Read Zeme Naga DEUTERONOMI 17 Bible Online

DEUTERONOMI 17 - Zeme Naga bible

DEUTERONOMI 17

¹“Tingwang ning Rapeu dage getumsei mei nune meli mei heziâkbambe, mâ-mâ ge kesiabe bambe ne â nang herâtew gai mak ra lei; chize Tingwang ning Rapeu hangge ngaukatenetbe daseu.

²“Ningnui ruage Tingwang ning Rapeu ne ningchu peigaibe ning gu namdi ge Tingwang ning Rapeu mikngau ge pe gu samhatkaibe tew’nsia ze kesiabe tewbe kau,

³zai kêdabe hera ramme guâ ’nggua zai I ne kenambe ramme naimik, hekêu, zai tinggîm ge bambe ramme, chiramme je kakellumbe ngaudau mei,

⁴zai ningchu pau gai bei ze nang seu mei zai â nang ’mmêt’mmi ra lei, zai aigum ze ngaukatenetbe Israelme ram ge tew gai ’nde lei be gesangsing dizaine â,

⁵aigum ze ’mpeumi mei, ’mpuimi mei ze kesiabe tewbe kau je â ning gu keriekemui ramme ge nang nguapat ra lei, zai chipaupeu benai chipaupui je tingchu ne nang tuâchat ra lei.

⁶Sakki hangna ne mei nune, sakki hangchum ne mei chigaihâbe gene chairabepeu je tewchat ra lei; sakki hangkat gu sam gene â hangkat je de tewchat mak ra lei.

⁷Pechu tewchat kai ra hangge sakkitewpeu ba ne pe peireige pat kai raî ra lei, chipau châng dezai ’nteumena ba pat ra lei. Chigum ze ningnui ruagene nang mâ-kesiabe lutua ra lei.

⁸“Ning gu namdi lungge mâ-mâ hetû-hera ramme hejai tûdeu kena kakge mei zai besie ka’ngkui-ka’nzei deu kakge mei nune hegei keleupatbe tûdeu kakge mei be pat ze râm’nchi gai ra ’nnang dizai â Tingwang ning Rapeu ne kelânggairabe bâm ’mbe nang zuachu lu hang ra lei,

⁹zai Lebi kiria tingkume dage, zai chipau ting ge samrambeki ge samramme dage nang wang lu, penui je ’mpau ra lei, dezai penui ne samriagaibe ze ningchu ranglia gu lei.

¹⁰Chidezai chi Tingwang ne kelânggairabe bâm gene ningchu penui ne ’ndaikau ranglia mei be luigum ze nang tew ra lei; zai penui ne ningchu rang’nzeigaibe leine luigum ze tew ra ’nning’mmi ra lei;

¹¹penui ne ningchu gechiauliâbe ramme luigum ze, zai samriakeugaibe penui ne ning dage sabagaibe luigum ze nang tew ra lei; penui ne ningchu samsabagaibe samde gene hezat’mbia mei nune heku’mbia mei ze nang kelik kai mak ra lei.

¹²Chige tâ’nggua ra Tingwang ning Rapeu masuage sappeu tingkupeu kuâ mei nune samrampeu kuâ mei ze pa ’ngking mak ze kengang ze tâtew dizai â, chipaupeu ze chai ra lei; chigum ze Israelme ruagene nang mâ-kesiabe ramme lutua ra lei.

¹³Zai ziemmena ’nteumena ne seu gai lu ze hing gu lei, zai kengangpat dai ra mak lei.

¹⁴“Tingwang ning Rapeu ne ningchu peigaibe heram ge nang wang ze, chize ’nram lu chige lung dezai, ‘A peireige heguang I sum gai gu lei, achu bamguabe heramme gum zeu,’ ze nang acheu gu lei;

¹⁵ning peireige heguang hang Tingwang ning Rapeu ne kelânggairabe kau je nang sum gai dui lei. Ning puiname ruagene hangkat je ning peireige heguang hang nang sum gai ra lei; hesang’mpeu, ning puina’mpeu-makbe kau je â ning peireige sum gai mak ra lei.

¹⁶Pe hangge hekun ramme tewpung mak ra, zai hekun ramme tewpungrabe hang ziegene ziemmename je Ijip ’mbe lang gai mak ra lei, Tingwang ne, ‘Ningnui je chipau ’mpuî mâtew-tewsedu ningnui helatwang dai mak ra lei,’ ze salia gai ’ndi daseu.

¹⁷Zai pe hangge pe nâu misongga tewpung mak ra lei, pe lung kelitat mak ra hangge zeu; zai gechâk benai gepût du pe hangge misongga ze pa tewpung mak ra lei.

¹⁸“Zai pe gu heguangram gu heguang-bamrâ ge pa ’ntau dezai aipau hingde ze pe hangge leisikuak ge raw gai ra lei, Lebime zat tingkume rezieteime dageneu,

¹⁹zai chize pe dage bam ra lei, zai chige pe gu keringbe ting tâluî kai ra lei, dezai aipau hingde zai aipau besie-hingde ramme gu sam ramme teika’mmibe gene, zai chiramme tewbe gene pe Wang pe Rapeu je hingchi le ra hangge zeu;

²⁰zai pe puiname peirei gene pe lung keditew mak ra hang, zai hingde gene hezat’mbia mei nu, heku’mbia mei ze pe lung ’nriktat mak ra hangge zeu; chidezai pe gu heguangram ge pa bamtie ra, pa benai pe name, Israel ge bamtie le ra hangge zeu.