Read Zeme Naga DEUTERONOMI 19 Bible Online

DEUTERONOMI 19 - Zeme Naga bible

DEUTERONOMI 19

¹“Penui gu heram ze Tingwang ning Rapeu ne ning hangge peigai’ndime chime heramzatme je Tingwang ning Rapeu ne tewkau gai bei ze nang ne penui je kumtua lu penui gu namdi ramme ge benai penui ki ramme ge bam dezai,

²Tingwang ning Rapeu ne ningchu ’nram ra peibe heram ge namdi kechum â nang lupatchâm gai ra lei.

³’Mpuî kedibe ramme nang teleu gai ra lei, zai Tingwang ning Rapeu ne ning heurâ hang peibe heramdei ze dau chum ’nzipâng gai ra lei, chidezai ziemmena je kegîme mi-mige chiramme ge pak’mbiagaichi le ra hangge zeu.

⁴“Aize ziemmena je kegîme hangge pezeu hang peigaibe lei, chilia pa pak’mbiagaibe gene kechai’nreipatlerapeu hangge zeu. Mige pe ramna’mpeu je tewmaube gene besua’ngka ge pe dage hetianggaibe ’ngga ze tewchat nan ze —

⁵chize mige hênamkang ’mbe pe ramna’mpeu je ngua lu heching kuî ra zuamiebe luagene, heching kuî ra pe ba huakeube gene ’nrei kun pe ba gene duakpat ze pe kining’mpeu je tuatâu bei ze pa chai dizaine â chipau namdi ramme ruage kat ge pa pak kai ze, zai pa ringpat dui lei;

⁶chi lei makchai â, ’mpuîki tiedibe ziegene hejai kûm ruîbepeu ne pe lumpum-kadesangbe gene ziemmena je kegîpeu je ’nsachang lu chipaupeu ne chaikezei mak leusedu pungchai ra hang â tewjâm gai bei ta du lei, besua’ngka gene chipaupeu ze pe ramna’mpeu dage hetiang gai le mak daseu.

⁷Chipauziegene namdi kechum nang diepatchâm gai ra I ningchu samdie gai lei.

⁸Zai Tingwang ning Rapeu ne ning peume je deseugai’ndibe luigum ze pa ne ning gu herai ze kengeî’ndipat kai bei, zai pa ne ning peume dage hatkai’ndibe heram pelane ningchu pei gai bei zai â—

⁹nemai ningchu diegaibe ze Tingwang ning Rapeu je hung ze pe gu ’mpuî ge tatbe gene aipau samde pelane nang ne ’ntîngteî ze reî’mmi gai dizai—aipau namdi kechum bambe peireige nang ne kêdabe namdi kechum baugaisuâ gu lei,

¹⁰Tingwang ning Rapeu ne ning ram hang peigaibe heram ge pemâugame jai peize tewpat kai mak ra hang zai chigum ze ningchui ge pemâugame jai tewpatkaibe chang mak ra hangge zeu.

¹¹“Kane mige pe ramna’mpeu je ngauhemimeu ze, pechu rikkua lu, pechu bêuchat ra bêuhejam gai bei pa chai di, zai chipaupeu zene ai namdi ramme ruage namdi kat ge pak kai dizai â

¹²pe gu namdi ge gechîngme ne ziemmena lang gai bei ze chigene pechu nîmwang dezai hejai kûm lurapeu dage pechu peipat kai ra lei, chidezai pa chai ra hangge zeu.

¹³Pechu nang ngau’nggia mak ra lei, kane pemâugame jai ze Israelme ram gene nang tew’ngga ne ra lei, chidezai ning hang yi gu lei.

¹⁴“Tingwang ning Rapeu ne ningchu heram tei ra peibe, nang ne ’nramrabe heram ge ning ram huâzie ge bambepeu gu heramrai chukâng puikeli se lau, tingtie gechîngme ne sumgaibe zeu.

¹⁵“Mige hangkat ne tâ-kesiabe tewgai’ndibe ge mei zai pe gu hemâu-hemâ deu ge mei, chige hangkat gu sakki ne kam ra mak lei; sakki kena kechum bambe ge runne tâtew gai ra lei.

¹⁶Mi tegarâsiabe gene mi hangkat peireige kesia’ndam gai ra sakki hang pat tizai â,

¹⁷penui hetû ge bau na ze Tingwang suage benai tingkume zai samramme, chipau ting ge samrambeki ge bamme suage saplia ra wang ra lei;

¹⁸samramme ne ’mmêt’mmizun gai ze, chi sakki ze karasa sakki lêuzai â, zai karasa ne pe kinapeu peireige tâtew lei dizai â

¹⁹pa ne pe kinapeu peireige tewgairabe tak luigum ze pe peireige ningnui tew gai ra lei, chigum ze ningnui dagene kesiabe zat ze â nang tew’ngga ne ra lei.

²⁰Zai kêdame leine ne seu lu hing gu lei, zai ningnui ruage aigumbe kesiabe mâdau tew dai ra mak lei.

²¹Nang ne ngau’nggia gai mak ra lei; chize â keringbe ne keringbe hang, hemik ne hemik hang, hegeu ne hegeu hang, heba ne heba hang hepî ne hepî hang ra lei.