Read Zeme Naga DEUTERONOMI 10 Bible Online

DEUTERONOMI 10 - Zeme Naga bible

DEUTERONOMI 10

¹“Chipau ting ge Tingwang ne a dage rang gai ze, ‘Keraîbe luîrun ze, tingchudepei kena gia le lau, zai peloa’ntûm ge a dage hang lau, zai hechingbung tew le lau.

²Dezai nang ne tewpâng’ndibe keraîbe tingchudepei kena ge bambe sam ramme I ne tingchudepei kena ge raw gai gu lei, zai chipau kena ze pebung ge nang kai ra lei,’ ze kacheu de lei.

³Chigum ze akasia ching ne mâ-bung I tew de lei, zai keraîbe luîrun ze tingchudepei kena I gia gai de lei, zai a ba ge chipau tingchudepei kena tei lu peloa’ntûm ’mbe hang de lei.

⁴Zai keraîbe luage rawbe gum ze, wangka’nduibe mai ge kedeiloa peireige hemigetaube zuilung gene ningnui dage Tingwang ne ranggaibe samde kereu ze tingchudepei kena ge pa ne raw gai de lei; zai chiramme a dage Tingwang ne pei gai de lei.

⁵Chidadege I ’nreiwang dai ze peloa’ntûm gene wangkeu de lei, zai I ne tewlube mâ-bung ge tingchudepei kena kai de lei; zai Tingwang ne achu diegaibe luigum ze chige chi tingchudepei kena â la lei.

⁶“(Israelme Be-eroth Bene-jaakan gene Mosera ’mbe tebeîtewtat te lei. Chigene Aaronbe chai di, zai chige pechu bai gai de lei; zai pe na Eleazarbe ne pa kelei ge tingku tâ ka’nggua de lei.

⁷Chigene Gudgoda ’mbe, zai Gudgoda gene Jotbatha, heduitering geuki ramme bambe heram ’mbe penui tebeîtewtat te lei.

⁸Chipau ting ge Lebi zat je nemai riâ chang ze Tingwang gu samhatkaibebung pua ra, Tingwang suage sap ze pe guâ ’nggua ra, zai pe ji gene ’nnam gai ra lupatchâm gai de lei.

⁹Chipauziegene Lebibe â pe sikiname dage mâ de hedam benai pe heurâ nguaheurabe ga lei; Tingwang ning Rapeu ne pe suage ranggaibe luigum ze Tingwang ze pe heurâ de lei.)

¹⁰“Keraîbe luage gum ze, hezie hedai zai tingmuî hedai peloa’ntûm ge I bam de lei, zai chipau ting ge du Tingwang ne a kuâ ’ngking gai bei de lei; Tingwang â ningchu tew’nsia nei mak te lei.

¹¹Zai Tingwang ne a dage rang gai ze, ‘Zuachu zu lau, baudime suage raî ze nang tebeîtewbe ge tat zu lau, chidezai penui je pei gai ra penui peume dage hatkai’ndibe heram ’nramchi le ra hangge zeu,’ kacheu de lei.

¹²“Zai chunage Israel gau, Tingwang ning Rapeu je hing ra, pe gu ’mpuî ramme leine ge tat ra, pechu hung ra, ning lung leine ne benai nang keringbe leine ne Tingwang ning Rapeu guâ ’nggua ra,

¹³zai ningnui hang yirabe hangge nemai ge I ne ningchu diegaibe Tingwang gu samdiegaibe ramme benai hingde rawgaibe ramme ze zangno Tingwang ning Rapeu ne ’ndaikau ningnui dage lunei ze kie bei lau?

¹⁴Pie le lau, tinggîm benai tinggîm ge bambe zat ramme zai kedei benai pelung ge bambe leine Tingwang ning Rapeu gu chang lei;

¹⁵acheuleusede Tingwang ne ning peume peireige kehungbe gene pe lung suk kai de lei, zai nemai ge bambe luigum ze penui chângge penui chaname ningnui je miramme peirei gene kelâng gai bei de lei.

¹⁶Chidaze ningnui lung rumgeten le lau, zai hekuâpheumeu ze bam ta zu lau.

¹⁷Tingwang ningnui Rapeu â hera ramme gu Hera zai heguang ramme leine gu Tingwang, pengêudibe, reziechibe, zai mi kehingbe Rapeu, pa â kerut-kelatew mak, zai henim lumakbe Rapeu daseu.

¹⁸Pa ne ’nggiâne benai kemîpuime hangge samram ka’nzeibe ne tâtew lei, zai hesangtew ze bambe kau je pa ne hung ze pe hangge pe gu hetak benai hepaîni pei lei.

¹⁹Chidaze hesang changbe kau je hung lau; ningnui du Ijipram ge hesangme chang ze bam gai daseu.

²⁰Tingwang ning Rapeu je nang hingchi ra lei; nang pe guâ ’nggua zai pechu ’mpêugit bam ra lei, zai pe ji gene nang deseu ra lei.

²¹Pa â ning gu getoabe de lei; pa â ning mik ne ngaulube aipau mâ-kedibe benai mi kehingbe ramme ning hangge tewgaipeu ning Rapeu de lei.

²²Ning paume hangriaksena Ijipram ’mbe wangkeu de lei; zai chunage â Tingwang ning Rapeu ne ningchu tinggîm ge hegi ramme misongga bambe gum ze bam ra tew gai bei de lei.