Read Zeme Naga DEUTERONOMI 11 Bible Online

DEUTERONOMI 11 - Zeme Naga bible

DEUTERONOMI 11

¹“Chidaze Tingwang ning Rapeu je nang hung bam ra, zai pa ne ranggaibe, pe gu hingde rawgaibe ramme, pe gu hingde-sie ramme, zai pe gu samdiegaibe ramme rei ze bam ra lei.

²Zai nemai ge ’nning’mmi gai ni lau (ningnui name chimakme zai ngaumakme dage I sam sa mak daseu), Tingwang ningnui Rapeu ne kaladdeibe, pa pengêudibe, pe ba ranchibe benai getuapatbe ba,

³Pharaobe dage benai pe gu heram leine ge Ijipram ge pe gu ka’nchetbe teiliabe ramme benai pe tatew ramme zeu;

⁴zai Ijipram gu hereikangme dage penui gu hekun ramme benai hekuntimriang ramme dage zeu; ’ndaigum ze ningnui ne penui je guaka’nchube luage Kegiebe Sungkling ne penui je naî mei, zai ’ndaigum ze nemai riâ chang ze Tingwang ne penui je tew’ngga ’ndi mei be zeu;

⁵zai ningnui aipau bâm ge wangchang mak tâne tingkangram ge pa ne ningnui dage tewgaibe zeu;

⁶zai Reubenbe na zai Eliabbe na ’mpeumi hangna Dathanbe benai Abirambe dage pa ne ’ndaikau tew gai mei be zeu; ’ndaigum ze penui je benai penui kiduîme ramme, penui gu hetiampaîki ramme, zai mâ-keringbe penui chai suibe ramme leine je Israelme ruagene kedei ne pe mui ’ngngapat ze ’nzua kam ’ndi mei be zeu;

⁷Tingwang gu tâ kedibe pa tewgaibe leine ningnui mik ne ngau lu daseu.

⁸“Chidaze nemai ge I ne ningnui je diegaibe, samde leine ningnui rei ra lei; dezai ningnui ranchi ra, zai gut ze ningnui heram ’nram le ra tatbe heram ze luchi le ra,

⁹zai tungdui benai ’ngkuidui ne luabe heram ningnui paume benai penui chaname je pei gai ra Tingwang ne hatkai’ndibe heram ge ningnui bamtie le ra hangge zeu.

¹⁰Nang ’nram le ra gutrabe heram ze â, hegineu merie gum ze ning gu helei ling gai lu ning pî ne hedui chaîpatberam, ningnui zuapatbe heram Ijipram gum mak daseu;

¹¹kane ningnui ’nram le ra tatbe heram ze â peloa ramme benai bekâm ramme bambe heram, tinggîm ’mbene tingruikeube gene hedui sakbe heram,

¹²Tingwang ning Rapeu ne ’nningkatinggeube heram lei; patingkum pîbang gene patingkum kamgaibe riâ chang ze Tingwang ning Rapeu mik â chipau heram je pie bam lei.

¹³“Zai Tingwang ningnui Rapeu je hung ra, zai ningnui lung leine ne benai ningnui keringbe leine ne pe guâ ’nggua ra nemai ge ningnui je I diegaibe a gu samde ramme ningnui ne pheu dizai â

¹⁴ning gu chêu zai ning gu wain zai ning gu taudui ramme gekumwangchi le ra hangge, tingrui keuraibe benai ruikeunâbe ze panehîtit ge ningnui gu heram ge tingrui ra pa ne pei gai gu lei.

¹⁵Zai ning gu kaurui hangge, ning gu helu ramme ge reheuneu pat ra pa ne pei gu lei, zai nang teu ze ’nggeugit ze bam gu lei.

¹⁶’Ntîng le lau, ningnui lung je duai mak ra, zai ningnui tatlietat ze kêdabe hera ramme guâ ’nggua ze penui je kellum mak ra,

¹⁷zai Tingwang lumpum ningnui peireige kai bei ze pa ne tinggîm ramme kainam nan ze tingruikeu ta di, zai kedei ne perachî ’nchikeu ta di bam mak ra, zai Tingwang ne ningnui je peibe heram keyibe gene ningnui ga gai kelua mak ra hangge zeu.

¹⁸“Chidaze aipau sam ramme ze ningnui lung benai ningnui keringbe ge kaigekua gai ra lei; zai chiramme ze ningnui ba ge ka’nchetbe gum ze kak kai ra, zai chiramme zene ningnui telie kakbe ria gum ze chang ra lei.

¹⁹Zai ningnui name je chiramme ningnui geteilia ra lei, ning ki ge nang ’ntau ze bambe lua, zai ’mpuîki ge nang tatbe lua, zai nang jeikaugaibe lua benai nang chukadaibe lua chipau rasam ramme penui je salia ra lei.

²⁰Zai chiramme ze ning ki kemuiki chia ramme ge benai ’ngkam ramme ge nang raw gai ra lei,

²¹dezai kedei gene ’nrei ’mbe tinggîm ge bambe zat ramme bam tânege, Tingwang ne ningnui peume dage penui je pei ra hatkai’ndibe heram ge ningnui benai ningnui name kering ting tewpung gai be ra hangge zeu.

²²Ningnui tewrabe hangge I ne diegaibe aipau samde leine ’ntîngteî ze ningnui ne tew, Tingwang ningnui Rapeu je hung, pe gu ’mpuî ramme leine ge tat, zai pechu ’mphêugit ze bam dizai â

²³ningnui suage aipau heramzat ramme leine je Tingwang ne kumtua gai gu, zai ningnui sua â di ze reziechibe heramzatme gu heram ze ningnui ne lu ’ndu lei.

²⁴Ningnui pîdei kagaibe bâm leine ze ningnui gu chang gu lei; ningnui gu heram dei ze â Tingkangram benai Lebanon zai ’Nggeuki, Euphrates geuki gene tingrun ’mbia sungkling riâ chang gu lei.

²⁵Mî de ningnui je tingkangchi ra mak lei; ningnui je pa ne hatkaibe luigum ze Tingwang ningnui Rapeu ne ningnui tatkairabe heram leine peireige peize ningnui je hingrabe benai ningnui je hingkedunrabe kai gu lei.

²⁶“Pie le lau, I ne nemai ge ningnui suage ’nnamgaibe benai kadesetbe kai de lei:

²⁷’Nnamgaibe kacheube ze Tingwang ningnui Rapeu gu samde ramme I ningnui je nemai diegaibe ningnui ne pheu bei zaine, ’nnamgaibe

²⁸zai kadesetbe kacheube ze Tingwang ningnui Rapeu gu samde ramme ningnui sui mak ze kane ningnui chimakbe hera kêdabe ramme chai suitat ra nemai I ningnui je diegaibe ’mpuî gene ’nreitat ti zaine kadesetbe, kacheube lei.

²⁹Zai nang ’nram le ra gutrabe heram ge Tingwang ning Rapeu ne ningchu nguawang gai dezai, Gerizim Loa ge ’nnamgaibe nang kai ra, zai Ebal Loa ge kadesetbe kai ra lei.

³⁰Chipau deiloa ramme ze Jordan ka ze, puidi gene tingrun ’mbia, naimik keu gai ’mbia, Araba ge lungme Kanaanme gu heram ge, Gilgal hiage, More gu ’mpubang taige bam mak mei?

³¹Tingwang ningnui Rapeu ne ningnui je peibe heram ge heram ’nramgutrabe hangge ningnui Jordan geuki kapat ra lei; zai chize ningnui lu lu chipau heram ge lung dezai,

³²nemai ge I ne ningnui suage kaibe hingde rawgaibe ramme benai hingde-sie ramme ’ntîngteî ze ningnui teitatew ra lei.