Read Zeme Naga DEUTERONOMI 21 Bible Online

DEUTERONOMI 21 - Zeme Naga bible

DEUTERONOMI 21

¹“Tingwang ning Rapeu ne nang ne tei ra peigaibe heram ge mige ’nduloa ge chai ze tuâ laleu ze, châu ne pechu tewchat kai mei be chî mak tizai â,

²ning gu gechîngme benai samramme ne zuapat lu ze tewchat’ndibe pum ’nchui gene chu ze chipau hiage heram bambe kak ze ’ndeu ra lei;

³zai kechai pum ngaudaube bâm gene bam’nna langbe keloa gu gechîngme zene mâdau du tâtewteigaimakbe zai guangkam luakkaimakbe getumpoine tei ra lei.

⁴Zai chipau heram gu gechîngme ne peningkâm helu tâtewgaimakbe bâm heduiluabe bâm ge getumpoine teikeu lu chi peningkâm gene getumpoine guang dâng ra lei.

⁵Zai tingkume, Lebime chaname chige zuapat ra lei, Tingwang ning Rapeu ne pe guâ ’nggua ra, zai Tingwang ji gene ’nnamgaibe tâ tewrua ra, zai hetû-deu leine benai kakeleube deu ramme râm ra penui je kelâng gai ’ndi daseu.

⁶Zai kechaipum bambe bâm gene bam’nnalangbe keloa gu gechîngme leine ze getumpoine penui ne peguang dâng’ndibe pum peireige penui ba’ntik kai ra lei;

⁷‘Zai anui â chipaupeu je gî me lei, zai châu ne tewchat mei be chî me lei.

⁸Tingwang gau, ning gu Israelme, Ijip gene nang ne meupatkaibeime je lun gai lau. Anui je lun gai lau, zai pemâugapeu je kegîbe ze anui tâ hangge ’ndam gai se lau,’ ze acheu gai ra lei.

⁹Chigum ze ningnui ruagene pemâugapeu jai tewpatbe mâu ze nang lutua ra lei, Tingwang mikngau ge ka’nzeibe tâ ningnui tewgaibe luage zeu.

¹⁰“Nang ning reime je herei ra zuapatbe ge, Tingwang ning Rapeu ne ning ba ge penui je pei gai bei ze nang ne penui je kebang hang tei dezai,

¹¹zai chime ruage ’mpuimi heleu yibe kau je nang ngau lu pechu ’nchâ ze ning nâu hang pechu lunei dizai â

¹²pechu ning ki lam nguawang ra lei, zai pa pe peî gut ra, zai pa’nchîn riatua ra lei.

¹³Zai pa pe gu kebangpuâ kaibe ze luaktua nan ze ning ki ge pa rêu ze bekêu tâluî pe pui benai pe peu je heu ze bam ra lei; chipau châng dezai pe dage nang ’nna gai ze pe napeu nang chang ra lei; zai pa ning nâu chang ra lei.

¹⁴Bechâng pechu nang ne ’nchâ ta dizai â, pa ne tatnei-neibe bâm ’mbe tat ra peipat kai ra lei; kane pechu nang rangkâng hangge zua gai mak ra lei. Nang ne pechu tewkengamgai’ndibe ziegene pe peireige tewnei-neibe tak tew mak ra lei.

¹⁵“’Mpeumi mige pe nâu hangna bambe ge hangkatpui je pa hung zai kêdapui je pa ngaugailak lei, zai penai hangna ne pe na hang napoine ramme lungkeu gai lei, pa ngaugailakpui benai pa kehungpui hangna zeneu, zai chige meraibe ’mpeumi napoine ze pa ne ngaugailakpui gu chang di lêuzai,

¹⁶pa ne pe heurâ ramme pe name hang ka’nzibe mai ge pa ngaugailakpui ne lungkeube meraibe napoine hangge peize changgailakbe ziegene pa kehungpui je lungkeuraibe na hangge pa teigaichi lak lei,

¹⁷kane pa ne ngaugailakpui na chi meraibe zene pe peu ranchi patraibe changbe ziegene pe gu kebambe leine pechu pa dau na pei gai ze pechu chî gai ra lei; lungkeuraibe na gu dam singbe ze â pe gu de lei.

¹⁸“Ziemmena mige pe na ’mpeumi napoine pe lungchi zai tingrak, pe pui benai pe peu kuâ pheu mak, penai ne deiliâ bei sedu penai kuâ ’ngkingmakbe kau bam dizai â

¹⁹pe pui benai pe peu ne pechu tei lu ze pa lungbe bâm gu keriekemui ge pe ram namdi gu gechîngme tailam pechu nguapat kai ra lei.

²⁰Zai penai ne heram ge besuitewme je ‘Ai anai na â pe lungchi zai katingrak lei, pa â anai kuâ du pheu mak lei; pa â mâ-teusua zai wain meneuchibe kau lei,’ ze acheu ze salia ra lei.

²¹Chidezai â heram lungge bamme ’nteumena ne tingchu ne pechu tuâchat ne ra lei; aigum ze nang ningnui ruagene mâ-kesiabe tew’ngga ne ra lei; chidezai Israelme leine ne seu lu hing gu lei.

²²“Zai mige pechu sâchat ’nde ra yidibe tâ-kesiabe kedibe pa ne tew gai bei, zai pa chai di, zai pechu nang ne hingbang ge keî’nchie gai bei lêuzai â,

²³hingbang ge pe pum ze bamtingba ra pei mak ra lei, kane chipau mai gîm ge nang pechu ritbai ne ra lei, ziemmena keîka’nchiepeu je â Hera ne ngaugailak tâ zeu; Tingwang ning Rapeu ne ningchu heram tei ra peibe nang ne tewhebâ gai mak ra lei.