Read Zeme Naga DEUTERONOMI 1 Bible Online

DEUTERONOMI 1 - Zeme Naga bible

DEUTERONOMI 1

¹Airamme ze Jordan geuki gene naimikpat ’mbia tingkangram ge, Arabah ge Suph hiage, Paran benai Tophel, Laban, Hazeroth, zai Dizahab kakge Israelme leine dage Mosabe ne saliabe sam ramme de lei.

²Chize Seir deiloa gene Kades-barnea tatbe ’mpuî Horeb gene tebeî hezie kereu ze kat lei.

³Zai pahedaibe kum, kêu kereu ze kat gu naimikpui raîlangbe ge hingde penui je pei gai ra pechu Tingwang ne peigaibeibe leine luigum ze Mosabe ne Israelme dage ranglia de lei,

⁴chize Heshbon ge bambepeu Amorme gu heguang Sihonbe zai Ashtaroth benai Edrei ge bambepeu Bashan gu heguang Ogbe je pa duîlube chângge de lei.

⁵Jordan gene katlam giam Moab dei ge, Mosabe ne aipau hingde sakeli chu di de lei,

⁶“Horeb ge anui suage Tingwang anui Rapeu ne rang gai de lei, ‘Aipau deiloa ge ningnui bam’ntie de lei;

⁷’nreiwang lu ningnui tebeîtewtatchu lau, zai Amorme peloaram ge, zai Araba ge, peloaram benai bekâmram ge, zai Negeb ge ’nggeukung ge, ’nggeuki kedibe Euphrates geuki riâ chang ze Kanaanram benai Lebanon ge ningnui puiname leine dage tatchu lau.

⁸Pie le lau, ningnui sua ’mbe I ne heram reheî gai ’nde lei; gut ze ningnui paume Abrahambe dage, Isaakbe dage, zai Jakobbe dage penui benai penui chaname hechai lungleîme dage pei gai ra Tingwang ne hatkaiberam ze ’nram le zu lau,’ acheu zeu.

⁹“Chipau ting ge I ne ningnui je rang gai ze, ‘A runne â ningnui deu pungtat lak te lei;

¹⁰Tingwang ningnui Rapeu ne ningnui je tewpung gai bei zeu, zai pie le lau, nemai ge ningnui â tinggîm gu hegi ramme gum ze pebau kedibe chang di de lei.

¹¹Peize ningnui peume Rapeu Tingwang ne chuna bambe gu gene dêt chang kat riâ bam ra tew gai be lau, zai ningnui je pa ne hatkai’ndibe luigum ze, ningnui je peize ’nnam gai be lau!

¹²’Ndaigum ze ningnui tûdeu gechukbe benai heput keritbe zai ningnui gu ka’nggibe a runne pungtatchi ra lau?

¹³Ningnui kiria ramme chai sui ze, ziemmena kaningchingme, mâ-’nningchime, zai hejeuchime je kelâng le lau, dezai ningnui ruage besuitewme hang I ne sum gai gu lei,’ kacheu de lei.

¹⁴Zai ningnui ne achu kak ze, ‘Nang ne sagaibe ze anui tewrabe ze anui hang yi de lei,’ ze kacheu de lei.

¹⁵Chipau luigum ze ningnui kiria ramme ge besuitewme ziemmena kaningchingme benai hejeuchime je I ne lu lu, ningnui peireige besuitewme chang ra changme gu hereikangmuiteime chang ra haîmuiteime chang ra rengeume gu sipai ge kanguame chang ra kereume gu sipai ge kanguame chang ra zai saibe ramme chang ra ningnui kiria ramme leine ge sum gai bei de lei.

¹⁶Zai chipau ting ge I ne ningnui gu samramme je rang gai ze, ‘Ningnui puiname kakge hetû-herâ bambe ’ngking le lau, zai ziemmena mige pa benai pe sikina kakge mei nune mige pe dage hesang’mpeu bambepeu benai penai kakge mei ze chime peireige peling ne samram gai lau.

¹⁷Samrambe ge ningnui kehung-ka’nrie tew mak ra lei; kecheime benai kedime kuâ ningnui ’ngking ’nsamrap ra lei; ziemmena ju je ningnui hing se lau, samrambe ze â Hera gu daseu; zai ningnui hangge hungzûdibe deu ze â a dage ningnui teiwang gai ra lei, zai I ne chize ’ngking gu lei,’ kacheu de lei.

¹⁸Zai ningnui tewrabe ramme leine chipau ting ge ningnui je I die gai de lei.

¹⁹“Zai Horeb gene anui zuapat te lei, zai Tingwang anui Rapeu ne anui je ranggaibe luigum ze, Amorme gu peloaram ’mbe tatbe ’mpuî ge, chi ningnui ngaube tingkangram kedibe benai mi kehingbe leine tatpela tat te lei; zai Kades-barnea ge anui wangchang gai de lei.

²⁰Zai I ne ningnui je, ‘Tingwang anui Rapeu ne anui je peibe, Amorme gu peloaram ge ningnui wangchang de lei.

²¹Pie le lau, ning suage Tingwang ningnui Rapeu ne heram ze rehei gai ’nde lei; hang ze Tingwang ning peume Rapeu ne ningchu ranggaibe luigum ze chize ’nram le zu lau; hing se lau, zai ningnui duângga ze du bam se lau,’ ze rang gai de lei.

²²Chidadege ningnui ’nteumena a taige wang’nna lu, ‘Anui suage ziemmena lang gai kei lei, chidezai anui hangge penui ne heram pei ra zai anui tat-hangrabe ’mpuî benai anui gutrabe namdi ramme rasam ze anui dage sam teiwangchi le ra hangge zeu,’ acheu ze sa de lei.

²³Chize yi ra gum I ’nning gai de lei, zai hezat ’nsangne gene ningnui ruagene ziemmena hangkereu ze kena I ne lu de lei;

²⁴zai penui ’nreiwang ze peloaram ’mbe hang di de lei, zai Eshkol kâm ge wangchang ze chize ’ntingpierua gai de lei.

²⁵Zai penui ne chipau heram gu mâ-hêrachi gêsa â penui ba ge tei lu anui dage teikeu de lei, zai anui dage sam pungwang dai lu acheu sa ze, ‘Tingwang anui Rapeu ne anui je peibe ze â heramyibe kau de lei,’ kacheu de lei.

²⁶“Acheusede ningnui hangmeu ze, Tingwang ningnui Rapeu gu hingde je ka’nggi de lei;

²⁷zai ningnui gu hetiampaîki lungge ningnui tiaktelum ze acheu sa ze, ‘Anui je Tingwang ne ngaugailakbe ziegene, anui je tew’nsia gai ra Amorme ba ge anui je pei gai ra Ijipram gene pa ne anui je nguapat kai de lei.

²⁸’Ndai ’mbe anui hang gai ra lau? Anui puiname ne anui je sakeheidun gai ze, “Chime â anui suadu di ze tie lei; namdi ramme â di-desang zai keriengdi ze ting tûngteman ze la lei; chipau peireige du Anakme name je chige anui ngau lu de lei,” ze acheu zeu,’ ze kacheu de lei.

²⁹Chidadege ningnui je I ne rang gai ze, ‘’Nringgepuî ze bam se lau, zai penui je hing se lau.

³⁰Tingwang ningnui Rapeu ningnui suage raîtatpeu ne ningnui hangge ’nggi gai gu lei, ningnui mikngau ge pa ne Ijipram ge tew gai gum zeu,

³¹zai aipau bâm chang mak tâne ningnui tebeîtewtatkaibe ’mpuî leine ge pe peu ne pe na je pungbe gum ze Tingwang ning Rapeu ne ningchu pungbe hênamkang ge nang ngaulube luigum zeu,’ ze kacheu de lei.

³²Kane aipau sam seu lu sede Tingwang ningnui Rapeu je ningnui nei mak te lei,

³³ningnui gu hetiampaîki ramme liâmgairabe bâm hangge peu ra ningnui suage ’mpuîki raîtatpeu, ningnui tatrabe ’mpuî ngualia ra tingmuî ge hemi, zai ’nrîmbeting ge kemâu ne kanguapeu jeu.

³⁴“Zai Tingwang ne ningnui sam ramme seu di de lei, zai pa pe lumpum di de lei, zai pa ne deseu gai ze,

³⁵‘Ningnui peume je pei gai ra I deseugaibe yibe heram ze aipau kesiabe rehei gu ziemmena hangkatte ngau ra mak lei,

³⁶Jephunnebe na Kalebbe je sâu ze mî de ngau ra mak lei; pa â chize ngau gu lei, zai pa â Tingwang chai sui’nsangsiaklube ziegene pa tatkai’ndibe heram ze pa benai pe name je I pei gai gu lei!’ kacheu de lei.

³⁷Ningnui ziegene a peireige du Tingwang pe lumpum ze, ‘Nang du chipau heram ge gut ra mak lei;

³⁸Nunbe na Joshuabe, ning masuage sappeu, pa ze â gut ku lei; gecheu gai be lau, Israelme ne chize ’nram le ra pa ne tew gai gu daseu.

³⁹Chipau peireige du ningnui name, heteureime ne tew’nsiagairabe kau ramme, zai ningnui name nemai ge keyi-kesia mâ de ’nningchimakme ne chige gut kû, zai chipau heram ze penui ne ’nram gu lei.

⁴⁰Kane ningnui â ’nreiwang dai ze Kegiebe Sungkling ’mbia tingkangram ’mbe tebeîtewgut dai de zu lau,’ kacheu de lei.

⁴¹“Chidadege ningnui ne a kuâ kak ze, ‘Tingwang dage anui ne hemui gai ’ndi de lei; Tingwang anui Rapeu ne anui je ranggaibe luigum ze anui hang ze herei’nggi gu lei,’ kacheu de lei. Zai ningnui ruage ’mpeumi leine pe gu-gu hereipuâ ramme kaiheretsat kai de lei, zai peloaram ’mbe hangrabe hangge ’nning’nzêu ze bam de lei.

⁴²Zai Tingwang ne a dage rang gai ze, ‘Penui je rang gai be lau, chilia hang se lau, zai herei de herei se lau, ningnui ruage I â bam mak daseu; ningnui teureime masuage ningnui je tewhelêu gai mak ra hangge zeu,’ kacheu de lei.

⁴³Chigum ze ningnui je I rang gai de lei, zai ningnui ne pheumeu tai de lei; kane ningnui ne Tingwang gu samde je ka’nggi de lei, zai ’nnêukau ze peloaram ’mbe hang di de lei.

⁴⁴Chidadege peloaram ge bamme Amorme ne ningnui je ’nggi ra zuapat ze, ’ngkui ramme ne ka’nsabe gum ze ningnui je gua’nsa ze, Seir gene Horma riâ chang ze ningnui je tewkau gai bei de lei.

⁴⁵Zai ningnui helatwang dai ze Tingwang masuage hap te lei; kane Tingwang ne ningnui kuâ pheu gai mak, zai ningnui kuâ ’ngking gai mak tai de lei.

⁴⁶Chigum ze chige ningnui bambe ting ge, Kades ge ningnui beting misongga bam gai de lei.