Read Zeme Naga DEUTERONOMI 15 Bible Online

DEUTERONOMI 15 - Zeme Naga bible

DEUTERONOMI 15

¹“Tingkum sena kamgaibe ’nsangne ge ’mpatkaibe lun-gaibe tâ ze nang pei kam gai ra lei.

²Zai ’mpatkairabe tak ze aize lei: hepukkaime leine dage pa ’ndaikau hepuk kai ’ndi mei be lun gai ne ra lei; pe ramna’mpeu, pe sikina’mpeu dagene pa ’nchi-chine kie mak ra lei, Tingwang ne kelunbe ze saba gai ’ndi daseu.

³Hesang’mpeu dage nang kie dui lei; kane ning kiduî’mpeu dage ning gu ’ndaikau la mei be ze â nang kiesau de ra lei.

⁴Kane ningnui ruage lungchulakbe kau bam ra mak lei (heram ’nram ra hangge Tingwang ning Rapeu ne ningchu peigai’ndibe heram ge Tingwang ne ningchu ’nnam gai gu daseu),

⁵Tingwang ning Rapeu kuâ nang pheu ze, chipau hingde ramme leine ’ntîngteî ze tew ra nemai ge ningchu I samdiegai’ndibe ze tew dizaine ai.

⁶Tingwang ning Rapeu ne ningchu ’nnam gai gu lei, pa ne ningchu samhatkai’ndibe luigum zeu, zai heramzat misonggame je nang hepuk kai ra lei. Kane nang â hepuk mak ra lei; zai heramzat misonggame peireige nang ne rezietei gu lei, kane ning peireige penui ne rezietei ra mak lei.

⁷“Ningnui ruage kelaksiabe kau, ning puiname ruage hangkat, Tingwang ning Rapeu ne ningchu peigaibe heram lungge namdi ramme kat ge de, ning sikiname kelaksiabe kau dage ning lung tew’nchi gai ra mak zai ning ba ting gai mak ra lei,

⁸kane pechu ning ba diliâ gai ra lei, pa ne ka’nnangbe hangge kegeuga ze ’ndaikau zat mei zai du nang hepuk kai ra lei.

⁹‘Hepâu leine ’ngkapkairabe tingkum, pasenabe kum na de lei’ ze acheu ze pechu nang mâ-mâ hepuk kai ra ngaurau se lau. Aigumbe lungningtak kesiabe ning lung ge peize gut se lau. Nang ne hepuk kai leu ra ngaurau dizai â, ning peireige pa kelaksiabe ne Tingwang dage pe kuâ pat kai bei ze nang kemaupeu chang gu lei.

¹⁰Pechu nang ’ntane pei ra lei, zai pechu nang pei dezai ning lung sia bam mak ra lei; Tingwang ning Rapeu ne ning tâ leine ge zai nang ne tewgaibe leine ge ningchu ’nnam gai gu lei.

¹¹Kelaksiabe kau â heram gene mâdau de sau ra mak daseu; chidaze ningchu I samdiegaibe heram ge ning kiduî’mpeu, kegabe kau dage, benai kelaksiabe kau dage ning ba peipat ’ndi gai ra lei.

¹²“Ning sikiname, Hebrai’mpeu mei nune Hebrai’mpui mei je ning dage zua gai lêuzai â, pa kum seruk ning guâ ’nggua ra lei, zai pasenabe tingkum ge ning dagene peize pa tat te ra nang ’mpat kai ra lei.

¹³Zai pechu ning dagene tat te ra nang ’mpat kai dezai, pe barua tat ra pechu nang pei gai mak ra lei;

¹⁴ning gu melidung ruagene, ning gu kechaîpung gene, zai ning gu grepchî niakbe pung gene, ning raidi ze nang peipat ra lei; Tingwang ning Rapeu ne ningchu ’nnamgaibe gum ze nang pechu pei ra lei.

¹⁵Ijipram ge nang kebang changbe, zai Tingwang ning Rapeu ne ningchu meupatkaibe nang chibam ra lei; chipauziegene nemai tingnaimikpui ge aize ningchu I samdie gai lei.

¹⁶Kane pa ne ning dage bamyi di ze, zai nang benai ning kibaume je ‘Ning dagene I zuapat ra mak lei,’ ze pa ne ningchu acheu lêuzai â,

¹⁷nang ne tebutpoine tei lu ’ngkam gene pe kun ze tei’nda gai lu rawput kai ra lei, dezai pa ze betingbeta ning gu kebang chang ra de lei. Zai ning gu kebangpui peireige du chigum ze nang tew gai ra lei.

¹⁸Nang ne pechu ’mpat kai nan sedu ning hangge hereu ra mak ku lei; puîwangbe kebang mî pa’mpi riâ pa ne kum seruk riâ ning guâ ’nggua gai ’ndi daseu. Chigum ze Tingwang ning Rapeu ne nang tewgaibe leine ge ningchu ’nnam gai gu lei.

¹⁹“Ning gu getumdung benai melidung gene lungkeuraibe besei leine Tingwang ning Rapeu dage nang diepat’nchi gai ra lei; ning gu getumdung ruage lungkeuraibe ze â nang teitatew mak ra lei, ning gu melidung ruagene lungkeuraibe ze â pe gêu chiap mak ra lei.

²⁰Nang benai ning kiduîme leine tingkum ’nsangne ge Tingwang ne kelânggairabe bâm, Tingwang ning Rapeu suagene chize nang teu ra lei.

²¹Kane chize heziâk bam di mei pe pî sia mei nune pe mikchit mei dizai â, zai mâ-mâge heziâk bam’ndi-desang dizai â, chize Tingwang ning Rapeu dage nang herâtew gai mak ra lei.

²²Ningnui gu namdi lung gene chize nang teu dui lei; zai chize helung mei nune rehiê mei ze teube gumbe gene chize herâtewbe sie gene ka’nchime benai ’nchimakme teu kam dui lei.

²³Nang teumakrabe ze â pe jai ze lei; chize kedei ge hedui gum ze nang ruîpat kai ra lei.