Read Zeme Naga LUKA 3 Bible Online

LUKA 3 - Zeme Naga bible

LUKA 3

¹Tiberiasbe Kaisar kaheguangbe tingkum kereu ze mengeu kum, Pontia Pilatbe ne Judia ge laksaibe changbe ting, zai Herodbe ne Galili ge laksaibe changbe ting, zai pe kinapeu Philipbe ne Iturea huâzie benai Trakonitis huâzie ge laksaibe changbe ting, zai Lusani-abe ne Abilene ge laksaibe changbe ting,

²Annasbe benai Kaiaphabe ne tingku dilangbe changbe ting ge, hênamkang ge, Zekariabe na Johanbe dage Hera gu sam wangkeu de lei;

³zai Jordan huâzie heram ’nsangne ge tat ze helungkahelibe gu baptisma rasam paurua ze bam lei hemui kelunbe ngaurabe hangge zeu.

⁴Kemeu’mpeu Isaiabe sam ramme gu leisikuak ge rawgaibe ge: “Hênamkang ge hangkat sarua ze, Tingwang gu ’mpuî kedâkuâ lau; Pe gu ’mpuî ramme tew’nzei lau.

⁵Pebakchukbe leine chuâpuiting gai ’ndu, zai peloa hube leine benai peloa leine tei’nnakeu gai ’ndu, ’mpuî ka’ngkuibe leine tew’nzei gai ’ndu, zai ’mpuî kateratbe leine tew’ndiau gai ’ndu lei;

⁶zai haimena ne Hera gu tewka’nringbe ngau kam gu lei,” ze kacheu gum zeu.

⁷Dadege pe dage baptistew ra hang baudime wangbeime je pa ne, “Ningnui henêu chaname nung gau! Châu ne ningnui je helumpumbe wangrabe gene pak te ra hang deiliâ bei lau?

⁸Chidaze helung kahelibe rachî ramme teilia zu lau, zai ningnui runne ningnui lung ge, ‘Anui peu Abrahambe la lei,’ ze acheu se lau. I ne ningnui je rang lei, Hera â aipau chukâng ramme gene Abrahambe chaname hang teichu gai dui lei.

⁹Zai chunage du, ’nrei â hingbangpî ramme ge kai ’nde lei; chidaze pechî keyibe ’nchimakbe bang leine â, kuîtua lu hemi ge tuâ gai lei,” kacheu de lei.

¹⁰Zai baudime ne pechu, “Acheuzaine anui ’ndaigumbe tak tew ra lau?” ze ka’nneu lei.

¹¹Dadege pa ne penui kuâ kak ze, “Mechua kena bambepeu ne peize kegapeu hang ’nzi gai be lau; zai teu ra bambepeu ne du chigum peize tew lau,” acheu bei de lei.

¹²Dadege ’mpuâhame ne du baptistew ra hang pe dage wang lu pechu acheu sa ze, “Geteiliapeu gau, anui ’ndaigumbe tak tew ra lau?” ze kacheu de lei.

¹³Zai pa ne penui je, “Ningnui je diegaibe peireige ge lu’ngkeu ta lau,” acheu bei de lei.

¹⁴Dadege sipaime ne du pechu, “Anui du ’ndaigumbe tak tew ra lau?” ze ka’nneu lei. Zai pa ne penui je, “Mi-mi dage de ’nchi-chine sut se lau zai kesia’ndam gai ze sut se lau, zai ningnui hî hang ngaube ge ningnui lungwângchang ze bam lau,” acheu bei de lei.

¹⁵Johanbe kacheube ze Krista lêu gu de lei be hangge baudime ne heguî ze ziemmena ’nteumena ne penui lung ge ’nning’nrui ze bambe luage,

¹⁶Johanbe ne penui ’nteumena je, “I â ningnui je hedui ne baptistew de lei; kane I suadu kedipeu wang gu de lei, pe pichûpeu hei ra, I â buimakbe kau de lei, pa ne ningnui je Herui Ka’nchibe benai hemi gene baptistew gu lei.

¹⁷Zai ’nreu pe ba ge bambe zene kechaîpung kelapzun gai gu lei, zai chêu â hedua ge kai gu, kane chêurie â ’mmitdaimakbe hemi ge pa ne tuâ gai gu lei,” ze kak kai lei.

¹⁸Zai mâ-mâ kêdabe sam ramme zene ziemmename je gecheu ze pa ne pauliâ de lei.

¹⁹Kane Herodbe laksaibe ze pe kina nâu Herodiale tedeu ge, zai pe tâsiabe leine ge, Johanbe ne kiâbeibe ziegene

²⁰pe tâsiabe leine pe peireige kaisuâ ze Johanbe je pa ne kebangki ge bang gai ’ndi de lei.

²¹Chunage ’nteumena je baptistew kam lu dege, zai Isua je du baptistew gai bei ze Isua kakellumbe luage tinggîm lat kai de lei,

²²zai Herui Ka’nchibe depeine luî gum ze, pe peireige gizuaikeu gai di de lei, zai tinggîm ’mbene hekuâ wangkeu ze, “Nang ze a Na nekune lei; ning peireige a suiyi-desang lei,” kacheu de lei.

²³Zai Isua pe tâ tewchube ting ze pe kum himreu riâ chang di de lei, pechu ze Josepbe na hangge ’nnumgaibe pa ze Josepbe na, Helibe na,

²⁴Matthatbe na, Lebibe na, Melkibe na, Janna-ibe na Josepbe na,

²⁵Mattathiabe na, Amosbe na, Nahumbe na, Eslibe na, Nagga-ibe na,

²⁶Maathbe na, Mattathiabe na, Seme-inbe na, Josekbe na, Jodabe na,

²⁷Joananbe na, Rhesabe na, Zerubbabelbe na, Shealtielbe na, Neribe na,

²⁸Melkibe na, Addibe na, Kosambe na, Elmadambe na, Erbe na,

²⁹Joshuabe na, Eliezerbe na, Jorimbe na, Matthatbe na, Lebibe na,

³⁰Simeonbe na, Judabe na, Josepbe na, Jonambe na, Eliakimbe na,

³¹Meleabe na, Mennabe na, Mattathabe na, Nathanbe na, Dabidbe na,

³²Jessibe na, Obedbe na, Boazbe na, Shelabebe na, Nahshonbe na,

³³Amminadabbe na, Adminbe na, Arnibe na, Hezronbe na, Perezbe na, Judabe na,

³⁴Jakobbe na, Isaakbe na, Abrahambe na, Terabe na, Nahorbe na,

³⁵Serugbe na, Reube na, Pelegbe na, Eberbe na, Shelabe na,

³⁶Ka-inanbe na, Arphaksadbe na, Shembe na, Noabe na, Lamekbe na,

³⁷Methuselabe na, Enokbe na, Jaredbe na, Mahalale-elbe na, Ka-inanbe na,

³⁸Enobe na, Sethbe na, Adambe na, Hera Na lei.