Read Zeme Naga LUKA 22 Bible Online

LUKA 22 - Zeme Naga bible

LUKA 22

¹Chunage ’nduihîkaimakbe tingku-ngi, chi tat’ntuahengi kacheube ze na di de lei.

²Zai tingkugechîngme benai leisirawme â ’ndaigumbe ’mpuî gene pechu tewchat le ra mei ze peu bam de lei; penui baudime je hing dadegeu.

³Chidadege â kenieme hangkereu-ze-kename ruage bambepeu Juda-Iskariotbe dage Satan gut ti de lei;

⁴’ndaigumbe ’mpuî gene penui dage pechu zua gai ra mei be tingkugechîngme benai kanguame besuitewme je ’mpau ra hang tat ti de lei.

⁵Dadege â penui suiyi-desang di ze pechu rangkâng pei ra ’mpauchak kai de lei.

⁶Chidadege â pa hezuâ gai lu, baudime gabe luage Isua je penui dage pei ra hezeu peu di de lei.

⁷Dadege â tat’ntuahengi gu melipoine je tewchatkairabe mai, chi ’Nduihîkaimakbe Tingku-ngi mai ze wangchang di de lei.

⁸Chidadege â Isua ne Peterbe benai Johanbe je lang gai ze, “Tat’ntuahengi teseu anui teu ra hangge tat ze kedâ gai zu lau,” kacheu de lei.

⁹Penai ne pechu, “Chize ’ndaige anai ne kedâ gai ra nang lunei lau?” kacheu de lei.

¹⁰Pa ne penai je, “Pie le lau, ningnai namdi ge gut dezai hangkat heduibung pua lu ningnai je hedau gu lei; pa gutkaibeki ge pe chai suigut tu lau,

¹¹zai heki’mpaupeu je acheu rang be lau, ‘Geteiliapeu ne ningchu rang lei, Hesangme rêurabe kisîam ze ’ndaige la lau, chige a kenieme je tat’ntuahengi gu teseu I nguateu ra hangge zeu?’ ze acheu zeu.

¹²Dezai pa ne ’nreibe sîam kedibe chui’nchichiaklube ze ningnai je ngualia gu lei; chige kedâ gai lau,” acheu bei de lei.

¹³Dadege penai tat ti de lei, zai penai je pa rangbe luigum ze ngaudau de lei; zai penai ne tat’ntuahengi gu teseu kedâ gai de lei.

¹⁴Zai pehî chang dege, pe dage apostolme benai pa mâ-tew ra hang ’ntaukeu de lei.

¹⁵Dadege pa ne penui je, “Kahereube I lie makge ai tat’ntuahengi gu teseu ze ningnui je I nguateunei-desang lei;

¹⁶ningnui je I rang lei, Hera gu heguangram ge aize tewpui gai mak tâne aize I teu ra mak lei,” kacheu de lei.

¹⁷Dadege pa ne hepiak tei lu, pe suiyibe sam pau gai lu dege, “Aize lu lau, zai ningnui ruage ’nzi lau;

¹⁸ningnui je I rang lei, chuna gene seu ze Hera gu heguangram wang mak tâne grepchî gu ze I sak ra mak lei,” ze kacheu de lei.

¹⁹Zai tingku lu lu, pe suiyibe sam pau gai lu dege, pa ne tiapâng lu ze penui je pei ze “Aize a pum lei, chize ningnui hangge peigaibe zeu. Achu chî bam ra hang aize tew lau,” ze kacheu de lei.

²⁰Zai chipau luigum ze muîteseu teulube châng dege, pa ne hepiak tei lu acheu ze sa ze, “Aipau piak ningnui hangge ruîpatkaibe ze a jai gene samhatkai-karchibe lei.

²¹Kane pie le lau, achu zuapeu ze ai mâ-teube-kaira ge nguateu la de lei.

²²Ziemmena Na â ranggai’ndibe luigum ze tewtat la de lei; kane pechu zua ra kelutewgaipeu â pe duângga gu lei!” ze kacheu de lei.

²³Dadege penui ruage châu ne aize tew lêu gu mei ze penui karai ge ’nneu’nruichu di de lei.

²⁴Penui ruage châu je dilangbe hang riam gai ra mei be hangge penui ruage getube bam di de lei.

²⁵Dadege pa ne penui je, “Jentailme gu heguangme â penui peireige penui sui-sui ne tew lei; zai penui peireige rezieteime je â penui ne ka’nggiame bau ze ku lei.

²⁶Kane ningnui â aigum bam se lau; chisuarane â, ningnui ruage dilangpeu zene peize henalangpeu chang lau, zai ningnui ruage kanguapeu zene peize ka’ngguapeu chang lau.

²⁷Châu ne di-bi lau, mâ-teube-kaira ge ka’ntaupeu mei nune ka’ngguapeu lau, chize â, ka’ntaupeu ze mak ti lau? Kane I â ningnui ruage ka’ngguapeu gum ze bam lei.

²⁸“Achu kakedakbe ramme daube ge ningnui â achu nguabam-bamme bau de lei;

²⁹a peu ne a hang heguangram pei gai gum ze ningnui hang I du pei gai de lei,

³⁰dezai a gu heguangram ge a gu mâ-teube-kaira ge ningnui teu ze sak le ra, zai Israelme zat kereu-ze-kename je samram ze heguang-bamrak ramme ge ’ntau le ra hangge zeu.

³¹“Heguang ne, Simonbai, Simonbai, pie le lau, Satan ne ningnui ’nteumena je chêu giam gum ze giâm ra kie la de lei.

³²Kane nang keneibe kâukeu mak ra hang ning hang I kellum gai ’nde lei; zai nang ’nreiwang dai dezai ning puiname ran tew’nchi gai lau,” kacheu de lei.

³³Dadege Peterbe ne pechu, “Heguang gau, I â nang benai kebangki ge nguabang ra, zai kechaibe ge nguachai ra kedâ lu de lei,” kacheu de lei.

³⁴Pa ne, “Peterbai, I ningchu rang lei, nang achu chibe ze, luachum ’ngkimchang gai mak tâne nemai ge ’nruirie kua ra mak lei,” acheu bei lei.

³⁵Zai pa ne penui je, “I ne ningnui je rangkângrak, chiaka, zai pîchûp ga ze langgaibe ting ge ningnui mâ-mâ ga ze daulak bam mei?” kacheu de lei. Penui ne, “Mâ de mak lei,” kacheu de lei.

³⁶Pa ne penui je, “Kane chuna â, pe dage rangkângrak bambe kau â peize chize tei le lau, zai chigum ze chiaka du peize tei le lau. Zai mige pe dage hiazutkie kegabe kau â, peize paî zua lu ze kat lui le lau.

³⁷Ningnui je I rang lei, ‘Pechu â hedeka’ngkame ruage riam gai ’nde lei,’ ze chi rawgaibe sam ze a peireige tewpui sing gai ra daseu; zai a deu ge rawgai’ndibe ze tewpuigaibe chang ra de lei,” kacheu de lei.

³⁸Dadege penui ne, “Heguang gau, Ni, aige hiazutkie kena la lei,” kacheu lei. Dadege pa ne penui je, “Chize bui de lei,” acheu bei de lei.

³⁹Zai hela ge pa pat lu tingtie gum ze Olib Loa ’mbe tat ti de lei; zai pe gu kenieme du pe chai suitat ti de lei.

⁴⁰Zai chipau bâm pa chang dege pa ne penui je, “Keduaibe ge ningnui gut mak ra kellum bam lau,” kacheu de lei.

⁴¹Zai penui dagene tingchu tuâchangduibe riâ ge pa pat ze kukdungkeu lu kellum ze,

⁴²“A peu gau, nang ne nei bei zai â aipau piak ze a dagene tei’mbia ne lau; acheuleusedu a suî ne mak ze ning suî ne peize chang lau,” kacheu de lei.

⁴³Dadege â tinggîm ’mbene angel hangkat ne pe ran tew’nchi gai ze pechu lia de lei.

⁴⁴Pe lungkahereube geteube gene pe laîkai ze kellumranbi-bi ze bam lei; zai pe gu ’nnupdui ze hejaichîpum kedibe ramme kedei ge zâukeugaibe gum ze zâukeu de lei.

⁴⁵Zai kakellumbe gene pa chu lu dege, pe gu kenieme tailam pat te lei, zai penui lung kahereube ziegene jeikeu di laleube pa ngau de lei,

⁴⁶dadege pa ne penui je, “’Ndaitew ze ningnui jeikeu di lau? Ningnui keduaibe ge gut mak ra chu lu kellum zu lau,” kacheu de lei.

⁴⁷Zai pa acheu sa lage, pe gu kenieme hangkereu-ze-kename ruage hangkat Judabe kacheupeu ne baudime je ngua lu ze wangleu de lei. Isua je keput kai ra pe tailam pa wang de lei;

⁴⁸kane Isua ne pechu, “Judabai, nang kakeputbe zene ziemmena Na je zua ra tew mei?” kacheu de lei.

⁴⁹Zai pe taihia ge bamme ne ’ndaikau wangchang gu mei be ngau dege penui ne, “Heguang gau, hiazutkie ne anui ne bi be ra mei?” kacheu de lei.

⁵⁰Zai penui ruage hangkat ne, tingkugechîngpeu gu kebang hezat’mbia kun bitaktua ’ndi de lei.

⁵¹Kane Isua ne, “Aipau riâ gene sau de zu lau!” acheu bei de lei. Zai pa ne pe kun deî ze tew’mmi gai bei de lei.

⁵²Chidadege Isua ne tingkugechîngme benai kellumki ge sipai besuitewme zai gechîngme pechu ’nggi ra patme je, “Hegasut-teupeu je ’nggi ra gum ze hiazutkie benai hetui pua lu ze ningnui pat mei?

⁵³Kellumki ge patingnaigepat ningnui dage I bambe luage a peireige ningnui bahuâ kai mak zeu. Kane aize ningnui hangge panehî de lei, zai kemuîbe gu rezie de lei,” kacheu de lei.

⁵⁴Dadege â pechu penui nîm lu nguatat ze tingkugechîngpeu ki lam’mbe nguagut kai bei de lei. Peterbe kedeu ’mbene sui lei;

⁵⁵zai kilûngsiam kedibe sunggangkelî ge penui hemitew gai lu, penui ’ntaukaheruabe luage Peterbe du penui ruage ’ntau bam lei.

⁵⁶Dadege hemi’mbi kebabe taige pa ’ntaubambe luage ’mpuimi hangkat ne pechu ngau lu dege, pechu pie sing lu ze, “Aipaupeu du pe dage bambe kau de lei,” ze kacheu de lei.

⁵⁷Kane chize pa ne ’ngkim ze, “’Mpuimi gau, I â pechu chî me lei,” kacheu de lei.

⁵⁸Zai mâtiege mak ze mige ne pechu ngau lu pechu, “Nang du penui ruage hangkat lei,” kacheu de lei. Kane Peterbe ne, “A za gau, I â mak lei,” kacheu de lei.

⁵⁹Zai ’nchetkak kat gum bam gai dege, kêdapeu ne du sa sing gai ze, “Aipaupeu ze du pe dage bambe kau sing de lei; pa du Galili’mpeu daseu,” ze acheu bei de lei.

⁶⁰Kane Peterbe ne, “A za gau, nang samsabe I â chî me lei,” kacheu de lei. Zai pa acheu sa lage luakatne ’nruirie kua gai di de lei.

⁶¹Dadege Heguangpeu ’nreiwang lu, Peterbe je pie de lei. Dadege Heguang ne pechu, “Nemai muî ’nruirie kua makge nang achu luachum ’ngkim gu lei,” kacheube sam ze Peterbe ’nningdau di de lei.

⁶²Dadege â pa pat lu, hapkehipkoak bam di de lei.

⁶³Chunage Isua je teime ne pechu teihenuitew ze lak te lei;

⁶⁴zai penui ne pe mik du dum lu pechu ’nneu ze, “Rang gai ni lau! Ningchu lakbe ze châu lau?” kacheu de lei.

⁶⁵Zai kêdadabe sam ramme du penui ne pechu ’nrû ze misongga sa gai de lei.

⁶⁶Zai tingba dadege, baudime ruage gechîngme, tingkugechîngme zai leisirawme wang’ndui gai de lei; zai penui ne penui gu samrambeki ’mbe pechu nguatat lu penui ne,

⁶⁷“Nang ze Krista mei be ze anui je rang lau,” ze kacheu de lei. Kane pa ne penui je, “I ne ningnui je rang gai dizai â, ningnui ’nnum’mmi ra mak lei;

⁶⁸zai I ne ningnui je ’nneu dizai â, ningnui kak ra mak lei.

⁶⁹Kane chuna gene seu ze ziemmena Na â reziechibe Hera hezat’mbia ba ge ’ntau du de lei,” acheu bei de lei.

⁷⁰Dadege penui ’nteumena ne, “Chigum dizai â, nang ze Hera Na de mei?” kacheu de lei. Dadege pa ne penui je, “Ningnui ne I ze de lei be rang lei,” kacheu de lei.

⁷¹Dadege penui, “’Ndaikau sakki anui ’nnang sua dai ra lau? Pe mui sing gene anui seu de zeî lau,” kacheu de lei.