Read Zeme Naga DEUTERONOMI 20 Bible Online

DEUTERONOMI 20 - Zeme Naga bible

DEUTERONOMI 20

¹“Nang ning reime je herei ra zuapat dezai hekun ramme benai hekuntimriang ramme, zai hereikangme ning gu suadu kie ze bambe ngau dezai penui je nang hing ra mak lei; Tingwang ning Rapeu Ijipram gene ningchu nguapatpeu ning dage la daseu.

²Zai ningnui herei ra wang’nna dezai tingkupeu ne zuapat lu ze baudime je ranglia gai ra lei,

³‘’Ngking le lau, Hei Israelme gau, nemai ge ningnui reime je herei ra wang’nna gai de lei: ningnui lung keheu se lau; penui je hing se lau zai kedun se lau, zai penui je aipau tehing-hing se lau;

⁴Tingwang ningnui Rapeu ningnui teureime peireige ningnui je hereigaihâ ra, zai ningnui je nguaduigaihâ ra ningnui dage pa zene nguatatpeu daseu,’ ze acheu zeu;

⁵chipau chângge tâ-muipuame ne baudime dage acheu ze sa gai ra lei, ‘Châu heki karchibe tewchu lu ze diepat’nchigaimakbe kau la lau? Peize pe ki lam tat dai zu lau, makchai â, herei gene pa chai gai di dezai chipau ki ze miramme ne diepat’nchi gai nan ta du de lei.

⁶Châu grepchî merie tew gai lu ze pechî raiteumaktaibe kau la lau? Peize pe ki lam’mbe tat dai zu lau, makchai â, herei gene pa chai gai di dezai chipau rachî ze miramme ne raiteu nan ta du de lei.

⁷Châu kelaktew ra rangchak kai lu ze kelaktew mak taibe kau la lau? Peize pe ki lam’mbe tat dai zu lau, makchai â, herei gene chai gai di dezai miramme ne pechu nguakelaktew nan ta du lei,’ ze acheu zeu.

⁸Zai tâ-muipuame ne baudime je acheu ze salia gai peî ra lei, ‘Châu hing-desang zai pe lung kakeheube kau la lau? Peize pe ki lam tat dai zu lau, makchai â, pe kangpeu lung du pe lung gum ze pe suilam hang ga gai di ta du lei,’ ze acheu zeu.

⁹Zai pemuipuame ne hereikangme je mâ-saliarabe sa kam gai lu dezai baudime je nguarame hangge ziemmena je sum gai ra lei.

¹⁰“Namdi je ’nggi ra nang zuawang dezai chige keyibe sam ne ’mpau lau.

¹¹Zai penui ne ningchu yine ze ’mpau ze ningchu lat kai bei dizai â chige bamme ziemmena leine ne ning gu kebang chang ze ning guâ ’nggua ra lei.

¹²Kane ning dage penui ne mâ-keyibe tew mak ze ningchu tingkangpat tizai â, chipau namdi ze nang tuaguâ ra lei;

¹³zai Tingwang ning Rapeu ne chi namdi ning ba ge pei gai dezai chige bamme ’mpeumi leine je tewchat kam ne ra lei,

¹⁴kane ’mpuimi ramme, napoine ramme, kaurui zai kêdadabe namdi lungge bambe merua leine ze â hereichâ hang gum ze ning hangge tei ra lei; zai ning teureime gu merua ramme leine Tingwang ning Rapeu ne ningchu peigaibe leine ze nang ne ning suî’nning gene tew ze tei ra lei.

¹⁵Chipau luigum ze kêdadabe namdi ramme ning dagene kedeu ’mbe bamdibe ramme peireige du tew lau, aige bamme gu namdi ramme peireige mak zeu.

¹⁶Kane Tingwang ning Rapeu ne ning heurâ hang peigaibe aime gu namdi ramme ge mâ-keringbe zat leine ze nang ’nzuak kai mak ra lei,

¹⁷kane penui, Hethme, zai Amorme, Kanaanme, Perizme, Hibme, zai Jebusme je tewchat kam ne ra lei, Tingwang ning Rapeu ne ningchu samdiegaibe luigum zeu;

¹⁸chidezai penui râ ramme ze kengaube ge mi katenetbe tatew tak ramme penui tewbe luigum ze ningnui je penui ne peize getei gai mak ra, zai chigum ze Tingwang ningnui Rapeu je ningnui ne ’nggi ra peize penui ne ningnui je tew gai mak ra hangge zeu.

¹⁹“Nang namdi lu ra namdi tuaguâ ze herei’ntie hang dezai chige nang ’nrei tei lu ze hingbang ramme tew’nsia ra mak lei; perachî â nang raiteu dui lei, kane pebang â nang kuîkau ra mak lei. Heram ge hingbang ramme bambe ze ziemmena semei, nang ne tuaguâ ze tew’nsia ra hangge zeu?

²⁰Namdi je duîpatlerabe riâ chang mak tâne namdi je ’nggi ra ning gu herei hangge ka’ngngâbe hereikerietau hangge chi hingbang teumakbe rachî bang lei be nang ne chibe bang ramme runne tew’nsia ze kuî le dui lei.