Read Zeme Naga DEUTERONOMI 16 Bible Online

DEUTERONOMI 16 - Zeme Naga bible

DEUTERONOMI 16

¹“Abib kêu ze reibam lau, zai Tingwang ning Rapeu gu tat’ntuahengi reibam lau; Abib kêu ge Ijip gene tingmuîzeu gene Tingwang ning Rapeu ne ningchu nguapat daseu.

²Zai tat’ntuahengi gu peipatbe herâtewbe Tingwang ning Rapeu dage getumdung gene mei nune melidung gene mei ze, Tingwang ne pe ji bamrabe bâm hang kelânggaibe bâm ge peipat kai ra lei.

³’Nduihîkaibe tingku chige tew mak ra lei; hezie senane chi ’nduihîkaimakbe tingku, deisabe gu tingku benai teu ra lei—Ijipram gene kelua ze nang pakpat daseu—nang keringbe ting leine ge Ijipram gene nang zuapatbe chibam ra lei.

⁴Ning gu heram lung leine ge hezie senane lungge â ’nduihî ngau mak luisui ra lei; raîlangbe tingnaimikpui hegî ge herâtewbe gu hemei ze hechua riâ bamchang mak ra lei.

⁵Tingwang ning Rapeu ne ningchu peigaibe namdi ramme lungge mâ-mâge de tat’ntuahengi gu herâtewbe nang peipat kai mak ra lei;

⁶kane Tingwang ning Rapeu ne pe ji bamrabe bâm hang kelânggairabe bâm ge nang tat’ntuahengi gu herâtewbe peipat kai ra lei, hegî tingnaimik keube hî, Ijip gene nang zuapatbe hî gezeu.

⁷Zai chize nang lang lu ze Tingwang ning Rapeu ne kelânggairabe bâm gene nang teu ra lei; zai hechua dezai nang ning gu hetiamki ramme ge wang dai ra lei.

⁸Hezie serukne ’nduihîkaimakbe tingku nang teu ra lei; zai pasenabe tingnaimikpui ge Tingwang ning Rapeu dage wangka’nduibe pengêudibe bam ra lei; chipau mai ge nang tâtew mak ra lei.

⁹“Nang ’ntakkak sena sei ra lei; ’ntakkak sena ze nang dekuîmeu bang ge ’ngkuaine ne râmgairaîlangbe mai gene seichu ra lei.

¹⁰Chidezai Tingwang ning Rapeu ne ’nnamgaibeibe luigum ze ning ba gene kela ’ntapeipatbe rehâ ramme tei lu ’ntakkak-ngi ze Tingwang ning Rapeu dage nang reibam ra lei;

¹¹zai nang benai ning na ’mpeumi zai ’mpuimi zai ning guâ ka’ngguapeu benai ning guâ ka’ngguapui, ning gu namdi ramme ge Lebime ning dage bamme, tebeîtew-wanggaime, bepeu-game, zai kemîpui ningnui ruage bamme je ngua lu ze, Tingwang ning Rapeu ne pe ji bam ra tewgaibe bâm hang kelânggaibe bâm ge, Tingwang ning Rapeu suage nang ning suiyi’nta ra lei.

¹²Ijip ge nang kebang changbambe nang chibam ra lei; zai ai hingde rawgaibe ramme ze rei’mmi ra ’ntîng ra lei.

¹³“Hezie senane hetiampaîki-ngi nang reibam ra lei, ning gu grepchî niakbe bâm benai dekuîmeu neibe pung gene nang gekumwang’ndui dezai neu;

¹⁴nang benai ning name rehangme, heleume, ning guâ ka’ngguapeu, ning guâ ka’ngguapui, Lebi’mpeu, tebeîtew-wanggaime, pe peu game zai ning gu namdi ramme ge kemîpui bamme ning gu luube-bâm ge hesuiyi’nta ra lei.

¹⁵Tingwang ne kelânggairabe bâm ge nang hezie senane Tingwang ning Rapeu suage luube-bâm tew gai ra lei; Tingwang ning Rapeu ne, nang ne tewpatbe rachî benai ning ba tatew leine ge ningchu ’nnam gai gu lei, dezai nang ngua ning suiyi ra hangge zeu.

¹⁶“Tingkum kat ge luachum â ning ki ge ’mpeumi leine â, pa ne kelânggairabe bâm ge Tingwang ning Rapeu suage liâ ra lei: ’nduihîkaimakbe-ngi ge, ’ntakkak gu hengi ge, zai hetiamki-ngi gezeu. Tingwang suage penui barua ze penui liâ mak ra lei;

¹⁷Tingwang ningnui Rapeu gu ’nnamgaibe ningchu pa ne peibeibe luigum ze, ’mpeumi leine pa ne dauduî-duîbe riâ kela ze pei ra lei.

¹⁸“Tingwang ning Rapeu ne ningchu peigaibe namdi leine ge, ning zatme riak luigum ze samramme zai tâka’ngguame je nang sum gai ra lei; zai penui ne ziemmename je samram kapelingbe gene samram ra lei.

¹⁹Samramka’nzeibe nang tewkedet mak ra lei; kehung-ka’nrietewbe tak nang teilia mak ra lei; zai nang henim luteu mak ra lei, henimluteube â kaningchingbe mik tewchit lei, zai kapelingbe tatew je tewkakeleu lei.

²⁰Samramka’nzeibe zai samramka’nzeibe runne nang sui ra lei, dezai Tingwang ning Rapeu ne ningchu peigaibe heram ze nang ’nram le ra, zai nang ring le ra hangge zeu.

²¹“Tingwang ning Rapeu gu herâtewbe bâmra nang tewgairabe hiage Asherah luî hang mâ-chia du sum gai mak ra lei.

²²Zai Tingwang ning Rapeu ngaugailakbe tingchusum nang sum gai mak ra lei.