Read Zeme Naga LUKA 9 Bible Online

LUKA 9 - Zeme Naga bible

LUKA 9

¹Zai pa ne hangkereu-ze-kename je kûwang’ndui lu, herasiabe ramme leine peireige, zai herarît zat ramme je tew’mmi ra, tâtewchibe benai rezie penui je pei gai bei de lei,

²zai Hera gu heguangram rasam paurua ra, zai ka’nrâme je tew’mmi ra penui je langpat kai bei de lei.

³Zai pa ne penui je, “Ningnui ’mbei ra hangge mâ de tei se lau, hetui du, chiaka du, zai tingku du, zai rangkâng du tei se lau; zai mechua du kena tei se lau.

⁴Zai ningnui gutkai-kaibe ki ge rêu lau, zai chigene zuatat dai lau.

⁵Zai ningnui je ’nchâmak-makbe bâm ge, chipau namdi gene ningnui tatpat dezai penui peireige chî ra sakkitewgaibe hangge ningnui pîdei gene kedeiniamoîne kechungtua ne lau,” kacheu de lei.

⁶Dadege penui tat ti de lei, zai keloa ramme tatrua ze samkeyibe pau ze, pebâm’nsangne ge ka’nrâme je tew’mmi ze bam de lei.

⁷Chunage Herodbe laksaibe sinpeu ne Isua tâtewbe rasam leine seu lu ze pe lung pedap ti de lei, hanggesame ne, Johanbe je â kechaibe gene kuakchu gai dai ’nde lei ze acheu,

⁸zai hanggesame ne Elijabe lia de lei acheu, zai hanggesame ne ’ndâ kemeume ruagene hangkat ringchu kadai de lei, ze kacheube be ziegeneu.

⁹Herodbe ne sa ze, “Johanbe je pe peî I ne dâng ’nde le; kane aigum ze pe rasam I ne seupeu ze châu se lau?” ze kacheu de lei. Dadege pechu pa ngau ra peu de lei.

¹⁰Zai penui pe dage wang dai lu ze, pechu penui tâtewgaibe rasam pau gai de lei. Dadege pa ne penui je nguachâm lu, Beth-saida kacheube namdi ’mbe tat ti de lei.

¹¹Baudime chize chî lu dege, pe chai penui suitat ti de lei; dadege pa ne penui je ’nchâ gai de lei, zai Hera gu heguangram rasam penui dage salia bei de lei, zai tew’mmi gai ra ka’nnangme je pa ne tew’mmi gai bei de lei.

¹²Chunage tingnaimik kêu ra chang di de lei; dadege hangkereu-ze-kename wang lu pechu, “Ai baudime ze anui huâzie ge bambe keloa ramme ge nung, zai heluzam ge nung rêu ra, zai penui deteu hang peu ra tat ra lang gai be zu lau; anui â hênamkang zîngbe bâm aige bam daseu,” acheu bei de lei.

¹³Kane pa ne penui je, “Ningnui ne penui je mâ-teu ra pei be lau,” acheu bei de lei. Penui ne, “Aime baudi ’nteumena teu ra hang anui ne tat ze lui makchai â, tingku mengeu benai hekâ kena peirei anui dage mâ de ’ngga lei,” kacheu de lei.

¹⁴Chige ’mpeumi chang mengeu riâ gum bam dadegeu. Zai pa ne pe gu kenieme je, “Bau kat ge hangrengeu-ngeu gum ’ntau ra pebau-bau hang reheî gai lau,” acheu bei de lei.

¹⁵Dadege chigum ze penui ’ntau ra reheî gai bei de lei.

¹⁶Dadege tingkukuak mengeu benai hekâ kena pa ne tei lu tinggîm ’mbe ’ngngangpie ze ’nnam gai lu, tiapâng gai de lei, dadege baudime suage kai ra pe gu kenieme je pei bei de lei.

¹⁷Zai ’nteumena teu ze ’nggeu kam lu de lei. Zai penui teuka’nsakbe padesuine ramme ’ntui kereu ze kena ruipui lu de lei.

¹⁸Zai acheu lage pa pe runne kellum bambe luage pe gu kenieme pe dage bamkuâ de lei; dadege pa ne penui je mâ-’nneu ze, “Baudime ne I châu lei ze kacheu lau?” ze kacheu de lei.

¹⁹Dadege penui ne kak ze, “Baptistewpeu Johanbe lei, kacheu lei; kane hanggesame ne Elijabe lei, kacheu lei, zai hanggesame ne ’ndâ kemeume ruage hangkat ringchu kadai kau lei,” ze kacheu de lei.

²⁰Dadege pa ne penui je, “Kane ningnui ne achu châu lei ze kacheu lau?” acheu bei de lei. Dadege Peterbe ne, “Hera gu Krista lei,” ze acheu bei de lei.

²¹Zai chipau sam ze mi suage du pau mak ra penui je rang sing gai ze,

²²“Ziemmena Na â misongga hereulie himchang gu lei, zai gechîngme, tingkugechîngme zai leisirawme ne tuâpat kai gu, zai tewchat kai gu lei, zai pakechumbe mai ge kuakchu gai dai gu lei,” ze acheu bei de lei.

²³Dadege pa ne penui ’nteumena je, “Mi-mige de a chai suirame â pe runne pechu ’nzâ mak ze, nai’nsangne pe gu heling pua ze peize a chai sui lau.

²⁴Zai mi-mige de pa keringbe tew’nringneibe kau â pa keringbe ’ngga gu lei; kane mi-mige de a ziegene pa keringbe gagaibe kau â, ring gu lei.

²⁵Mige ne kedeirei pe gu chang kam sedu pa keringbe ’ngga gai dizaine ’ndaikau pe hangge kegiebe bam ra lau, pa gekum gai di zeu?

²⁶Zai mi-mige de a sam ramme benai achu ka’ngngambe kau je â, pa pengêudibe zai Bepeu ngeudibe zai angel ka’nchime ngêudibe gene pa wangkeube mai ge ziemmena Na ne pechu ’ngngam gu lei.

²⁷Kane pelingsing ze ningnui je I rang lei, aige sapme hanggesame, Hera gu heguangram penui ngau mak tâne â kechaibe ’ndâumerame la lei,” kacheu de lei.

²⁸Chunage aipau sam ramme salube châng hezie desat gum chang dege, Peterbe, zai Johanbe, zai Jakobbe je Isua ne ngua lu kellum ra peloa kehu ’mbe chu di de lei.

²⁹Zai pa kellum lage, pe ju bambe tak ze keli di de lei, zai pe paî ze hâ’ngngûpchup ze pling bam di de lei.

³⁰Zai pie le lau, mige hangna Mosabe benai Elijabe ne pechu ’mpau ze bam lei,

³¹penai zene pengêudibe gene liâ ze pa putkairabe rasam sa bam de lei, Jerusalem namdi ge chize pa ne tewpuigairabe zeu.

³²Chunage Peterbe benai pe dage bamme ze jeihungkeu di da kane ’nrakpat lu ze pe ngeudibe benai mige hangna pe taige sapbambe penui ngau de lei.

³³Zai penai Isua dagene tat ti dege, Peterbe ne Isua je, “Geteiliapeu gau, anui aige bambe yi lei; hetiam kechum anui tew kei lei, ning hang kat, Mosabe hang kat, zai Elijabe hang kat zeu,” ze kacheu de lei—pa ’ndaikau sa mei be chî mak dadegeu.

³⁴Pa acheu sa gai lage, kemâu ne wangkeu ze penui je sung ’ndi de lei, zai kemâu lungge penui gut kai dege penui hing di de lei.

³⁵Zai kemâu gene sam sapat ze, “Aize a Na, I ne kelânggai’ndipeu lei; pe kuâ ’ngking lau!” kacheu de lei.

³⁶Zai chipau kuâ sapat kai lu dege, Isua runne laleu de lei. Dadege penui kuâneu mak rim bam di de lei, zai chipau ting ge penui mâ-ngaube rasam mi-mi dage de salia mak bam de lei.

³⁷Zai bechai mai ge peloa ’mbene penui wangkeu dege, ziemmena baudi pechu kahedau de lei.

³⁸Zai pie le lau, ziemmena baudi ruagene hangkat ne ’nrung ze, “Geteiliapeu gau, a na je nang ne pie gai ra ningchu I kiam lei, a na ai runne daseu;

³⁹zai pie le lau, herui ne pechu nîm bei ze luakatne pa ’nrungpat lei; chize ne pa ’nchaihûp-rumpat mak tâne tewtingdin gai bei bei lei, zai tew’nteukala gai bei ze yipat ta ra gum bam di di lei.

⁴⁰Zai ning kenieme ne chize peize kelitua gai ra I kiâm gai da, kane penui kelituachi lak lei,” kacheu de lei.

⁴¹Isua ne kak ze, “Hei ’nnum’mmimakbe benai helungriak châmbe reheime nung gau, I ne ’ndaitie ge ningnui dage bam ze ningnui je lie bam ra lau? Ning na je aige nguawang lau,” acheu bei de lei.

⁴²Chi napoine wangbe luage herasiabe ne pechu chuikaukera gai lu tewtingdin gai bei de lei, kane Isua ne heruikesiabe je ’ngngiam bei de lei, dadege chi ’mpeuminapoine je tew’mmi gai lu ze pechu pe peu dage pei gai bei de lei.

⁴³Zai penui ’nteumename ne Hera kaheguangbe gu rezie pengêudibe ge ’nningdaulak ze bam de lei. Kane penui ’nteumena Isua ne tâtewgaibe zat leine ge ’nningdaulak ze bambe luage, pa ne pe gu kenieme je,

⁴⁴“Aipau sam ramme ze peize ningnui kunsîng ge gut lau; ziemmena Na je ziemmename ba ge peipat kai gu daseu,” kacheu de lei.

⁴⁵Kane ai sagaibe ze penui ’nningchi lak tai de lei, zai aize peize penui chî mak bam de ra hangge aize penui dagene tei’mbia nan tai de lei; zai ai sagaibe rasam deu ge penui ne pechu ’nneu gai hing di de lei.

⁴⁶Zai penui ruage châu ne dilang ra mei be penui karai ge tuchu di de lei.

⁴⁷Kane Isua ne penui lung ka’nningbe tak chî lu dege, napoine hangkat je tei lu, pe taige kai lu dege,

⁴⁸penui je, “Mi-mige de ai napoine je a ji gene ka’nchâbe kau â, achu ka’nchâ de lei, zai mi-mige de achu ka’nchâbe kau â, achu langgaipeu je ka’nchâ de lei; ningnui ’nteumena ruage cheilangbe kau zene kedibe kau de lei,” kacheu de lei.

⁴⁹Zai Johanbe ne kak ze, “Geteiliapeu gau, mige hangkat ning ji gene herasiabe ramme je kelituabe anui ngau lei, zai anui ne pechu nam de lei, pa ne anui chai suimakbe ziegeneu,” ze kacheu de lei.

⁵⁰Kane Isua ne pechu, “Pechu nam se lau; ningnui je ’nggimakbe kau â, ningnui hang daseu,” kacheu de lei.

⁵¹Zai tinggîm ’mbe pechu nguachu’nderabe ting wang’nna di dege, Jerusalem ’mbe tat ra hang pe ma pie’nsua di de lei.

⁵²Dadege pe hangge tat ze mâ-teleu’ntua gai ra hepâupaume je pa ne pe suage lang’ntua gai de lei; chi Samaria keloa kat ge tat ze gutkaidime bau jeu;

⁵³kane pa ne Jerusalem ’mbe tat ra pe ma ’nsua’nchichiaktibe ziegene baudime ne pechu ’nchâ mak tai de lei.

⁵⁴Zai pe gu kenieme Jakobbe benai Johanbe ne chize ngau lu dege, “Heguang gau, aime je rûchat kam ’nde ra tinggîm ’mbene anai ne hemi kûkeu gai be ra mei?” ze penai kacheu de lei.

⁵⁵Kane pa ne ’nreiwang lu, penai je ’ngngiam bei lei.

⁵⁶Dadege kêdabe keloa ’mbe penui tat’nduâtat ti de lei.

⁵⁷Zai ’mpuî ki luî penui tat lage, hangkat ne pechu, “Nang tat-tatbe ge ning chai I sui gu lei,” kacheu de lei.

⁵⁸Dadege Isua ne pechu, “Munserung ramme penui ki la, zai ’nruine ramme penui chip la lei; kane ziemmena Na â pe peî ’mbeîgairabe bâm ’ngga lei,” ze acheu bei de lei.

⁵⁹Kêdapeu je pa ne, “A chai sui le lau,” acheu bei de lei. Kane pa ne, “Heguang gau, a peu gu kechaipum bai ra tat ra achu peiraî lau,” kacheu de lei.

⁶⁰Kane pa ne pechu, “Peize kechaime ne kechaime je â bai le lau; kane nang â tat ze Hera gu heguangram rasam paurua zu lau,” acheu bei de lei.

⁶¹Kêdapeu ne, “A Wang gau, ning chai I sui gu lei; kane a ki ge bamme je rimna ra hang sam rang gai ra tat ku rei lei,” kacheu de lei.

⁶²Isua ne pechu, “Mi-mige de kepeutang ge pe ba ’ngking gai lu hechai’nriakpie bamdibe kau â, Hera gu heguangram hangge bui me lei,” acheu bei de lei.