Read Zeme Naga LUKA 6 Bible Online

LUKA 6 - Zeme Naga bible

LUKA 6

¹’Ntakbambe mai ge pa helu ge tatpelatatbe luage, pe gu kenieme ze hemeubuî ’nzut lu penui badei gene nuiteu de lei.

²Kane Pharisaime hanggesame ne penui je, “’Ndaitew ze ’ntakbambe mai ge besiemakbe ningnui tew lau?” ze kacheu de lei.

³Dadege Isua ne kak ze, “Dabidbe pa benai pe dage bamme ’njei-desangdibe luage ’ndaikau pa tew mei be rasam:

⁴’ndaigum ze Hera ki ge pa ne gut lu chi tingkume ne makchai â, mî de teu ra besiemakbe keliâbe tingku pa ne lu lu teu ze pe dage bamme je du pei gai mei be rasam ningnui kiâ gai mak ti lau?” ze acheu bei de lei.

⁵Dadege pa ne penui je, “Ziemmena Na â ’ntakbambe mai Wangpeu de lei,” ze acheu bei de lei.

⁶Zai ’ntakbambe mai kêdabe mai ge ka’nduibeki ge pa gut lu mâ-geteilia bambe luage chige hangkat pe ba hezat’mbia ba chaipeu bam lei.

⁷Dadege leisirawme benai Pharisaime pechu rik bam lei, ’ntakbambe mai ge tew’mmi dizaine â pe peireige kesia’ndam gai ra hangge zeu.

⁸Kane pa ne penui lungtak chî lu dege, pa ne pe ba chaipeu je, “Aige pat ze sap kai lau,” acheu bei de lei. Dadege pa chu lu chige sap kai de lei.

⁹Isua ne penui je, “Ningnui je I ka’nneu lei, ’ntakbambe mai ge keyibe tew ra besie mei nune kesiabe tew ra besie lau, keringbe je tew’nring ra besie mei nune tew’ngga ra besie lau?” ze acheu bei de lei.

¹⁰Dadege penui ’nteumena je pa pierua kam gai lu, pechu, “Ning ba getuapat lau,” acheu bei de lei, zai pe ba getuapat kai dege, pe ba yi di de lei.

¹¹Kane penui â penui râta-desang di ze, Isua je ’ndaigumbe tak tew ra mei ze penui kahekî de lei.

¹²Aipau ting ge kellum ra hang peloa kehu ’mbe pa tat ti de lei; zai Hera dage tingmuî kellum-tingba gai de lei.

¹³Zai tingbapat dege pa ne kenieme je kû lu, zai penui ruagene hangkereu ze kena kelâng lu ze, penui ji hangge apostolme ze ’ntak kai de lei;

¹⁴Simonbe, pa ne Peterbe ze kubepeu, zai pe kinapeu Andriabe, zai Jakobbe benai Johanbe, zai Philipbe, zai Bartholomaibe,

¹⁵zai Mathaibe, zai Thomasbe, zai Alphaibe na Jakobbe, zai Simonbe, Zealot ze kubepeu,

¹⁶Zai Jakobbe na Judabe, zai Juda-Iskariotbe Isua je zuateupeu, aime bau jeu.

¹⁷Zai penui je ngua lu pa wangkeu ze bekâm ge sap bam de lei, pe gu kenieme bau zai baudime Judia benai Jerusalem pelane gene zai Tira benai Sidon ’nggeugiamram gene misongga ze pe sam ’ngking ra, zai penui keteu-keneube ramme peize tew’mmi gai ra pe dage zuawangme bau dage zeu;

¹⁸zai herui kahebâbe ne tewkahereume je pa ne tew’mmi gai bei de lei.

¹⁹Zai baudime ’nteumename ne pechu deîtau gai ra hang peu de lei, pe dagene tâtewchibe pat ze penui ’nteumena je tew’mmibeibe ziegeneu;

²⁰Zai pe gu kenieme lam ’ngngangpie lu, acheu sa ze: “Ningnui kelaksiame ze yi de lei, Hera gu heguangram ze ningnui gu daseu.

²¹“Ningnui chuna ka’njeime ze yi de lei, ningnui ’nggeu gu daseu. “Ningnui chuna kehapme ze yi de lei, ningnui ’nnui gu daseu.

²²“Zai ziemmena Na ziegene ziemmename ne ningnui je ngaugailak, zai ningnui je kelitua, zai ’nrû, zai ningnui je tâ-kesiabe tewbe hang chau gai ze ningnui ji penui ne tuâpatkaibeibe luage ze yi de lei!

²³Chipau mai ge ningnui suiyi’nta ze ’mbup chu lau, pie le lau, tinggîm ge ningnui gu getoabehi kedibe lamui lei; chigum ze penui paume ne kemeume peireige tew de lei.

²⁴“Kane ningnui keheume nung gau, ningnui duângga gu lei, ningnui â lungkatemibe ngau lu daseu.

²⁵“Chuna ningnui ka’nggeume nung gau, ningnui duângga gu lei, ningnui ’njei gu daseu! “Chuna ningnui ka’nnuime nung gau, ningnui duângga gu lei, ningnui â desui ze hap ku daseu.

²⁶“Ningnui je ziemmena ’nteumena ne sa’mmi dezai ningnui duângga gu lei, chigum ze penui paume ne kemeu karasa kau ramme peireige tew de lei.

²⁷“Kane a kuâ ka’ngkingme gau, ningnui je I rang lei, Ningnui teureime je hung lau, ningnui je ngaugailakme je keyibe tew lau,

²⁸ningnui je desetkaime je ’nnam gai be lau, ningnui je naîlatewme hangge kellum lau.

²⁹Zai ning biapi ge kagepeibe kau je kat lam’mbia du ’ndualie dai be lau; zai ning paî sutbe kau je ning mechua du peize lu ra hang nam se lau.

³⁰Ning dage mâkieme leine je pei be lau; zai ning gu merua sutbe kau dage kie dai se lau.

³¹Zai ziemmename ne ningnui peireige peize tew gai ra ningnui ne luneibe gumbe penui peireige du tew lau.

³²“Ningnui je kehungme je runne ningnui hung dizaine â, chigene ’ndaikau getoabe ningnui ngau ra la lau? Hemuime ’nsangnedu penui je kehungme je hung daseu.

³³Zai ningnui je keyibe tewme dage runne ningnui keyibe tew dizai â, chigene ningnui ’ndaikau getoabe ngau ra la lau? Hemuime ’nsangnedu chigumbe tew daseu.

³⁴Zai ningnui hang ngau-dairame dage ningnui hepuk kai’nsui dizai â, chigene ningnui ’ndaikau getoabe ngau ra lau? Hemuime ne du chigum ze hemuime dage peibe riâ ngau dai ra hepuk kai daseu.

³⁵Kane ningnui teureime je hung lau, zai keyibe tew lau, zai ngau dai ra heguî mak ze hepuk kai lau; chidezai ningnui gu getoabehi di ze bam gu, zai Hulangpeu name ningnui chang ze bam gu lei; pa â hesuiyibe sam paumakme benai mâ-tingme je ka’nggia daseu.

³⁶Ningnui peu ne ’nggiachi gum ze ningnui du ’nggiachi ze bam lau.

³⁷“Miramme je ki se lau, chidezai ningnui je ki ra mak lei; chau’ngkui gai se lau, chidezai ningnui je chau’ngkui gai ra mak lei; lun lau, chidezai ningnui je lun gai bu lei.

³⁸Pei lau, chidezai ningnui je pei bu lei; ’nchu-’mmi ze, nîmgesip ze, gechei’ntip ze, ’nniâmba ze, ningnui nie peirei gene mâ’ndualiebe ge kai bu lei. Ningnui ’nchu lu peibe riâ ningnui ngau dai gu lei,” ze kacheu de lei.

³⁹Dadege penui je sam’nda kat du pa salia ze: “Hemikchitpeu ne hemikchitpeu je nguatatchi dui mei? Penai hangna mâ-kuiki ge keu gai mak ra mei?

⁴⁰Mâ-geteiliabe suibe kau â, geteiliapeu peireige bam mak lei, kane mi-mige pechu geteilia kam gai bei dezaine pechu geteiliapeu gum ze bam du lei.

⁴¹Zai ’ndaitew ning mik ge hîngloa bambe chî mak ze, ning sikina mik ge keramoîne bambe nang ngau lau?

⁴²Makchai ning mik ge hîngloa bambe nang ngau mak ze, ning sikina je, ‘A sikina’mpeu gau, ning mik ge keramoîne bambe I ne lutua ne che lei,’ ze nang ’ndaigum ze acheuchi ra lau? Nang helunglimpungbe kau gau, ning mik ge hîngloa bambe ze lupat-raî ne lau, chidezai ning sikina mik ge keramoîne lupat ra nang ngaudesibi gu lei, ze kacheu de lei.

⁴³“Hingbang keyibe ne pechî kesiabe ’nchi me lei, zai kesiabe bang ze du pechî keyibe ’nchi me lei;

⁴⁴hingbang leine pechî gene chî lu lei. Hetu gene ’mbeuchî rai’ndui me lei, zai meitikchîria gene du grepchî rai me lei.

⁴⁵Ziemmena keyibe kau â, pe lung ge keyibe kaikanduibe gene mâ-keyibe ramme ’nrukpat lei, zai ziemmena kesiabe kau â, pe lung ge kesiabe kaika’nduibe gene kesiabe ramme ’nrukpat lei; pe lungge pui-puibe ze pe mui gene sapat ka’nsui lei.

⁴⁶“Ningnui je I rangbeibe tew mak ze, ’ndaitew ningnui ne achu, ‘A Wang, a Wang’ ze ku lau?

⁴⁷A dage wang ze a sam ramme seu lu, chiramme tewbe kau leine ze châu gumbe kau mei be I ningnui je teilia gu lei:

⁴⁸pa â hekitewpeu bekui rua’nchuk lu tingchudepiang peireige heki tewdîmchugaibe gum lei; zai heduidi-wang ze heduiteleu ne chipau ki nupkagetie de lei, zai tew’ngngailak tai lei, heki ze tewgai’mmi’ndibe ziegeneu.

⁴⁹Kane mi-mige seu lu ze, tewmakbe kau â hekipung pedim ga ze kedei ge heki tewpeu gum lei; hedui-teleu ne chipau ki ze nupgetie bei ze luakatne kâu di de lei, zai chipau ki ze â sia’ndi di de lei,” ze kacheu de lei.