makbe helî-tak-tewme, chi ’ngkimpieme je penui ne lang gai ze penui lîmpiekua de lei.

²¹Penui ne pechu ’nneu ze, “Geteiliapeu, nang â gesangsing ne mâ-salia ze getei, zai kehung-ka’nrietewbe tak teilia mak kane gesangsing ne Hera gu ’mpuî tak ze geteilia de lei be anui chî lei.

²²Kaisarbe je anui ne ’mpuâhâ pei ra besie mei nune besie mak lau,” ze kacheu de lei.

²³Kane pa ne penui ningching siabe tak chî lu ze penui je,

²⁴“Rangkângpum achu teilia lau. Chige châu luî zai châu gu samrit la lau?” ze kacheu de lei. Penui ne “Kaisarbe gu lei,” acheu bei de lei.

²⁵Pa ne penui je, “Chidaze Kaisarbe gu ramme ze Kaisarbe je pei be, zai Hera gu ramme ze Hera dage pei be lau,” acheu bei de lei.

²⁶Dadege â baudime bambe ge pa samsabe ramme gene pechu penui mâ de tewchi lak tai de lei; kane pe sam kakbe penui ’nningdaulak ti ze penui kuâneu mak rim bam di de lei.

²⁷Saddusime hanggesame ringchukadaibe ga lei, kacheume bau wang de lei,

²⁸zai penui ne pechu sam’nneu ze, “Hangkat ne, pe nâu â bam, kane pe na ga ze pa chai di lêuzai â pe sikina hangkat ne chi ’mpuimi je pe nâu hang lu lu chi pe sipeu hik hangge napoine ramme je teichu gai sing ra hang Mosabe ne anui hangge rawdiak kai lei.

²⁹Chunage pe sikiname hangsena bam de lei; meraipeu pe nâu kû lu napoine lung mak ze chai di lei;

³⁰zai chi pesinpeu

³¹benai pakechumpeu ne pechu pe nâu hang lu de lei, chigum acheu ze hangsename penui na ramme sâudiak kai mak ze chai kam di lei.

³²Bechâng ge â ’mpuimi ze du chai di lei.

³³Chidaze ringchukadaibe ge châu nâu hang chi ’mpuimi ze chang ra lau? Hangsename ne pechu ngualung kam gai daseu?” ze kacheu de lei.

³⁴Dadege Isua ne penui je, “Henai rehei gu hename â henâu ku, zai mei ra pei lei;

³⁵kane chipau ting riâ chang ze bam ra buime hang chakkaime benai kechaibe gene ringchukadaibe ge â henâu du kû mak, zai mei de mei me lei,

³⁶penui â ringchukadaibe name chang ze angelme benai riâ kat ge bam ze Hera name changdibe ziegene penui â chai-daichi lak ti de lei.

³⁷Kane Mosabe ne du Tingwang je, Abraham Rapeu, Isaak Rapeu, zai Jakob Rapeu ze kube bâm hereupuîtum rasam rawgaibe ’nchui gene kechaime je kuakchu gai bei de lei be teilia gai lei.

³⁸Chunage pa â kechaime Rapeu mak lei, kane keringme Rapeu lei; pe hangge anui ring kam daseu,” ze kacheu de lei.

³⁹Dadege leisirawme hanggesame ne kak ze, “Geteiliapeu, nang sagai’mmi-desang de lei,” ze kacheu de lei.

⁴⁰Pechu penui mâ sam du ’nneu dai hing di dadegeu.

⁴¹Kane pa ne penui je, “’Ndaigumbe gene penui Krista je Dabidbe na lei ze acheuchi ra lau?

⁴²Dabidbe sing ne Getoabe leisikuak ge rang gai ze, ‘Tingwang ne a Wang je rang ze, a hezat’mbia ge ’ntau lau,

⁴³ning teureime je ning pichaî hang I ne tew gai mak tâneu,’ kacheu daseu.

⁴⁴Chigum ze Dabidbe ne pechu a Wang ze kû de lei; chidaze pa ’ndaigum ze pe na chang ra lau,” ze kacheu de lei.

⁴⁵Zai ’nteumena keseube gene pa ne kenieme je,

⁴⁶“Leisirawme (hingde geteiliame) chi penui puâ kaisup kai lu tatruaneime, zai hechaiki ning ramme ge hebakellumtewbe ramme je ’nchâ ze, ka’nduibeki ramme ge bâm yilangbe ramme benai luube-bâm ramme ge hengêutewbe bâm ramme je ka’nchâme,

⁴⁷chi kemîpuime ki gu teu’nsui lu, ruichim ’nde ra hang pahelîtew ze kellumtie ze bamme je ’ntîng le lau. Penui â tew’ngkuigaibe kedibe ngau gu lei,” ze kacheu de lei.