Read Zeme Naga LUKA 8 Bible Online

LUKA 8 - Zeme Naga bible

LUKA 8

¹Zai chipau châng dege, Hera gu heguangram gu misuiyibe sam karchibe ze namdi ramme benai keloa ramme ge Isua tat ze paurua bam de lei. Zai pe dage hangkereu-ze-kename bam lei,

²zai heruikesiabe bamme benai herarît zat ramme bamme, penui je tew’mmibeime ’mpuimi hanggesame: Marile pe lung gene herasiabe sena pattipui, Magdalinle kacheupui,

³zai Herodbe guâ ka’ngguame ruage pemuitewpeu, Chuzabe nâu Joannale, zai Susannale, zai miramme kêdame ramme chi penui gu kebambe gene penui hangge ’nzipat ze bamme aime bau du bam de lei.

⁴Zai baudime wang’ndui ze keloa ’nsangne gene ziemmena ramme pe dage zuawangbe luage sam’nda ne penui je salia ze:

⁵“Helei ka’nrukpeu pe gu helei ’nruk ra pat ti de lei; zai pa ’nrukkaibe luage, gesa â ’mpuî’ntai-taige keu gai lei, zai chize kutgetie bei de lei, zai ’nruine ramme ne kuaiteu ’ndi lei.

⁶Zai gesa â tingchuterazeu ze keu gai lei; zai puakpat dege, kedei ’nnimmakbe ziegene lai gai di lei.

⁷Zai gesa â hetuzeu ge keu gai lei, zai hetubang benai puakpat’mpam dege, hetubang ne zin’ngga nan tai lei.

⁸Zai gesa â kedei keyibe ge keu gai ze chîngchu de lei, zai pechî bak haî pat lei,” ze kacheu de lei. Aize pa sa gai lu dege, pe rankai sa ze, “Seu ra hang pe kun bambe kau je peize seu le lau,” kacheu de lei.

⁹Zai pe gu kenieme ne pechu aipau sam’nda rimba ze ’ndaikau mei be ’nneu bei dege,

¹⁰pa ne, “Ningnui je â Hera gu heguangram gu samkim ramme ze chî ra pei gai bam de lei; kane miramme hang â sam’nda chang lei, chidezai penui ne ngau lu ngauchi lak ra, zai seu lu seuchi lak ra hangge zeu.

¹¹“Chunage sam’nda rimba ze â aize de lei: Helei ze â Hera gu sam de lei.

¹²Chi ’mpuî’ntai-taige keugaidibe ze â, sam ze seulume bau de lei; dadege, satan ne wang ze penui lung gene sam ze lutat ti de lei, chidezai peize penui ’nnum’mmi mak ze ring mak ra hangge zeu.

¹³Zai chi tingchuterazeu ge keugaidibe ze â sam ze seu lu dege penui suiyi ze luteime bau de lei; kane airamme ze pema mâ de ga dadege tingkat runne penui nei gai lu keduaibe luage kâudime bau de lei.

¹⁴Zai chi hetuzeu ge keugaidibe ze â, chize seu lu da, kane penui ’mpuî tat-hang dege keringbe ting mâ-mâ ’nningkahereube zat ramme, zai keheube zat ramme, zai mêruang suigut ramme ne zin’ngga nan ze penui rachî ze peling chang mak ze bamdime bau de lei.

¹⁵Zai kedeiyibe ge keugaidibe ze â, penui ze sam seu lu lungsang benai helungyibe ne chize tei’ntiprip lu liechibe gene perachî ’nchipatme bau de lei.

¹⁶“Mî de hemibung ’ntau lu ze, hegeî’ntui ne ruichim gai me lei, zai jeîra kangge du kai me lei, kane kegutme leine kebabe ngau ra hangge pebâm ge kai lei.

¹⁷Mâ de teilia mak ze bai’nderabe ga lei, zai mâ de chilia gai mak ze, zai kebabe ge wang gai mak ze ’ngkimrabe ga lei.

¹⁸Chidaze ningnui seube tak ge ’ntîng ze bam lau; mâ-chîneibe bambe kau je â peisuâ gai bu lei, zai ’nggapeu je â pa ne pe lung gene pe dage mâ-chîneibe bambe ’nninggaibe ’nsangdu lutat tu lei,” ze acheu bei de lei.

¹⁹Dadege pe pui benai pe kiname pe tailam wang de lei, kane baudi kaukie ne pe tailam penui wanghechutchi lak ti de lei.

²⁰Dadege mige ne pechu rang gai ze, “Ning pui benai ning kiname ningchu ngauhedau gai nei ze hela ge sapkua la lei,” ze acheu bei de lei.

²¹Kane pa ne penui je, “Hera gu sam seu lu chize tewme ze a pui zai a kiname de lei,” acheu bei de lei.

²²Mai kat â pe gu kenieme je ngua lu ’nnei ge gut ti de lei, zai pa ne penui je, “Hezai gene wî giam anui kapat kei lei,” acheu bei de lei. Dadege penui tatchu di de lei,

²³zai penui ’nnei chaîtatbe luage, Isua â jeikeu di de lei. Dadege hezai ge tingkaichibe chupkeu de lei; zai penui gu ’nnei ze hedui ne pui di de lei, dadege penui kehingbe ge bam di de lei.

²⁴Dadege penui ne tat ze pechu ’ngkia ze, “Geteiliapeu, Geteiliapeu, anui ga gu de lei!” ze kacheu de lei. Dadege pa ’nrakpat lu, tingkai benai hedui kagesuâkbe je ka’ngngiam de lei; dadege pelane saurei gai di de lei.

²⁵Pa ne penui je, “’Ndai’ngge ningnui keneibe la lau?” kacheu de lei, dadege penui hing di, zai ningdaulaklu-lu gai di de lei, zai acheu sa ze, “Aipaupeu ze châu se lau, tingkai benai hedui je de samdie gai bei ze chiramme ne du pe kuapheupeu zeu,” ze penui kacheu de lei.

²⁶Zai Galili je teidabe Gerasin ge penui wangchang de lei.

²⁷Zai ’nneigiam ge pa zuapat dege, namdi gene hangkat herakesiabe ramme bambepeu pechu kahedau de lei; chipaupeu â betinggetie paî mâ de bâ mak ze bam bam lei, zai kilûng ge du bam mak, kane heraw ramme ge bam lei.

²⁸Isua je pa ngau lu dege, ’nrung ze pe suage kâukeu gai lu, perankai sa ze, “Isua, Hera Hulangpeu Na gau, nang ze a hangge châu ze lau? I ningchu kiam lei, achu tewsâ se lau,” ze kacheu de lei.

²⁹Isua ne herui kahebâbe je chipaupeu lung gene pat te ra samdie gai bei dadegeu. (Zai chipaupeu je chize ne nîm ka’nzie lei; zai pechu hegeîria benai hegeî’ngkap ne pi ze reî-ka’nzie lei, kane pechu pibe-ria tewtap nan ze, herui kesiabe ne pechu hênamkang ’mbe kum gai bei bei lei).

³⁰Dadege Isua ne, pechu ’nneu ze, “Ning ji ’ndaikau lau?” acheu bei de lei. Dadege pa ne, “Changsenângbe lei,” ze acheu bei de lei; pe lung ge herasiabe misongga guttibe ziegeneu.

³¹Zai besînggabe kuiki ge gut kai ra penui je samdie gai mak ra pechu penui kiam de lei.

³²Chunage chipau deiloa ’mbia ge kebakdung deteurua bam lei; zai ai kebak dung lungge penui je gut ra pei ra penui pechu kiam de lei.

³³Dadege herasiabe ramme chipaupeu lung gene zuapat lu, kebakdung lungge gut ti de lei, dadege kebakdung ze hekâu ’mbe pak’nsukkeu ze hezai ge keu gai ze kehakchat kam gai di de lei.

³⁴Kebak-reîme ne chize ngau lu dege, paktat ze namdi benai chipauram dei ge pau gai bei de lei.

³⁵Dadege ziemmename ramme ’ndaikau tew mei be pie ra zuapat wak te lei, zai Isua dage penui wangchang dege, herakesiabe ramme pe dagene pattipeu ze paî bâ gai lu, pe suî-’nchanghang di ze Isua pî hiage ’ntaubambe penui ngau de lei; dadege penui hing di de lei.

³⁶Zai kengaume ne herasiabe bambepeu je tewka’mmibe tak penui je ranglia bei de lei.

³⁷Dadege â Gerasinram ge zai pehuâzie ge bamme leine ne penui dagene tatrimna de ra pechu lang de lei; penui hing-desangdibe ziegeneu; dadege pa ’nnei ge gut lu wang dai di de lei.

³⁸Zai herasiabe ramme pe dagene pattipeu ze pe dage bam bam ra hang pechu kiam de lei; kane Isua ne pechu tat ra hang lang gai ze,

³⁹“Ning ki lam wang dai zu lau, zai Hera ne ning hangge ’ndaizeuge tâtew gai bei mei be ze saba gai be lau,” acheu bei de lei. Dadege pa tat ze chi namdi ge tatrua ze, Isua ne pe peireige ’ndaizeuge tâtew gai bei mei be rasam paurua de lei.

⁴⁰Chunage Isua wang dai dege, baudime ne pechu ’nchâ ze bamkuâ de lei, penui ’nteumena ne pechu wang ra kuâbam dadegeu.

⁴¹Dadege hangkat pe ji Jairabe, ka’nduibeki ge pemuitewpeu wang de lei; dadege Isua pîkang ge kâukeu gai lu pe ki lam peize wang ra hang pechu kiam de lei,

⁴²pe na ’mpuimi napoine hangkat gap bambepui pe tingkum kereu ze kena riâ kau chaitena bam dadegeu.

⁴³Zai ’mpuimi hangkat kum kereu ze kena kahejaibe kau pechu mî ne tew’mmichi lak ze bambepui,

⁴⁴pe chai ’mbene wang lu, pe paîri deîtau gai de lei, dadege luakatne pa kahejaibe ze saulap kai di de lei.

⁴⁵Dadege Isua ne, “Châu ne lau, achu deîtaube zeu?” kacheu de lei, dadege haimena ne ’ngkim ze bam bei dege, Peterbe ne, “Geteiliapeu, baudime ne ningchu sapgua ze hengeigit bam de zeî lau!” acheu bei de lei.

⁴⁶Kane Isua ne “Mige â achu deîtau lei; a dagene a chi zuapattibe I chî lei,” kacheu de lei.

⁴⁷Zai ’mpuimi pa ’mbailaktibe chî lu dege, kedun ze wang lu pe suage kâukeu gai lu, pechu ’ndaikau hang pa deîtau gai mei be, zai ’ndaigum ze pa luakatne yilap ti mei be ziemmena ’nteumena suage salia de lei.

⁴⁸Dadege pa ne pechu, “A na ’mpuimi gau, nang keneibe ne ningchu tew’mmi bei de lei; ning lungtemichai ze tatchu lau,” acheu bei de lei.

⁴⁹Zai pa sam sa lage samrampeu ki gene hangkat pat lu ze, “Ning na ’mpuimi napoine chai de lei; Geteiliapeu je tewhereu dai ta lau,” ze kacheu de lei.

⁵⁰Kane Isua chize seu lu dege, “Hing se lau; ’nnum’mmi le lau, zai pa yi du lei,” ze acheu bei lei.

⁵¹Zai kilûng ge pa wang dege pechu nguagut ra hangge, Peterbe zai Johanbe, zai Jakobbe, zai napoine pui benai napoine peu je runne zangno mî je de pa lun mak lei.

⁵²Zai ’nteumena puîhapriau bam lei; kane pa ne, “Hap se lau; pa â chai me lei, kane jeikeu di lei,” acheu bei de lei.

⁵³Zai napoine ze chai di de lei be chî lu dege, pechu ka’nnui wak lei.

⁵⁴Kane Isua ne pe ba ne tei lu ze, “Napoine gau, chu lau,” ze acheu kû gai lei.

⁵⁵Dadege pe gu herui wang dai ze luakatne pa zuachu di de lei; zai pechu mâ-teu ra pei ra hangge penui je pa ne rang gai bei de lei.

⁵⁶Dadege pe pui benai pe peu ’nningdaulak ti de lei; kane chi tâwangchangbe ze mî je du rang mak ra penui je rang sing gai bei de lei.