Read Zeme Naga LUKA 23 Bible Online

LUKA 23 - Zeme Naga bible

LUKA 23

¹Dadege â baudime ’nteumena chu lu ze, Pilatbe tailam pechu nguawang de lei.

²Zai Isua peireige penui ne kesia’ndam gai ze, penui ne, “Aipaupeu ne anui ram ze tewkeleu, zai Kaisarbe dage ’mpuâ pei ra nam lei, pa ze Krista Heguang de lei ze pa ne acheu zeu,” ze acheu bei de lei.

³Dadege Pilatbe ne pechu ’nneu ze, “Nang Judame Wangpeu de mei?” ze kacheu lei. Dadege pa ne kak ze, “Nang ne aigum ze sa gai ’nde lei,” ze kacheu de lei.

⁴Dadege Pilatbe ne tingkugechîngme benai baudime je, “Aipaupeu peireige ka’ngkuibe mâ de I ngaupat me lei,” acheu bei de lei.

⁵Kane penui ne gechugetie ze, “Judiaram bak leine ge pa ziemmena ramme leine je pa ne tewkeleu’nrui ze mâ-geteilia ze Galili gene aipau bâm riâ chang de lei,” ze penui laîkai ze sa de lei.

⁶Zai Pilatbe aize seu lu dege, aipaupeu ze Galili’mpeu mei be ze pa ka’nneu de lei.

⁷Dadege pa ze Herodbe samrambe kangge bambe kau lei be pa chî lu dege, Herodbe dage pechu lang gai bei de lei, chi chipau ting ge Jerusalem ge bampeu zeu.

⁸Herodbe Isua je ngau lu dege, pe suiyi-desang di de lei; pa ne pe rasam seulube ziegene pechu pa ngau gai nei ze acheutie bam dadegeu, zai pa ne mâge â ka’nchetbe tewgaibe ngau gai ra pa kaheguî lei.

⁹Dadege pa ne sam misongga pechu ka’nneu de lei; kane pa ne pechu mâ de kak mak tai lei.

¹⁰Zai tingkugechîngme benai leisirawme chige sap lu ze ’nchi-chine pe peireige kesia’ndam gai de lei.

¹¹Zai Herodbe benai pe gu sipaime ne Isua je ngau’nna ze teihenuitew de lei; zai pechu paî pengêudibe bâ gai lu, Pilatbe dage lang gai dai bei de lei.

¹²Zai chipau mai sing gene Pilatbe benai Herodbe kat-kat je penai kang chang di de lei. Chipau suage â penai kakge desiesia ze bam lei.

¹³Dadege Pilatbe ne tingkugechîngme, besuitewme zai baudime ze kûwang’ndui lu,

¹⁴penui je, “Miramme je tewkeleu ka’nsuipeu je gum ze ningnui ne aipaupeu je a dage nguawang gai de lei; zai ningnui sua sing gene I pechu mâ-mâ kedî gai dege, pie le lau, ningnui ne pe peireige kesiachaugaibe ze pa ne kemaube hang I mâ de ngaupat me lei;

¹⁵Herodbe ne du chigum ze mâ de ngaupat mak ze, pa ne pechu anui dage lang gai kadai de lei. Pie le lau, pa tâtewgai’ndibe gene chaikezeirabe hang mâ de ga lei;

¹⁶chidaze pechu I ne lak kai lu, ’mpat kai gu lei,” ze kacheu de lei.

¹⁷Chunage hengî mai ge hangkat je pa ne penui dage lang gai mak kuaklakbe bam lei

¹⁸Zai penui ’nteumena muikattew ze ’nrung ze, “Aipaupeu je tew’ngga nan ze anui hangge Barabbabe je ’mpat kai be lau,” kacheu de lei—

¹⁹(Barabbabe je â namdi ge mâge â tewkeleubeibe benai kegîbe tâ tewbeibe ziegene kebangki ge kai lei.)

²⁰Pilatbe ne Isua je ’mpat kai nei ze penui dage luakat salia gai kadai lei;

²¹kane penui ne ’nrung ze, “Pechu gia gai zu lau, gia gai zu lau!” kacheu de lei.

²²Zai pakechumbe luage â, pa ne penui je, “’Ndaitew ze lau, kesiabe ’ndaikau pa tew gai lau? Pa chaikezei ra hangge pe peireige mâ de ka’ngkuibe I ngau me lei; chidaze pechu I lak kai lu ze ’mpat kai gu lei,” kacheu de lei.

²³Kane penui ne gechugetie ze pechu heling ge gia gai ra hang penui ’nrung ze kie de lei. Zai penui kuâ ne puiting di de lei.

²⁴Dadege â Pilatbe ne penui gekiebe luigum ze samram gai bei de lei.

²⁵Tewkakeleube benai kegîbe ziegene kebangki ge kaibeipeu, penui luneipeu je â pa ne penui dage ’mpat kai bei de lei; kane Isua je â penui ne nei-neibe tew ra hang pei gai bei de lei.

²⁶Zai penui pechu nguatatbe luage, Simonbe Kurini’mpeu heram gene wang ze, namdi ge gutbeipeu je nîm lu Isua chaige heling pua gai ra chize pechu tuâ gai bei de lei.

²⁷Zai baudime benai ’mpuimi ramme pechu puîhapme pe chai suitat ti de lei.

²⁸Kane Isua ne penui lam ’nreiwang lu penui je, “Jerusalem na ’mpuimi ramme gau, a hangge â hap bam se lau, kane ningnui name benai ningnui runne hang hap ze bam lau.

²⁹Pie le lau, ‘Henagame, zai mâdau de ’mpungmakme zai mâdau de hena puatungmakme paurega gu lei,’ ze penui ne acheurabe ting wangzi gu de lei.

³⁰Chidezai penui ne kedeiloa kehube ramme je, ‘Anui peireige dapchim gai lau,’ ze acheuchu gu de lei; zai peloa ramme je, ‘Anui je sungnam gai lau,’ acheu gu de lei.

³¹Hingbang ring ze bambe ting ge penui aigum dizaine, chi hingbang chaidibe ting dezai penui ’ndaigum bam ra lau?” ze kacheu de lei.

³²Zai tâ-kesiabe kedibe tewme hangna je du pechu tewchat’mpam gai ra hang nguatat ti de lei.

³³Zai timpeîkuak kacheube bâm ge penui chang dege, pechu penui ne gia gai bei de lei, zai tâ-kesiabe kedibe tewme hangna, pa hezat’mbia hangkat, zai heku’mbia hangkat zeu.

³⁴Dadege Isua ne, “A peu gau, penui je lun gai be lau; penui ’ndaikau tew mei be penui chî mak daseu,” ze kacheu de lei. Zai penui pe paî ramme ’nzi ra hedachak te lei.

³⁵Zai baudime chige sappierim bam lei; kane kanguame besuitewme ne pechu ’nrû ze, “Miramme je â pa ne tew’nring lu lei; pa Hera gu Krista, pa ne Kelânglupeu lei dizai â peize pe runne pechu tew’nring le lau!” kacheu de lei.

³⁶Zai sipaime ne du pechu teihenuitew ze, hang lu, wain kehiabe pechu pei gai lu,

³⁷acheu sa ze, “Nang Judame Wangpeu lei dizai â, ning runne ningchu tew’nringpat le lau!” kacheu de lei.

³⁸Zai pe peireige, “Aipaupeu ze Judame Wangpeu lei,” kacheube gu samrit bam lei.

³⁹Tâ-kesiatewme, keî’nchiegaibeime hangna ruage hangkat ne pechu sa’nsia ze, “Nang ze Krista mak ti lau? Ning runne ningchu du tew’nring lo zai anai je du tew’nring gai be lau!” ze kacheu de lei.

⁴⁰Kane kêdapeu ne pechu acheu ’ngngiam ze, “Hera je nang hing mak mei, chau’ngkuigaibe gu hingde ’nzuâkambe ge nang bam lu zeu,

⁴¹anai je â sâ kezei lei, anai tâtewbe mî anai â ngau lei; kane aipaupeu â kemaube mâ de ngau me lei,” acheu bei de lei.

⁴²Zai pa ne “Isua gau, nang ning gu heguangram ge gut dezai achu chî bam lau,” kacheu de lei.

⁴³Dadege pa ne pechu, “Pelingsing ze ningchu I rang lei, nemai ge Paradais ge nang a dage bam gu lei,” kacheu de lei.

⁴⁴Zai tîngna ’nchetkak kereu ze kena gum dege, kedeirei pelane muîdibe ze ’nchetkak kechum riâ muîchang lei,

⁴⁵tingnaimik muîgaidibe luage zeu; dadege kellumki gu lîmsungbe-paî ze tau na ripedaktat ti de lei.

⁴⁶Dadege Isua pe rankai ’nrung ze, “A peu gau, ning ba ge a herui peipat kai lei!” ze kacheu de lei. Zai acheu sa gai lu pa pe chui lutud kai di de lei.

⁴⁷Chunage chipau tâwangchangbe sipai haîmuiteipeu ne ngau lu dege, Hera je toa ze, “Aipaupeu â ka’nzeibe kau run lei!” ze kacheu de lei.

⁴⁸Zai ’nteumena chize pie ra hang wangka’nduime leine ne chipau tâ wangchangbe ngau lu dege penui ga zûm ze helatwang dai di de lei.

⁴⁹Zai peluî chime leine benai ’mpuimi ramme Galili gene pe chai ngua-suihangme du kedeu ’mbene sap lu ze chiramme ngau de lei.

⁵⁰Chunage Arimatheabe Judame gu namdi ge bampeu, pe ji Josepbe bam lei. Pa â samrambeki gu ziemmena keyipeu zai mâ-pelingtewpeu,

⁵¹penui ka’nningbe ge benai penui tâtewbe ge pe suîhezuâgaimakpeu de lei, zai pa â Hera gu heguangram hangge piekua bam lei.

⁵²Zai aipaupeu ne Pilatbe dage tat ze Isua pum kie lu de lei.

⁵³Dadege pa ne lukeu lu, linenpaî ne tapnam lu, tingchu tebunggailube heraw ziemmena mî ne de, zai mi je de baigaimakbe ge bai gai lei.

⁵⁴Chipau mai ze Tâtewkakedâbe mai lei, zai ’ntakbambe mai chang ra na di de lei.

⁵⁵Zai ’mpuimi ramme Galili ’mbene Isua je ngua-suiwangme Josepbe dage nguatat ti ze heraw ngau de lei, zai Isua pum ’njeigaibe tak ze penui ngau de lei;

⁵⁶chidadege â penui wang dai lu, mâ-perîmyibe benai taudui ramme kedâ gai de lei. Besie luigum ze ’ntakbambe mai â penui reibam kam di de lei.