Read Zeme Naga DEUTERONOMI 12 Bible Online

DEUTERONOMI 12 - Zeme Naga bible

DEUTERONOMI 12

¹“Airamme ze kedeirei ge ningnui lung ze bam tâne heram ’nram ze bam ra Tingwang ning peume Rapeu ne ningchu peigaibe heram ge ’ntîngteî ze ningnui tew ze bamrabe hingde rawgaibe ramme benai hingde-sie ramme de lei.

²Kedeiloa kehube ramme ge benai peloa’ntûm ramme ge zai hingbang ka’ndiakbe bang kang leine ge ningnui heram lurabe heramzat ramme ne penui gu hera ramme guâ ka’ngguabe bâm ramme leine ningnui tew’nsia himchang ra lei;

³ningnui ne penui gu herâtewbe kaira ramme tewpâng ze tewkau gai ra, zai penui gu tingchusum ramme tewhitruai gai ze penui gu Asherah luî ramme hemi ne rû ra lei; ningnui ne penui gu hera ramme luî tewbe ramme gechiakau gai ra, zai chipau bâm gene penui ji dibe tew’nsia gai ra lei.

⁴Tingwang ningnui Rapeu je â chigumbe ningnui tew gai mak ra lei.

⁵Kane chige pe ji tew’ndi gai ze chige pa bambe bâm hang tew gai ra ningnui gu hezat ramme leine ruagene Tingwang ning Rapeu ne kelânggairabe bâm hangge ningnui peu ra lei; chilia ’mbe nang tat ra lei,

⁶zai chilia ’mbe ningnui gu rûkambe-râtewbe benai herâtewbe peipatbe ramme, ningnui gu kereu ge kat ramme benai ningnui kela peipatbe, ningnui gu hatkailube peibe ramme, ningnui gu hesuiyibe peipatbe ramme, zai ningnui gu kebuidung benai melidung ruage lungkeuraibe peipatbe ramme ningnui teiwang ra lei;

⁷zai chige Tingwang ningnui Rapeu suage ningnui mâ-teu ra lei, zai ningnui tâtewgaibe leine ge Tingwang ning Rapeu ne ningchu ’nnamgaibeibe ziegene chige ningnui benai ningnui kiduîme ramme leine hesuiyi’nta ra lei.

⁸Ziemmename leine pe runne mikngau ge ka’nzeibe tewbe aige nemai anui tewtatbambe luigum ze ningnui tew mak ra lei;

⁹Tingwang ningnui Rapeu ne ningnui je peibe gesaube ge benai heram ge ningnui wangchang mak kerei daseu.

¹⁰Kane ningnui Jordan kapat lu, zai ningnui nguaheu ra Tingwang ningnui Rapeu ne peibe heram ge lung dezai, zai ningnui je lungguâbe ningnui teureime dagene pa ne ningnui je gesaube pei gai ze ’nningkatenangbe ’ngga ze ningnui lung dezai,

¹¹chige pe ji bam bam de ra Tingwang ningnui Rapeu ne kelânggai-gaibe bâm ge, chilia ’mbe ningnui je I ne diegaibe leine ningnui teitat ra lei: ningnui gu rûkambe-râtewbe ramme benai ningnui gu kaurui peipatbe ramme, ningnui gu kereu ge kat benai ningnui ne peipatbe kela ramme, zai Tingwang dage ningnui hatkailube peipatbe ramme leine chilia teiwang gai ra lei.

¹²Zai Tingwang ningnui Rapeu suage ningnui suiyi’nta ra lei, ningnui benai ningnui name ’mpeumi zai ’mpuimi ramme, ningnui guâ ka’ngguame ramme ’mpeumi ramme benai ’mpuimi ramme, zai Lebi zat kau, pa â ningnui dage pe dam benai pe heurâ gabe ziegene ningnui gu namdi ramme ge lungbe kau, ’nteumena hesuiyi’nta ra lei.

¹³Nang ne ngaube bâm ’nsangne ge ning gu rûkambe-râtewbe ramme nang peipat kai mak ra ’ntîng le lau;

¹⁴kane ning zatme hangkat gu kedei lungge Tingwang ne kelânggairabe ge, chige ning gu rûkambe-râtewbe ramme nang peipat kai ra lei, zai I ne ningnui je die gai ze bambe leine chige nang tew ra lei.

¹⁵“Acheusede, Tingwang ning Rapeu ne ningchu ’nnamgaibe peigaibe luigum ze nang ne nei tâne mâ-gîchat ze nang hemei teu dui lei; ’nchimakbe kau ziemmena du zai ka’nchibe kau du helung ji benai heti ji gumbe hemei ji â teu dui lei.

¹⁶Hejai ze ningnui teumakrabe runne lei; hedui gum ze chize â kedei ge ningnui ruîpat kai ra lei.

¹⁷Ning gu namdi ramme lungge ning gu hemeurachî mei nune wain mei nune taudui mei be gene kereu ge kat peibe mei, nune ning gu kebuidung mei nune ning gu melidung mei be ruagene lungkeuraibe ramme mei, nune nang ne hatkailube ning gu hatkaibe peipatbe ramme mei, nune ning gu hesuiyibe peipatbe ramme mei, nune ning gu kela peipatbe mei be â nang teu mak ra lei;

¹⁸kane Tingwang ning Rapeu ne kelânggaibe bâm ge Tingwang ning Rapeu masua gene, nang benai ning na ’mpeumi benai ’mpuimi, ning guâ ka’ngguapeu benai ka’ngguapui, zai ning gu namdi ramme ge bambe Lebi’mpeu je nguateu ra lei; zai nang tâtewbe leine ge Tingwang ning Rapeu masuage ning suiyi’nta ra lei.

¹⁹Ning ram ge nang lung tânege Lebime je nang sâu gai mak ra ’ntîng le lau.

²⁰“Tingwang ning Rapeu ne ningchu hatkaibe luigum ze pa ne ning gu heramrai tew’ndi gai ze, zai nang hemei teuneibe ziegene, ‘I hemei teu gu lei,’ ze acheu dezai, nang ne teu nei-neibe riâ nang teu dui lei.

²¹Tingwang ning Rapeu ne pe ji kairabe hang ziegene kelânggaibe bâm ze ning hangge deuzû dizai â I ne ningchu diegaibe luigum ze, Tingwang ne ningchu peibeibe ning gu kebuidung mei nune melidung mei be ruagene nang gîchat dui lei; zai nang ne teunei-neibe riâ ning gu namdi ramme lung gene nang teu le dui lei.

²²Helung ji benai heti ji teube gum ze, chize du nang teu dui lei; ’nchimakbe kau benai ka’nchibe kau du chize teu le dui lei.

²³Hejai ze â nang teu mak ra lei be runne chî’nchichiak le lau; hejai ze keringbe daze hemei ji ge keringbe merua ze nang teuherua mak ra lei.

²⁴Chize nang teu mak ra lei; hedui gum ze kedei ge chize nang ruîpat kai ra lei.

²⁵Chize nang teu mak ra lei; chidezai Tingwang mikngau ge ’ndaibe ze ka’nzei mei be nang ne tew bei dezai, nang benai ning name hechai lungleîme hangge yi ze tat bam le ra hangge zeu.

²⁶Kane ka’nchibe merua ramme ning dagene ngaubambe benai nang hatkailube peipatbe ramme ze â, nang ne tei lu Tingwang ne kelânggaibe bâm ’mbe nang tat ra lei,

²⁷zai Tingwang ning Rapeu gu herâtewbe-kaira ge hemei benai hejai ze rûkambe-râtewbe peipat kai ra lei; ning gu herâtewbe peipatbe ramme gu hejai ze â Tingwang ning Rapeu gu herâtewbe-kaira ge ruîpat kai ra lei, kane hemei ze â nang ne teu le dui lei.

²⁸I ne ningchu diegaibe aipau sam ramme leine kuâ pheu le ra chî’mmi le lau, dezai Tingwang ning Rapeu mikngau ge keyibe benai ka’nzeibe nang tewbe gene nang benai ning name hechai lungleîme hangge betingbeta yi ze tat bam le ra hangge zeu.

²⁹“Nang gut ze heram sutlerabe heramzat ramme je ning suage Tingwang ning Rapeu ne tew’ngga gai dezai, zai nang ne penui ram lu lu penui ram ge lung dezai,

³⁰ning suagene penui je tew’nsiagaibeibe chângge penui chai sui ra ningchu nîm mak ra, zai penui gu hera ramme dagene nang ‘’Ndaigum ze aipau heramzat ramme ne penui gu hera ramme guâ ka’nggua rei lau? —chigum ze I du tew le ra hang,’ ze acheu ze mâ-’mmêt mak ra hangge ’ntîng le lau.

³¹Tingwang ning Rapeu dage chigum ze nang tew gai mak ra lei; Tingwang ne ngaugailakbe, mi katenetbe leine, penui gu hera ramme hangge penui â tew gai daseu; penui â penui gu hera ramme hangge hemitew’ntaugaibe ge penui na ’mpeumi ramme benai ’mpuimi ramme je ’nsangdu hemi ge rû gai lei.

³²“Ningnui je I ne diegaibe leine tew ra ningnui chî’mmi ra lei; chige nang ne kaisî mak ra, zai chigene lutua mak ra lei.