Read Zeme Naga LUKA 4 Bible Online

LUKA 4 - Zeme Naga bible

LUKA 4

¹Zai Isua Herui Ka’nchibe ne puigit ze Jordan geuki gene pat te lei, zai Herui ne pechu ngua ’ndi de lei,

²pechu hezie hedai hênamkang ge Satan ne duai ze bam lei. Zai chipau ting ge pa mâ de teu mak ze bam lei; zai hezie hedai tud kai dege â pa ’njei di de lei.

³Zai Satan ne pechu, “Nang Hera Na zaine ai tingchukâng ze tingku chang ra samdie gai be lau,” kacheu de lei.

⁴Dadege Isua ne pe kuâ kak ze, “Aize acheu ze raw gai lei, ‘Ziemmena ze tingku runne ne ring ra mak lei,’ acheu zeu,” ze kacheu de lei.

⁵Dadege Satan ne pechu peloa kehu ’mbe nguachu lu, luakatne kedeirei heguangram leine pechu ngualia de lei,

⁶zai pechu, “Aipau rezie ramme leine, zai chi pengêudibe ze I ningchu pei gu lei; aize a dage pei gai ’ndi daseu, zai I ne peinei-neime hangge pei gu lei.

⁷Chidaze nang ne achu kellum bei zaine â pelane ning gu chang kam gu lei,” ze kacheu de lei.

⁸Dadege Isua ne pe kuâ kak ze, “Aize acheu raw gai lei, ‘Tingwang, ning Rapeu je nang kellum ra lei, zai pechu runne pe guâ ’nggua ra lei,’ acheu zeu,” ze acheu bei de lei.

⁹Dadege pa ne pechu Jerusalem ’mbe nguatat ti de lei, zai kellumki ’mpûm ge kai lu pechu, “Nang Hera Na lei dizaine â aigene ’nsiamkeu le lau;

¹⁰acheu ze raw gai zeî lau, ‘Ningchu ’nggumpua ne ra hang pa ne pe gu angelme je lang gai gu lei,’

¹¹zai ‘Penui ba ne ningchu pua gu lei, makchai â, ning pî tingchu ne getau gu daseu,’ acheu zeu,” ze kacheu de lei.

¹²Dadege Isua ne pechu kak ze, “Acheu ze sa gai ’nde lei, ‘Tingwang ning Rapeu je nang duai mak ra lei’ acheu zeu,” ze acheu bei de lei.

¹³Zai satan pa duairabe leine duai kam lu dege, bechâng pedâuyibe dau mak tâne hang pechu sâu gai nan ze tat ti de lei.

¹⁴Dadege Isua Herui tâtewchibe ne puigit lu, Galili ’mbe wang dai di de lei, zai pe rasam chipau heram huâzie ge chîba di de lei.

¹⁵Zai penui ka’nduibeki ramme ge pa ne mâ-geteilia ze bam lei, ’nteumena ne pechu toa ze bam de lei.

¹⁶Zai pa chîngchube bâm Nazareth ge pa wang de lei; zai ’ntakbambe mai ge pa tew-tewbe tak luigum ze ka’nduibeki ge gut kai de lei. Zai leisi kiâ ra hangge pa sapchu de lei;

¹⁷zai kemeu’mpeu Isaiabe gu leisikuak pechu pei bei de lei. Dadege leisikuak kuakpat dege acheu ze rawgaibe ’nchui ngaudau de lei,

¹⁸“Tingwang gu Herui a dage la lei, pa ne kelaksiame dage hesuiyibe sam karchibe pau ra hangge achu Hera-taudui ’nnukkaibeibe ziegeneu. Kebang ge bamme je ’mpatkairabe sam paurua ra, zai hemikchitme ngau ra latpatkaibe sam paurua ra, kategabe lieme je ’mpat kai ra,

¹⁹Tingwang ngauka’nggiabe tingkum wangchangbe rasam paurua ra hang pa ne achu lang gai bei de lei,” kacheube sam zeu.

²⁰Dadege pa ne leisikuak gekap kai lu, ka’ngguapeu dage pei gai lu ze ’ntaukeu di de lei; zai ka’nduibeki ge bamme ’nteumename ne pechu hemik zuarim bam de lei.

²¹Dadege pa ne penui je, “Nemai ge ai Hera sam rawgaibe ze ningnui keseube ge tewpui gai ’nde lei,” ze acheu saliachu di de lei.

²²Zai pe mui gene ka’nggiabe sam ramme sapatbe ziegene penui ne pechu toabe sam sa ze bam de lei; zai penui ’nningdaulak ti de lei, zai “Aize Josepbe na mak ti lau?” ze penui kacheu de lei.

²³Dadege pa ne penui je, “Ningnui aipau samrekum ze a dage acheu satâu sing gu lei, ‘Tewka’mmipeu gau, ningchu ning runne tew’mmi le lau; Kaperna-um ge nang tâtewbe anui keseube leine ze ai ning ram singbe ge du tew lau,’ kacheube zeu,” ze kacheu de lei.

²⁴Zai pa ne “Pelingsing ze ningnui je I rang lei, pe ram ge â kemeu’mpeu je ka’nchâbe kau ga lei.

²⁵Kane ningnui je pelingsing ze I rang lei, Elijabe ting ge kum chum ze kêu seruk tinggîm ’ngkam nam nan ze heram leine ge herakûm kedibe wangbe ting ge, Israel ge kemîpuime misongga bam lei;

²⁶kane penui ruage mî dage de Elijabe je lang gai mak lei, kane Sidonram ge Zarephath keloa ge ’mpuimi hangkat kemîpui dage runne lang gai lei.

²⁷Zai kemeu’mpeu Elishabe ting ge du Israel ge ka’mpame misongga bam lei; penui ruage mî je de hui’nchi gai mak lei, kane Siria’mpeu Naamanbe je runne lei,” kacheu de lei.

²⁸Dadege ka’nduibeki ge bamme leine chipau sam seu lu dege penui râtabe ne pui di de lei.

²⁹Dadege penui zuachu lu namdi gene pechu chuipat ti de lei, pechu hekâu ge peize ’nsuktuak kai ra hang penui namdi bambe bâm hekâu ’mbe pechu nguatat ti de lei.

³⁰Kane pa â penui kak gene tat’nreitat ti de lei.

³¹Zai Galili gu namdi kat Kaperna-um ’mbe pa wangkeu di de lei. Zai ’ntakbambe mai ge pa ne penui je mâ-geteilia ze bam de lei;

³²zai pe sam ge reziechibe bam bei dadege, pa mâ-geteiliabe ge penui ’nningdaulak ze bam de lei.

³³Zai ka’nduibeki ge herasiabe kahebâbe gu herui bambe kau hangkat bam lei; zai pa pe rankai ’nrung ze,

³⁴“Hei! Isua Nazareth’mpeu gau, nang ze anui hangge châu ze lau? Anui je tew’ngga ra hang nang wang mei? Nang â Hera gu Ka’nchipeu, ningchu I chî lei,” ze kacheu de lei.

³⁵Kane Isua ne pechu ’ngngiam ze, “Zîng bam lau, pe dagene pat te zu lau!” ze acheu bei de lei. Dadege herasiabe ne pechu penui zuilung gene tewkau gai ze pe dagene pat ti de lei, pechu tewhejam gai nan zeu.

³⁶Dadege penui ’nteumena ’nningdaulak ti ze penui karai kat-kat je ’mpau ze, “Aize ’ndaikau sam lau! Reziechibe benai tâtewchibe ne herui kahebâbe ramme je de die gai bei penui pat ti zeu,” kacheu de lei.

³⁷Dadege â chipau heram huâzie ge pebâm’nsangne ge pa’nsâ saruatat ti de lei.

³⁸Zai pa zuachu lu, ka’nduibeki gene pat ze Simonbe ki ge gut ti de lei. Chunage Simonbe nâu pui ’nrâ’nteu ze bam lei, dadege pechu tew’mmi gai ra Isua je penui kiam de lei. Dadege pe taige pa sap lu, ka’nrâbe zat je ka’ngngiam de lei; zai ka’nrâbe ze sau di de lei;

³⁹dadege pa zualepchu lu, penui guâ ’nggua ze bam di de lei.

⁴⁰Zai tingnaimik keu gai dege, keteu-keneube zat gechâm-châmbe gene ka’nrâme leine je pe dage penui teiwang de lei; dadege pa ne penui hangkat-kat peireige pe ba die gai ze penui je tew’mmi gai bei de lei.

⁴¹Zai herasiabe ramme ne du, “Nang â Hera Na lei,” ze ’nrung ze misonggame lung gene pat ti de lei. Dadege pa ne penui je ’ngngiam bei de lei, zai penui sam sa ra pa ne lun mak tai lei, pa Krista lei be penui ne chîdibe ziegeneu.

⁴²Zai tingba dege, pa pat lu, zîngbe bâm ’mbe tat ti de lei. Zai baudime ne pechu peu ze pe dage penui wang de lei, zai penui je sâu gai me ra hang pechu penui reîgit bam lei;

⁴³kane pa ne penui je, “Kêdabe namdi ramme dage du Hera gu heguangram gu hesuiyibe sam karchibe I pau gai himchang gu lei; chipau tâudeu hanggene achu lang gai daseu,” kacheu de lei.

⁴⁴Zai pa â Judia ge ka’nduibeki ramme ge Herasam paurua ze bam lei.