Read Zeme Naga DEUTERONOMI 14 Bible Online

DEUTERONOMI 14 - Zeme Naga bible

DEUTERONOMI 14

¹“Ningnui â Tingwang ningnui Rapeu name lei; ningnui runne ningnui je tewjâm mak ra, zai kechaime hanggene ningnui peî’nning-tam du gut mak ra lei.

²Nang â Tingwang ningnui Rapeu hangge ka’nchibe chang daseu, zai kedeirei ge ziemmena leine ruagene Tingwang ne ningchu â pe gu chang ra kelâng lu de lei.

³“Ngaukatenetbe merua â nang â teu mak ra lei.

⁴Airamme ze ningnui teuleduibe hekaubena ramme de lei: Getumsei, meli, kemei,

⁵heti, helung, rehiê, hênam gu kemei, ibeks kemei, helung cheibe zai peloaram gu meli airamme zeu.

⁶Hekaune pe pî’nchîn ramme benai pe pî’nchîn pângbe pungbe ramme leine zai hekaune ruage pe mui gene telatpat dai ze satteube leine ningnui teu dui lei.

⁷Acheuleusede chi pe mui gene telatpat dai ze satteube zat ramme, zai pa’nchîn pângbe pungbe ruage put-hu, saibeza zai ’ntuk, airamme â ningnui teu mak ra lei, penui ze telatpat dai ze satteube zat ramme kam de lei, kane penui ’nchîn pângmakbe ziegene airamme ze ningnui hangge kahebâbe chang lei.

⁸Zai kebak ze â pa’nchîn pâng, kane telatmakbe ziegene ningnui hangge ’nchimakbe chang lei. Penui pumji ningnui teu mak ra, zai penui gu herum ze ningnui deîtau mak ra lei.

⁹“Hedui lungge bambe kau ramme ruage airamme ningnui teu dui lei: Pa’nrang ramme benai pelip ramme pungbe kau leine â ningnui teu dui lei.

¹⁰Zai pa’nrang ramme benai pelip ramme pungmakbe kau leine â ningnui teu mak ra lei; chize â ningnui hangge ’nchimakbe chang lei.

¹¹“’Nruine ka’nchibe kau ramme leine â ningnui teu dui lei.

¹²Kane airamme ze ningnui teu mak ra lei: kelie, lawai, heduiruî,

¹³keliengdi, ’ngkauliene, chiramme je ka’nzuâbe ramme;

¹⁴’nggek benai pechu ka’nzuâbe;

¹⁵ostrikruî, bielong, sungklingruî, hepatlie, chiramme je ka’nzuâbe zat ramme,

¹⁶hebie cheibe benai dibe, hedui ge bambe ’nruî,

¹⁷zai pelikanruî, herumlawai zai heduidepam,

¹⁸teluâk, setieruî zai chiramme je ka’nzuâbe zat ramme; langpuângruî benai heliam.

¹⁹Zai mâkâupui pekan pungbe ramme leine â ningnui hangge ’nchimakbe chang lei; chiramme â teu mak ra lei.

²⁰Pekan pungbe ka’nchibe zat ramme leine â ningnui teu dui lei.

²¹“Perunne chaibe leine â ningnui teu mak ra lei, chize â ning gu namdi ramme ge bambepeu hesang’mpeu je nang pei gai dui lei, dezai pa teu ra hangge zeu, makchai hesang’mpeu dage nang zua gai dui lei; Tingwang ning Rapeu hangge nang â ka’nchibe kau daseu. “Kemei poine je pe pui tungdui gene nang lang mak ra lei.

²²“Patingkum ’nsangne ning gu helu gene mâ-hîmra patbe leine kereu ge kat kai ra lei.

²³Zai pe ji chige bam ra pa ne kelânggaibe bâm ge Tingwang ning Rapeu suage, ning gu hemeurachî gene, ning gu wain gene, zai ning gu taudui gene, zai ning gu kebuidung benai melidung ruagene bepoine lungkeuraibe ramme gene kereu ge kat kaibe ze nang teu ra lei; dezai Tingwang ning Rapeu je hingrabe tak nang chî ze bam le ra hangge zeu.

²⁴Zai tebeîkak ning hangge deuran di, Tingwang ne ningchu ’nnamgaibe luage, kereu ge kat nang teiwangchi lak tizai â, Tingwang ne chige pe ji bam bam ra kelânggaibe bâm ze ning dage deuzûdibe ziegene

²⁵nang chize rangkâng hang tew gai ra lei, zai ning ba gene rangkâng ’nzumtei lu, Tingwang ning Rapeu ne kelânggaibe bâm ’mbe tat ra lei,

²⁶zai nang ne nei-neibe ’nchui ge rangkâng teitatew gai ra lei, getumsei ramme ge mei, meli ramme ge mei, wainge mei nune hezau peranchibe ge mei, nang ne tewgainei-neibe ge zeu; chige Tingwang ning Rapeu suagene nang benai ning kiduîme teu ze hesuiyi’nta ra lei.

²⁷Zai ning gu namdi ramme lungge bambepeu Lebi’mpeu je nang sâu gai mak ra lei, pa â pe dam benai pe heurâ ning dage ga daseu.

²⁸“Kum chum kam gai tânege chipau kum gu (pakechumbe kum gu) nang ngaulube gene kereu ge kat ning gu namdi ramme ge teiwang’ndui gai ra lei;

²⁹zai Lebi’mpeu pa â pe dam ga zai pe heurâ ning dage gabe kau changbe ziegene, pa benai hesangme, ’nggiâne, zai kemîpuime, ning gu namdi ramme ge lungme leine wang ze teu’nggeuting gai ra lei; chidezai Tingwang ning Rapeu ne nang tâtewbe leine ge ningchu ’nnam gai be ra hangge zeu.