Read Zeme Naga DEUTERONOMI 18 Bible Online

DEUTERONOMI 18 - Zeme Naga bible

DEUTERONOMI 18

¹“Lebi zat tingkume, chize Lebime zat leine â, Israelme dage penui dam benai penui heurâ bam mak ra lei; penui â Tingwang dage hemi gene peipatbe kela gene teu ra, zai pe gu dam ze teu ra lei.

²Penui puiname ruage penui heurâ bam mak ra lei; Tingwang ze penui heurâ de lei, pa ne penui je samhatkaibe gum zeu.

³Zai aize baudime dagene tingkume je peirabe de lei, herâtewbe peipatbe geneu, getumsei mei nune meli mei zeu; penui ne tingkume je pe putloa zai pe biapi kena zai pebâbungpui pei ra lei.

⁴Ning gu hemeurachî keraîbe, grepchî dui keraîbe mâ-châdui keraîbe gene, zai ning gu meli gene pegêu chiappatraibe ze pechu nang pei ra lei.

⁵Tingwang ning Rapeu ne pechu ning zatme ruagene Tingwang ji gene ’nggua ze sap ra pa benai pe na ’mpeumi leine je betingbeta hang kelângpat kai ’ndi daseu.

⁶“Zai Lebi zat hangkat Israelram ge mâ-mâ ge pa lungbe bâm ning gu namdi ruage namdi kat gene Tingwang ne kelânggairabe bâm ge ’nchâlai ze wang gai dizai â

⁷Tingwang suage pezatme Lebime leine chige tâ’nggua ra sapchume gum ze Tingwang pe Rapeu ji gene pa tâ’nggua dui lei.

⁸Pe ki heurâ zualube ngaube peirei gene pa du chige penui gu hedam ’nsamrap ze teu ra ngau ra lei.

⁹“Tingwang ning Rapeu ne ningchu peibeibe heram ge nang wang dezai, chime heramzatme gu ngaukatenetbe tatew ramme sui ra heli mak ra lei.

¹⁰Ningnui ruage mige pe na ’mpeumi mei nune pe na ’mpuimi je herâtew ze rube kau, mige hedachakpiebe kau, kakemeume mei, nune mâ-gekibe kau mei,

¹¹nune heduaîchime mei, nune gekungme mei, nune heduaîtewme mei, nune heduaî sam sachime mei, aigumbe kau ramme je ningnui ruage peize bam mak ra lei.

¹²Mi-mige aipau tâ ramme tewbe kau ze â Tingwang hangge ngaukatenetbe kau lei; zai aigumbe ngaukatenetbe tewbe ramme ziegene Tingwang ning Rapeu ne penui je ning sua ’mbe kelitua ’ndi de lei.

¹³Tingwang ning Rapeu masua gene nang hetiak ga ra lei.

¹⁴“Ningnui ne lu’nderame aipau heramzat ramme ze â gekungme benai hekî-kime je ka’ngking de lei; kane ningchu â Tingwang ning Rapeu ne ningchu chigum tew ra pheu mak lei.

¹⁵“Tingwang ning Rapeu ne kemeu’mpeu I gumbe kau je nang nguabamme ning puiname ruagene teichu gai gu lei—pe kuâ ningnui ’ngking ra lei—

¹⁶Horeb ge ka’nduibe mai ge Tingwang ning Rapeu dagene nang ne ’nning’nchâlai-gai’ndibe luigum zeu, ‘Tingwang a Rapeu kuâ peize I seu dai ta lau ze mei nune ai hemi kedibe peize I ngau dai ta lau, I chai mak ra hangge zeu,’ ze acheu ze nang sagaibe luage zeu.

¹⁷Zai Tingwang ne achu rang ze, ‘Penui ’nteumena ne sabe ze gesang ne penui sa de lei.

¹⁸Penui hangge kemeu’mpeu nang gumbe kau penui puiname ruagene I teichu gai gu lei; zai pe mui ge a sam ramme I kai gu lei, zai pa ne penui je I samdiegaibe leine paulîa gu lei.

¹⁹Zai a sam ramme pa a ji gene saliarabe ramme ’ngkingmakme je â I ne pe dagene chî dai gu lei.

²⁰Kane kemeu’mpeu I ne pechu paulîa ra samdiegaimakbe a ji gene sa ra tewbe kau mei nune kêdabe hera ramme ji gene pauliabe kau je â chi kemeu’mpeu gîm ze chai gu lei,’ kacheu de lei.

²¹Zai nang ne ning lung gene, ‘’Ndaigum ze Tingwang ne saliamakbe sam lei be chî le ra lau?’ ze acheu sa dizaine â—

²²kemeu’mpeu ne Tingwang ji gene sam sa gai dezai chipau sam ze wangchang mak mei nune gesang mak mei zai â, chize â, Tingwang ne saliabe sam mak te lei; chi kemeu’mpeu zene pe sui-sui ne sa de lei, nang pechu hing ra ’nnang me lei.