Read Zeme Naga DEUTERONOMI 2 Bible Online

DEUTERONOMI 2 - Zeme Naga bible

DEUTERONOMI 2

¹“Chidadege Tingwang ne achu ranggaibe luigum ze, anui helatwang kadai de lei, zai Kegiebe Sungkling ’mbia tingkangram ’mbe anui tebeîtew gut te lei; zai tingnaimikpui misongga ze Seir deiloa anui rua-rua de lei.

²Chidadege Tingwang ne a dage rang gai ze,

³‘Aipau peloaram ze ningnui ruaguâ’ntie-sang de lei; tingpeî ’mbia helattat dai de zu lau.

⁴Zai ziemmena ramme je acheu ze rang gai lau, ningnui puiname Esaube name Seir ge lungme gu heram dei ningnui tatpelatat zi gu de lei; zai ningnui je penui hing gu lei. Chidaze ’ntîng lau;

⁵penui je ’nggi se lau; penui gu heram katte ningnui je I pei ra mak daseu, mak lei, mi pîpa kagairabe dei langbe ’nsangdu pei ra mak lei, Esaube je I ne Seir deiloa ze pe ram chang ra peigai’ndibe ziegeneu.

⁶Ningnui teurabe hetak hangge rangkâng ne penui dagene ningnui lui ra lei; zai ningnui sakrabe hangge hedui ze du rangkâng ne ningnui lui ra lei.

⁷Ning ba tatew leine ge Tingwang ning Rapeu ne ningchu ’nnam gai bei daseu; aipau tingkangram kedibe ge nang tatkapelabe ze pa â chî lei; aipau tingkum hedai Tingwang ning Rapeu ne ning dage nguabam bei de lei; ning hangge mâ de ga mak ze bam de lei,’ ze kacheu de lei.

⁸Chigum ze anui tat’nduâ ze anui puiname Esaube name Seir ge lungme dagene kedeu ’mbe Araba ’mpuî gene Elath benai Ezion-geber gene kedeu ’mbe tat ti de lei. “Zai anui helatwang ze Moab gu tingkangram ’mbia tatzua ze tat ti de lei.

⁹Zai Tingwang ne a dage rang gai ze, ‘Ar namdi ze Lotbe chaname dage penui ram hangge I ne peigai’ndibe ziegene penui gu heram katte nang ’nramrabe hangge ningchu I pei gai ra mak daze Moab je tewhereu se lau, zai herei ne penui je ’nggi se lau,’ kacheu de lei.

¹⁰(Tingtie’ngkage â Emim, peranchi zai kie-kadesangbe zat, zai Anakme gum ze penui kaurayibe zat chige lung de lei;

¹¹Anakme je gum ze penui je du Rephaimme ze ku lei, kane Moabme ne penui je Emimme ze ku lei.

¹²Besua’ngka ge â Seir ge Horme du lung gai de lei, kane Esaube name ne kumtua lu penui ruagene chime je tew’nsia ’ndi de lei, zai chime bâm ge penui ne lungleî ’ndi de lei; Israelme ne Tingwang ne penui ka’nrambe heram hang penui je peigaibe heram peireige tew gai gum zeu.)

¹³‘Chunage zuachu zu lau, zai Zered geuki kapat te zu lau,’ kacheu de lei. Chigum ze Zered geuki anui kapat te lei.

¹⁴Zai Kades-barnea sâu ze tattibe gene Zered geuki anui kapatbe riâ chang ze, rehei luî, chize, Tingwang ne penui dage deseugaibe luigum ze, kahereibe gu ziemmena penui gu tejeîki gene ga kammakbe riâ chang ze tatbe ge tingkum himreu ze desat ’nnang di lei.

¹⁵Penui ga de mak tâne penui gu sieki gene penui je tew’ngga ’nde ra Tingwang ne pe ba ne penui je ka’nggi sing daseu.

¹⁶“Chigum ze hereizeuchibe ziemmena ga gai kam di, zai ziemmena ruagene penui chai kam di dege,

¹⁷Tingwang ne a dage rang gai ze,

¹⁸‘Nemai ge Ar ge Moabram herai ze nang tatpela ra lei;

¹⁹zai Ammon name gu heram ’mpahia nang wang dezai, penui je tewhereu se lau, zai penui je ’nggi se lau, ning gu heram hangge Ammon name gu heram ze katte ningchu I pei gai ra mak daseu; chize â Lotbe name hangge I ne peigai’ndibe ziegeneu,’ ze kacheu de lei.

²⁰(Chi deze Rephaimme dei ze du ku de lei; Rephaimme besua’ngka ge chige lung de lei, kane Ammonme ne penui je Zamzumme ze ku lei,

²¹peranchi zai kie-kadesangbe ziemmena zat lei, Anakme gum ze penui kaurayi lei; kane Ammonme masua gene Tingwang ne chime je tew’ngga ’ndi de lei; zai Ammonme ne penui ram sut ’ndi de lei; zai penui ram ge lungleî ’ndi de lei;

²²Seir ge lungme Esaube name hangge penui masuage Horme je pa ne tew’ngga nan ze, zai penui ram sut lu ze, nemai riâ chang ze chige lungleî ze lung bam ra pa ne tew gai bei gum zeu.

²³Gaza riâ chang ze keloa ramme ge lungme Abbimme deu geze â Kaphtorram gene wangme, Kaphtorme ne penui je â tew’ngga lu penui bâm ge lungleî ’ndi de lei.)

²⁴‘Zuachu ze ningnui tebeîtewtat zu lau; Arnon geuki kam tat’ngkapat zu lau; pie le lau, Heshbon gu heguang, Amor’mpeu Sihonbe benai pe ram ze ningnui ba ge I ne pei gai ’nde lei; heram sut chu zu lau, zai penui je herei zu lau.

²⁵Nemai ge tingkehube kangge bambe ziemmename peireige ningchu tewhingrim gai ra zai kehingbe bam ra I ne kai chu gu de lei, ning rasam penui seu lu dezai ning ziegene penui kedun ze lunghereu ze bam gu lei,’ ze kacheu de lei.

²⁶“Chigum ze desieyibe sam ne Heshbon gu heguang Sihonbe dage Kedemoth tingkangram gene hepâupaume je I ne lang gai ze, acheu rang gai lei,

²⁷‘Ning gu heram I tatpela ra pei lau; puidi ge runne I tat ku lei, hezat’mbia du, heku’mbia du I tatkelik kai ra mak lei.

²⁸I teu ra rangkâng hangge tak nang ne achu zua gai ra de lei, zai I sak ra rangkâng hangge hedui nang ne pei gai ra de lei; a pî ne tatpela sâng tatpela gai ra achu pei lau,

²⁹Seir ge Esaube name benai Ar ge Moabme ne, anui Rapeu Tingwang ne anui je peigaibe heram ’mbe tat ra I Jordan tattua mak tânege a peireige tewgaibe gum zeu,’ ze acheu zeu.

³⁰Kane Heshbon gu heguang Sihonbe ne pe dagene tatpela ra anui je lûn mak te lei; nemai riâ chang ze bambe gum ze ning ba ge Tingwang ne pechu peigaichi le ra hangge Tingwang ning Rapeu ne pe lung tingkisi bam ra zai hekuâpheumeube lung pung ra tew gai bei de lei.

³¹Zai Tingwang ne a dage rang gai ze, ‘Pie le lau, Sihonbe benai pe ram ze ning dage pei’nderabe hangge I ne tew chu gai de lei; pe ram ze ningnui ne ’nraklerabe hangge heram sut chu zu lau,’ ze kacheu de lei.

³²Chidadege Jahaz ge anui je herei ra Sihonbe benai pe gu ziemmename leine zuapat te lei.

³³Zai pechu Tingwang anui Rapeu ne anui ba ge pei gai bei de lei; zai pa benai pe name zai pe gu ziemmename leine je anui ne ngam lu de lei.

³⁴Zai chipau ting ge anui ne pe gu namdi ramme leine sut kam lu ze, namdi leine, ’mpeumi, ’mpuimi, zai napoine ramme leine je tew’ngga kam gai ’ndi de lei; mî je du anui ’nsak kai mak te lei;

³⁵hereichâ hangge kaurui ramme benai namdi ramme gene sutlube merua ramme runne anui hangge lu gai de lei.

³⁶Arnon kâm betun-gaibe ge bambe Aroer gene, zai bekâm zuilung ge bambe namdi gene Gilead riâ changbe ze, anui hangge hungzûdibe namdi katte ga de lei; Tingwang anui Rapeu ne pelane anui ba ge pei gai bei de lei.

³⁷Ammon name gu heram ge runne ningnui wang’nna mak te lei, chize â Jabbok geukung leine benai peloaram gu namdi ramme leine, zai Tingwang anui Rapeu ne nam’ndibe bâm ramme runne de lei.