Read Zeme Naga DEUTERONOMI 24 Bible Online

DEUTERONOMI 24 - Zeme Naga bible

DEUTERONOMI 24

¹“’Mpeumi pe nâu kû lu kelaktewlube chângge pe mikngau ge pe nâu ze yi mak, zai pa’nning mak dege henâutabe leisikuak pa ne raw lu pechu pei gai bei ze, zai pe ki gene pechu kelipat kai bei lêuzai,

²zai chi ’mpuimi tat ze miramme nâutew dai dege,

³chipau châng du pe napeu ne pechu lugailak ti ze henâutabe leisikuak raw lu pe dage pei gai lu pechu kelipatkailube chângge chi pe napeu changpeu du chai di lêuzai â,

⁴pe napeu pechu tapatkairaipeu â pechu kelaktew dai mak ra lei, chi ’mpuimi je tewhebâgai’ndibe chângge ai; chipau ze Tingwang ning Rapeu mikngau ge ngaukatenetbe chang daseu, zai Tingwang ning Rapeu ne nang lung ra peigaibe heram ge nang ne hemui pungwang gai mak ra lei.

⁵“’Mpeumi kelaktewrechidalube luage â, hereikang hangge mei nune kêdadabe tâ hangge mei ze pa tatpat mak ra lei; kum kat â temichai ze pe nâu dage pe suiyi ze bam ra lei.

⁶“Mimige de chêuniakbe chukâng mei nune chêuniakbe ’nreibe chukâng mei be ne ’nchunggaileube hangge tei mak ra lei; pa ne chipaupeu keringbe ze ’nchunggaileube hangge teibe chang gu daseu.

⁷“Ziemmena mige ne pe sikina, Israelme je nîm lu kebang hang chak kai lu zuabe ngau dizai â, kahegapeu ze â chai ra lei; chigum nang ningnui ruagene kesiabe tew’ngga ra lei.

⁸“Ningnui ka’mpabe-rarît patbe ge Lebime tingkume ne ningnui je rangbe luigum ze ’ntîng ze tew ra lei; I ne penui je samdiegaibeibe luigum ze ningnui ’ntîng ze tew ra lei.

⁹Ningnui Ijipram gene zuapat ze ’mpuîki ge tatbe luage Tingwang ning Rapeu ne Miriamle dage tewgaibe nang chibam lau.

¹⁰“Nang ning kining’mpeu je mâ-mâ hepuk kai dezai pa ne ’nchunggaileube zat lu ra hangge nang ne pe ki lam gut se lau.

¹¹Nang hela ge sapkua ra lei, nang hepukkaipeu ne pa ne ’nchunggaileube zat ze teipat ze ningchu pei ra lei.

¹²Zai pa kelaksiabe kau lêuzai â tingmuî kat du chipau pa ’nchunggaileube paîni ge nang jei mak ra lei;

¹³tingnaimik kêu dezai pa ’nchunggaileube paîni ze nang pechu pei dai ra lei, chidezai pa pe paî ge jeizun jei lu dezai ningchu pe suiyi ra hangge zeu; dezai Tingwang ning Rapeu masuage nang katelingbe chang gu lei.

¹⁴“Kebangme, mige lungchu lak, zai kegabe kau ning sikiname lêuzai hesangme lêuzai ning ram ge nang bambe namdi ge lungme lêuzai pe peireige nang geted mak ra lei; zai choa mak ra lei;

¹⁵pa hibe mai ge pe hî pechu nang pei ra lei, tingnaimik keumakbe suage zeu (pa â lungchulakbe ziegene chige pe lung leine pei gai daseu); ningchu Tingwang suage pa ’nretkaibe ze ning hang siabe chang mak ra hangge zeu.

¹⁶“Hename ziegene penui peume je tewchat mak ra lei, zai penui peume ziegene hename je du tewchat mak ra lei; ziemmena leine penui mâu-mâu ziegene chai ra lei.

¹⁷“Hesangme ziegene mei nune bepeugabe kau ziegene mei nang ka’nzeibe sie ze tewkedat mak ra lei, zai kemîpui gu paîni ’nchunggaileube hang tei mak ra lei;

¹⁸nang du Ijipram ge kebang changgaibe benai Tingwang ning Rapeu ne ningchu meupatkaibe ze chibam lau; chipauziegene aipau ze nang tew ra I ningchu die gai lei.

¹⁹“Nang ning lu ge helugat ze mekum kuai’mput kai ’ndizai â, nang chize kuai dai ra tat mak ra lei; hesangme, bepeugame zai kemî’nggiâne hang chize chang ra lei; chidezai Tingwang ning Rapeu ne ning batâ leine ge ’nnam gai gu lei.

²⁰Nang olib pebang gene rai lu dezai raiwang dai mak ra lei; chize hesangme, bepeugame zai kemî’nggiâne hang chang ra lei.

²¹Nang grepchî hiâm ge grepchî rai dezai bechâng ge gepie dai mak ra lei; hesangme, bepeugame zai kemî’nggiâne hang chize chang ra lei.

²²Nang Ijipram ge kebang chang ze bambe chibam lau; chipauziegene aipau ze tew ra ningchu I ne die gai lei.