Read Zeme Naga DEUTERONOMI 13 Bible Online

DEUTERONOMI 13 - Zeme Naga bible

DEUTERONOMI 13

¹“Ningnui ruage kemeu’mpeu mei nune hemang ramme ka’mmipeu mei ze zuapat ze, zai mâ ka’nchetbe mei nune ’nningdaulakbe tâ mei be ze ningchu pei gai lêuzai,

²zai mâ-ka’nchetbe mei nune ningdaulakbe tâ mei be pa ne ningchu rangliabe wangchang ze, zai pa ne nang mâdau chimakbe, ‘Kêdabe hera ramme chai anui sui kei lei, zai penui guâ anui ’nggua kei lei,’ acheu dizai â

³chipau kemeu’mpeu mei nune chipau hemang ramme ka’mmibepeu mei be gu sam ramme je nang ’ngking mak ra lei; Tingwang ningnui Rapeu je ningnui lung leine ne, zai ningnui keringbe leine ne ningnui hung mei be chî le ra Tingwang ningnui Rapeu ne ningnui je kakedak daseu.

⁴Tingwang ningnui Rapeu chai ningnui sui ze pechu hingchi ra, zai pe gu samdiegaibe ramme reî ze pe kuâ pheu ra, zai ningnui pe guâ ’nggua ze pechu ’mphêugit ze bam ra lei.

⁵Kane chipau kemeu’mpeu mei nune chi hemang ramme ka’mmibepeu mei je â, nang tatrabe ’mpuî hangge Tingwang ningnui Rapeu ne diegaibe gene peize nang tatliederabe hangge, Ijipram gene ningnui je nguapatkaipeu zai kebang-changbeki gene ningnui je meupatkaipeu, Tingwang ningnui Rapeu je ’nggi ra pa ne geteiliagaibe ziegene, pechu â tewchat ra lei. Chigum ze ning dagene kesiabe nang gechaîtua ra de lei.

⁶“Ning sikina’mpeu ning pui ne lungkeube na mei, nune ning na ’mpeumi mei, nune ’mpuimi mei, nune ning nâu nang kehungpui mei, zai nang keringbe gum ze bambepeu ning kangpeu mei ne ningchu duai ze reine ze, ‘Tat ze kêdabe heram ramme guâ anui ’nggua kei lei,’ ze mâdau nang mei nune ningnui peu mei ne chimakbe,

⁷kedei mik katlam gene kêdabe mik katlam riâ ning dagene na zai deu zai ningnui hiage bambe bâm gu hera ramme hanggesame je acheu dizai â

⁸pe kuâ nang pheu gai mak ra, zai pechu ’ngking gai mak ra, zai ning mik ne pechu ngau’nggia gai mak ra, pechu nang gesut kai mak ra, zai pechu nang ’nggum gai mak ra lei;

⁹kane pechu nang tewchat ra lei; pechu tewchatrabe hangge ning ba ne raîlangbe chang ra, zai bechâng ge ziemmena leine ba ne tew gai ra lei.

¹⁰Kebang-changbeki gene, Ijipram gene ningchu nguapatkaipeu Tingwang ning Rapeu dagene ningchu tei’mbia ’nde ra pa peube ziegene tingchu ne nang pechu tuâchat ra lei.

¹¹Zai Israel zat leine ne chize seu lu hing gu lei, zai aigum ze tâ-kesiabe ningnui ruage mâtew-tewsede tew dai ra mak lei.

¹²“Tingwang ning Rapeu ne nang lung ra peigaibe namdi ramme ruage namdi kat ge,

¹³’nchuimakbe kau ramme hanggesame ningnui ruage pat ze chipau namdi ge lungme je ngualietat ze, mâdau de ningnui chimakbe sa ze, ‘Anui tat ze kêdabe hera ramme guâ ’nggua kei lei,’ kacheube ningnui seu dizai â

¹⁴nang ’mmêt ra, zai peurua ra, zai ’nneu’mmi ra lei; zai pie le lau, ningnui ruage chigumbe mi ngaukatenetbe tâtew gai ze la de lei be gesang zai peling chang dizai â

¹⁵chipau namdi ge lungme je nang ne hiazutkie ne bichat ze, namdi ze tew’nsia kam gai ze, chige lungme leine benai kaurui ramme je hiazutkie ne bichat kam gai ra lei.

¹⁶Chipau namdi gu hereichâ leine keloa’ndi zuilung ge nang teiwang’ndui gai ra lei, zai Tingwang ning Rapeu dage rûkambe-râtewbe chang ze, namdi benai pe gu hereichâ leine hemi ne nang rû ra lei; chize â, betingbeta hangge tew’nsia’ndibe tûm chang gu lei, chipau namdi â tew’nsapchu gai dai ra mak lei.

¹⁷Peipatkaibe merua kat te ning ba ge ’nnai ra mak lei; dezai Tingwang ne pa pe lumpumbe gene heli dai ze, ningchu ngau’nggia ze, zai ning peireige ka’nggia bam zai ningnui peume dage pa hatkai’ndibe luigum ze ningchu tewpung gai be ra hangge zeu,

¹⁸nang ne Tingwang ning Rapeu kuâ pheu ze, nemai ge ningchu I ne diegaibe pe gu samdiegaibe leine tei ze, zai Tingwang ning Rapeu mikngau ge ’ndaibe ze ka’nzei mei be tew dizaine ai.