Read Zeme Naga LUKA 5 Bible Online

LUKA 5 - Zeme Naga bible

LUKA 5

¹Zai baudime ne Hera gu sam ’ngking ra hangge pe dage hengeiwangbe luage, Gennesaret hezaikung ge pa â sap bam lei.

²Zai hezaikung ge ’nnei kena bambe pa ngau de lei; kane hekânimme â ’nnei gene pat lu, penui gu chîak ramme hui bam lei.

³Simonbe gu ’nnei kat ge pa gut lu, ’nneigiam gene ’nnei kecheîne helung ’mbe gutbi de ra hang Simonbe je pa rang gai de lei. Zai chige pa ’ntau lu ’nnei gene baudime je pa mâ-kagetei de lei.

⁴Zai pa sam sasau gai dege Simonbe je pa ne, “Hekâ nîm ra hang ning gu chiâk heduichukbe ge tuâ gai lau,” acheu bei de lei.

⁵Dadege Simonbe ne, “A pau gau, anui tingmuî tua-desang de lei, kane mâ de tuâpat mak tai lei! Acheuleusedu ning sam ziegene I tuâ gai dai gu lei,” ze kak lei.

⁶Zai penui tuâ gai dege, hekâ misongga ’nrakpat-leu de lei; zai penui gu chîak ramme du richang di dege,

⁷’nnei kêdabe ge penui kangme bamme je penui je wang ze ’ngngâ gai ra hang penui ba kewai gai de lei. Dadege penui ne wang ze ’nnei kena ge hekâ kaipuigit kai bei dege penui gu ’nnei kena ze kêugut ra gum bam di de lei.

⁸Kane Simon Peterbe ne chize ngau lu dege, Isua kuk hiage keikeu lu, “A Wang gau, a dagene tatrimna de lau, I â hemui kau lei,” ze kacheu de lei.

⁹Penui hekâ nîmpatlube ge pa benai pe dage bamme ’nninglu-lu bam di de lei, hekâ misongga nîmpatbeibe ziegeneu;

¹⁰zai Simonbe je nguakangzangtewme pe kangme Zebedaibe na hangna Jakobbe benai Johanbe du ’nninglu-lu bam di de lei. Dadege Isua ne Simonbe je, “Hing se lau; chuna gene nang ziemmename je nîm gu lei,” acheu bei de lei.

¹¹Dadege penui gu ’nnei ramme ’nneigiam ’mbe teipat kai lu dege getaleine sâu gai nan ze, pe chai penui suitat ti de lei.

¹²Namdi ruage chi namdi kat ge pa bam lage hangkat ka’mpabe ne dutsut ze bambe kau wang de lei, zai Isua je pa ngau lu dege, kedei ge keikut kêu lu pechu kiâm ze, “Heguang gau, nang ne nei dizaine â achu nang ne tew’nchi gai dui lei,” ze kacheu de lei.

¹³Dadege Isua ne pe ba getuapat lu, pechu deîtau gai ze, “I nei lei; ’nchi de zu lau,” acheu bei de lei. Dadege luakatne pa ka’mpabe ze galap kai di de lei.

¹⁴Zai Isua ne pechu mî dage pau mak ra hang rang gai bei de lei; kane “tat ze tingkupeu dage ning runne ningchu teilia be lau, zai ningchu tew’nchigaibeibe hangge herâtewbe kela peipat kai lau, Mosabe ne diegaibe luigum zeu, miramme ne peize chî’mmi le ra hangge zeu,” ze rang sing gai bei de lei.

¹⁵Kane pe rasam ze sa’ndibi-bi-tat ti de lei; zai baudime misongga pe sam ’ngking ra, zai penui teuneube ramme tew’mmi gai be ra hangge pe tailam penui zuawangka’ndui de lei.

¹⁶Kane pa â hênamkang ’mbe tatpat lu kellum bam di lei.

¹⁷Zai chipau ting ge, mai kat â pa acheu ze mâ-geteilia lage, pe taige Pharisaime benai hingde geteiliame ’ntau bam de lei, chime ze Galili benai Judia ge keloa leine gene zai Jerusalem gene wang de lei; zai penui je tew’mmi ra hang Tingwang tâtewchibe pe dage bam di dadegeu.

¹⁸Zai pie le lau, pepum katlam chaipeu je jeî gene pechu penui ne puawang de lei, zai Isua suage kai ra hangge penui puagut ra heka gai de lei;

¹⁹kane ziemmena kie-desangdibe ziegene penui pechu puagutrabe ’mpuî peulak ti de lei, dadege penui heki’mpûm ’mbe chu lu, chigene pa bambe ’nchui sing ge heki ’mpûm riput lu pe suage pe jeî luî ’mpatkeu gai de lei.

²⁰Zai penui keneibe pa ngau lu dege pa ne, “A kangpeu gau, ningchu ning gu hemui ramme lun bei de lei,” ze acheu bei de lei.

²¹Dadege leisirawme benai Pharisaime ne, “Ai Hera je sakahebâpeu ze châu lau? Châu ne hemui ze lun dui lau, Hera ne makchai neu?” ze penui acheu ’nneuchu di de lei.

²²Penui lung ge ka’nningbe Isua ne chî lu dege, pa ne penui kuâ kak ze, “’Ndaitew ze ningnui lung ge aigum ka’nning lau?

²³‘Ningchu ning gu hemui lun ’nde lei,’ acheu be ra sêu-ka’nteu mei nune ‘Zuachu lu tatchu lau,’ acheu be ra sêu-ka’nteu lau?

²⁴Kane ziemmena Na â kedeirei ge hemui ramme lun-gairabe rezie pe gu la lei be ningnui chî le ra hanggene” — pa ne pe pum katlam chaipeu je—“I ningchu rang lei, chu lu, ning jeî pua lu ning ki lam tatchu lau,” ze acheu bei de lei.

²⁵Zai penui mikngau gene luakatne pa chu lu, pa jeibe jeî pua lu, Hera je toa ze pe ki lam tat di de lei.

²⁶Dadege penui ’nningdaulaklu-lu bam di de lei, zai Hera je penui toa ze ’nningdaulakbe ne pui ze bam lei, acheu sa ze, “Nemai ge mâ-gechâmbe zat ramme anui ne ngau de lei,” ze kacheu de lei.

²⁷Zai aipau châng dege, pa zuapat ti de lei, zai ’mpuâhapeu pe ji Lebibe ’mpuâ kaika’nduibeki ge ’ntaubambe pa ngau de lei; dadege pa ne pechu “A chai sui le lau,” acheu bei de lei.

²⁸Dadege mâgetaleine sâu gai nan ze chu lu pe chai pa suitat ti de lei.

²⁹Zai Lebibe ne pe ki ge Isua hang luube-bâm teleu gai bei de lei; zai ’mpuâhame benai hanggesame bau misongga ze penai je ngua’ntau ze mâ-teu de lei.

³⁰Dadege Pharisaime benai penui gu leisirawme ne pe gu kenieme peireige sam katelum de lei, acheu sa ze, “’Ndaitew ze ’mpuâhame benai hemuipungme dage ningnui nguateu-nguasak ze bam lau?” ze acheu zeu.

³¹Dadege Isua ne penui je kak ze, “Hepumsakyime hang â tewka’mmipeu je ’nnang mak lei, kane ka’nrâme ne ka’nnang zangnêu;

³²kapelingme je kû ra I wangkeu mak lei, kane hemuipungme je penui lung heli ra kû ra I wangkeu lei,” ze acheu bei de lei.

³³Zai penui ne pechu, “Johanbe gu kenieme â teseurei ze kellum ze bam bam lei, zai chigum ze Pharisaime gu kenieme ramme du tew de lei, kane ning gu kenieme ramme â teu-ze-sak ze bam bam lei,” ze kacheu de lei.

³⁴Dadege Isua ne penui je, “Henâu kagepâume henâukupeu penui dage bam ze teseurei ze bam ra semei?

³⁵Penui dagene henâukupeu je nguatat ti dezai chi beting ze wang gu lei, zai chipau ting dezai penui teseurei gu lei,” ze acheu bei de lei.

³⁶Zai penui je pa ne sam’nda kat ze du salia ze: “Mî de paî karchibe gene pedâng hitpat lu chize paî perie ge kup kai me lei; kup kai dizaine â karchibe ne punghak ’ndu lei, zai paî karchibe dâng ze â paî perie dâng ge ngaukezei ra mak lei.

³⁷Zai mî de wain karchibe hemeigeibung perie ge kai me lei; kai dizaine â wain karchibe ne pebung tewpâng gu zai wain ze luatat kam du lei, zai hemeigeibung tew’nsia ’ndu lei.

³⁸Kane wain karchibe â hemeigeibung karchibe ge kai sing ra lei.

³⁹Zai mî de wain gechîngbe saklube chângge wain karchibe saknei mak lei; ‘Gechîngbe ze yi lei,’ ze pa kacheu dadegeu,” ze kacheu de lei.