Read Zeme Naga DEUTERONOMI 23 Bible Online

DEUTERONOMI 23 - Zeme Naga bible

DEUTERONOMI 23

¹“’Mpeumi mi-mige du pe tingkachêu lettua’ndibe kau mei, zai pe gu rumtua’ndibe kau â, Tingwang gu baudime ka’nduibe ruage gut mak ra lei.

²“Rehane-na â Tingwang gu baudime ka’nduibeki ge gut ra mak lei; zai rehei pakereube riâ ge du pe chaname mî du Tingwang gu baudime ka’nduibe ruage gut ra mak lei.

³“Amonme mei nune Moabme mei mî de Tingwang gu baudime ka’nduibeki ge gut ra mak lei; zai pe cha pe name leine rehei pakereube riâ ge du Tingwang gu ka’nduibe bâm ge gut mak ze bam bam gu lei;

⁴ningnui Ijip gene zuapat ze ’mpuîki ge tebeîtewbe luage penui tingku benai hedui peimeube ziegeneu; zai ningchu deset kai ra Beorbe na Balaambe je Mesopotamia Pethor keloa gene puîbeibe ziegeneu.

⁵Acheusede Tingwang ning Rapeu ne Balaambe kuâ ’ngking mak ze, kane desetkaibe ze ’nnamgaibe hang tew gai dai bei de lei, Tingwang ning Rapeu â ningchu hung dadegeu.

⁶Nang ring tânege penui dage nang desieyibe tâ tew ra peu ra mak, zai penui heurâ ramme ngau ra peu ra mak lei.

⁷“Edom’mpeu je nang ngau’nrie mak ra lei; pa â ning sikina daseu; Ijip’mpeu je nang ngaugailak mak ra lei, pe ramdei ge lua kat â nang lunggaibe ziegeneu.

⁸Rehei pakechumbe gu penui chaname ze â Tingwang gu ka’nduibe bâm ge gut le dui lei.

⁹“Nang ning reime je herei ra zuapat ze sieki ge bam dezai nang ning runne ningchu tew’ntia ra lei.

¹⁰“Ningnui ruage mige tingmuî ge pa jeibe luagene tewhebâ gai nan laleu dizai â, sieki gene hela ’mbe tat ra lei, pa â sieki lung ’mbe gut mak ra lei;

¹¹kane hegîlia wang dezai, pa heduipia ra lei, zai naimik kêu di dezai sieki lung ’mbe pa gut dui lei.

¹²“Sieki gene hela ’mbe pebâm peu gai le lau; chige nang sau’ntak kai-kai ra hangge zeu;

¹³ning gu merua ge hetui tei’mpam ra lei; zai nang hela ge ’ntaukeu gai dezai chize ne pekui su ra lei, nang desipatkaibe kebauchim dai ra lei.

¹⁴Tingwang ning Rapeu ne ningchu tew’nring gai ra, zai ning teureime je ning suage peipat kai ra ninggu sieki lungge tatrua la daseu; chidaze ning gu sieki â ’nchi ra lei, chidezai pa ning dage mâ de betâu pakezeimakbe tâ ramme ngau mak ra, zai ning dagene tat dai mak ra hangge zeu.

¹⁵“Mige kebang pa’mpaupeu dagene paktat lu ning dage ’ngkeuwang gai lêuzai â, kelitua mak ra lei;

¹⁶ning taige pa ne bam nei-neibe keloa ge bam ra lei; pechu nang sâ ze getat mak ra lei.

¹⁷“Israelme ’mpuimi mei nune ’mpeumi mei zainedu mî de Hera ki hang hepumzuateume bam mak ra lei. Israel chaname ruage du chipau tatew ze peize bam mak ra lei.

¹⁸Tingwang ning Rapeu ki ge mâ-mâ samhat ra mâ-peipatbe ge ’mpuimi hepumzuateube gene hiwangbe mei nune hetei mî ramme mei be â nang teiwang mak ra lei; aipau zat kena ze â Tingwang ning Rapeu dage katenetbe chang daseu.

¹⁹“Ning sikina dage pa’ntua hanggene hepuk kai mak ra lei, rangkâng ge mei nune keteu-kesakbe merua ramme ge benai mâ-mâ pa’ntua hang kahepukbe zat ramme ge mei zeu.

²⁰Hesang zatme peireige â, pa’ntua hangge nang hepuk kai dui lei, kane ning sikina peireige â, pa’ntua hanggene nang hepuk kai mak ra lei; dezai Tingwang ning Rapeu ne nang gut ze lungrabe heram ge nang tâtewbe leine ge ningchu ’nnamgaibe pei gu lei.

²¹“Tingwang ning Rapeu dage mâ-samhat dezai nang pei ra gîng bam se lau; Tingwang ning Rapeu â chize ning dagene kie sing gu lei, chidezai â, nang kemaube chang gu lei.

²²Kane samhatrabe ge nang ne kakebai zaidu ning dagene mâ du kesiabe bam ra mak lei.

²³Ning mui gene zuapatkai’ndibe ze nang tew ra hang ’nninghereu-desang ra lei, ning mui gene nang ne deseugailube ze Tingwang ning Rapeu dage ning runne ne nei ze wang lu hatkai’ndibe ziegeneu.

²⁴“Ning ramname gu grepchî merie ge nang tat kai dezai nang ne grepchî teudui-dui gum ze teu’nggeugit dui lei, kane ning gu mâkuak ge kai mak ra lei.

²⁵Ning ramname gu hemeulu ge tatmie dezai ning ba ne hemeubuî ’nsi dui lei, kane ’ngkuaine ne ning ramna’mpeu gu hemeu nang gat mak ra lei.