Read Zeme Naga DEUTERONOMI 22 Bible Online

DEUTERONOMI 22 - Zeme Naga bible

DEUTERONOMI 22

¹“Ning sikina gu getumsei mei nu meli mei ze tatlietattibe ngaudau lêuzai â ’mmangmi ze bam se lau, chize ning sikina tailam teimie dai ra lei.

²Zai pa ne ning taige bamdau mak mei, nune nang ne pechu chî mak mei dizai â, nang ne ning ki ge kumwang gai lu ze ning sikina ne chize peuwang mak tâne ning dage peize bamkuâ ra lei; chidezai nang pechu pei dai ra lei.

³Zai chigum ze pe gu hekunmerângne peireige nang tew gai ra lei; chigum ze pe paîni peireige du nang tew gai ra lei; chigum ze ning sikina gu mâ-mâ kerua tew’ngga’ndibe nang ne ngaudaube peireige du tew ra lei; ’ngngâgailak ze nang bam mak ra lei.

⁴Ning sikina gu hekunmerângne mei nune getumsei mei ’mpuîki ge kâugaibe ngaudau lêuzai â ’mmangmi ze bam se lau; pechu ’ngngâ ze teichu gai dai be lau.

⁵“’Mpuimi ne ’mpeumi kaibe paîni kai mak ra, zai ’mpeumi ne ’mpuimi kaibe paîni kai mak ra lei; mi-mige du airamme tewbe kau â, Tingwang ning Rapeu mikngau ge katenetbe kau zat chang de lei.

⁶“Hingbang ge mei nu kedei ge mei ’nruipoine chip ge bepoine ramme mei nune pebûm benai bepui mei bambe ge nang wangdau gai zai â bepoine je lube ge bepui je lu’mpam ra lei;

⁷bepoine ramme ze â lu dui kane bepui je â ’mpat kai ne ra lei; chidezai ning hang yi gu, zai nang ringtie gu lei.

⁸“Nang heki karchibe tew dezai heki’mpûm ge bekung diegua gai ra lei, chidezai mige kâukeu mei lêuzai du ningchu kesia’ndam gai mak ra hangge zeu.

⁹“Ning gu grepchî merie ge nang helei zat na ling gai se lau, nang linggaibe ning gu mâ-hîmra benai grepchî merie gene ’nchipatbe ramme ze peize Tingwang ki hangge ’ntakû gai mak ra hangge zeu.

¹⁰Getumsei benai hekunmerângne teiherua lu ze nang kedei pu mak ra lei.

¹¹Mâ-gêulang benai linen ne dakkakebutbe paî nang bâ mak ra lei.

¹²“Ning paîtûn mik medai ge perui herui gai ra lei.

¹³“Ziemmena mige ’mpuimi je pe nâu hang lu lu ze ’nrai gai lu, zai pechu tuâpat dai ze,

¹⁴pe luilung kesiabe hangge ’ndam gai ze pe ji tew’nsia ze acheu sa ze, ‘I aipau pui je lu lu pechu ’nrai gai dege pe dage leusangka’nchibe zat bambe I chîdau mak lei,’ ze acheu sa lêuzai â,

¹⁵’mpuimi peu benai pe pui ne pa katimsangbe chî ra mâge â teiliarabe zat hangge tei lu ze namdi keriekemui ge gechîngme bamme dage zuamie ra lei;

¹⁶zai ’mpuimi peu ne gechîngme je aigum ze salia ra lei, ‘I ne aipaupeu nâu hang a na ’mpuimi je pei gai de lei, zai pechu pa ne lugailak lei;

¹⁷zai pie le lau, pe peireige tew’ngngam ze kesia’ndam gai lei, acheu sa ze, “Ning na ’mpuimi dage pa leusangka’nchibe zat bambe hangge I chîdau me lei,” acheu zeu. Acheusede a na ’mpuimi â katimsang lei be sakki aige la lei,’ acheu zeu. Zai penai ne namdi ge gechîngme suage paî rapat ze kam gai ra lei.

¹⁸Chidezai gechîngme ne ’mpeumi je tei lu ze pechu lak ra lei;

¹⁹zai penui ne gepûtgeî haî kat pe dagene ’nzuakie ra lei, zai chipau rangkâng ze ’mpuimi peu je pei gai ra lei, Israelme leusang ka’nchime peireige pa ne heji tew’nsiagaibeibe ziegeneu; zai pa ze pe nâu chang ra lei; zai pe gu keringting tâluî pechu tatuâ dai mak ra lei.

²⁰Kane kesia’ndamgaibe, ’mpuimi dage katimsangbe ngaupat me lei dizai â

²¹penui ne ’mpuimi je pe peu ki hekikegeu ’mbe nguawang gai lu ze chige bamme keloa ge ’mpeumi ramme ne tingchu ne pechu tuâchat ne ra lei, pa ne pe peu dage bambe ting ge kahemabe tâ tew ze Israelme ruage heji siabe tâ tewgaibeibe ziegeneu; chidaze aipau kesiabe ze ningnui dagene tew’nchi ra lei.

²²“Ziemmena mige miramme nâu dage jeibe ngaudau lêuzai â penai hangna chai ra lei, ’mpeumi benai ’mpuimi zeu; chigum ze Israelram ge mâ-kesiabe nang tew’ngga ra lei.

²³“’Mpeumi mige heleu ka’nchipui kelaktew ra rangchakkailube kau je namdi gene hedau lu ze tâ-kesiabe pechu nguatew dizai â

²⁴penai je namdi keriekemui gene hela ’mbe nguapat lu, penai hangna je tingchu ne ningnui tuâchat ne ra lei. ’Mpuimi ze chai kezei lei, namdi ge pa bam lu ze miramme pe kuâ seurabe hang pechu ’ngngâ ra ’nrunggaimakbe ziegeneu; zai ’mpeumi ze du pa ne pe kining’mpeu nâu je tewka’nsiabe ziegeneu; ningnui ruagene aipau kesiabe tâ zat nang tew’ngga ra lei.

²⁵“Kane kelaktew ra rangchakkaibe heleu’mpui je namdi hela gene ngauhedau lu pechu nîm lu ’mpeumi ne pechu tew’nsia dizai â ’mpeumi je runne tewchat ra lei.

²⁶Kane ’mpuimi peireige â, kesiabe mâ de tew mak ra lei; pa â pechu tewchatkairabe hemui tâ tewbe ga daseu, aipau tedeu ze â ziemmena mige ne pe kining’mpeu je chuichua ze, kegîbe gum chang daseu;

²⁷keloa hela ge ’mpeumi ne chi kelaktew ra rangchakkaipui dage wang bei ze chipaupui ne ’nrungkeleu bei sedu mî ne pechu lupat kai ra ga di dadegeu.

²⁸“Zai ’mpeumi mige ne kelaktew ra rangchakkaimakbe heleu’mpui je hedau lu, pechu nîm lu tewka’nsiabe penai je ngaudau dizai â

²⁹heleu’mpui peu dage pa ne gepût rengeu pei gai ra lei, dezai pa ze pe nâu chang ra lei, pa ne ’nchi-chine pechu (’mpuimi je) tewka’nsiabe ziegeneu. Pa ring tâne pechu tatuâchi lak lei.

³⁰“’Mpeumi mige du pe peu nâu je nguakelaktew mak ra lei, zai pe pui paîni gâu mak ra lei.