Read Zeme Naga DEUTERONOMI 25 Bible Online

DEUTERONOMI 25 - Zeme Naga bible

DEUTERONOMI 25

¹“Ziemmename kakge hetû-hera pat ze penui ne samrambeki ge wang gai bei chige samramme ne pemâugabe kau chui ge râm’nzei gai ze kemaube kau chui ge sa’nsiagaibe ze,

²kemaupeu je bêu ra yi dizai â, samrampeu ne pechu jeikau gai ra pei gai bei pa bambe gene pa maube riâ pe peireige hebahuâ misongga kai ra lei.

³Lua hedai pechu lak kai dui lei, kane chipau peireige â, lak mak ra lei; chipau peirei pechu lak bam dizai â ning mikngau ge pe luitewlabe chang gu lei.

⁴“Getumsei chêuneibe lua pe mui nang dum mak ra lei.

⁵“’Mpeumi ramme penui sikina kilûng kat ge lungherua ze bambe ge hangkat ne pe na ’mpeumi lung gai mak ze chai di lêuzai â, chaidipeu nâu je miramme ki hesang’mpeu nâu hangge pei gai mak ra lei; zai pe napeu sikina kau ne pechu ’nna gai lu ze pe nâu hang lu ra lei, zai pe napeu sikina kau ne pe pan-rabe pe hangge tewpui gai ra lei.

⁶Zai pa lungkeuraîlangbe ’mpeumi napoine ji hang pe sikina kau chaidipeu ji lu gai ra lei, chidezai Israel gene pe ji gatud kai mak ra hangge zeu.

⁷Zai chi ’mpeumi zene pe sikina kau nâu je lugailak tizai â, chi pe sikina kau nâu zene keriekemui ge gechîngme bamme lam zuahang lu, ‘A napeu kiduî’mpeu ne Israel ge pe kiduî’mpeu ji lu’nduâtat bam ra lunei mak lei; a napeu kiduî’mpeu ne a peireige tew gai nei mak lei,’ acheu ze pau gai ra lei.

⁸Chidezai pe ram ge gechîngme ne pechu ku lu ze pechu salia ra lei: zai pa ne ’ngngîn mak ze, ‘I â pechu lugailak lei,’ ze acheu dizai â

⁹pe sikina kau nâu ne pe dage hang lu ze gechîngme bambe gene chipaupeu pîchûp tukpat nan ze pe ju ge pa ne ’nchai’ntui gai ra lei; dezai pa ne kak ze, ‘Mpeumi pe sikina kau ki-kelak tewchugaimakbe kau peireige aigum ze acheu gu lei,’ ze acheu ra lei.

¹⁰Zai chigumbe kau kibaume je â Israelme ruage pe pîchûp luaktua’ndibe kibau ze ku lei.

¹¹“’Mpeumi kat kat je hegei ze bambe luage hangkatpeu nâu ne pe napeu je beupeu ba gene pe napeu je meupat ra wang’nna lu pe ba ne pechu beupeu bak ge pe gu ze zam dezai,

¹²pe ba ze nang ne dângtua ne ra lei; nang ngau’nggia gai mak ra lei.

¹³“Ning gu mâ-ka’nchube ge perît gechâmbe zat na nang tei mak ra lei; kedibe benai kecheibe zeu.

¹⁴Ning ki ge mâ-ka’ndeube zat na kedibe benai kecheibe peize bam mak ra lei.

¹⁵Periâtit zai pelingtit ze nang mâ-’nchu ra lei, periâtit zai pelingtit ze nang mâ-’ndeu ra lei, chidezai Tingwang ning Rapeu ne ning chu peigaibe heram ge ning ringting tew’ntie gai gu lei.

¹⁶Aigumbe tewme teling mak ze tâtewme leine Tingwang ning Rapeu mikngau hangge katenetbe chang de lei.

¹⁷“Ningnui Ijipram gene zuapatbe luage Amalekbe ne ningchu ’ndaikau tew gai mei be chibam lau,

¹⁸’mpuîki ge ning jiesia ze ning ran-ga di bambe luage pa ne ningchu ’nggi ze ning chai’mbe tatnâ ze rarip ze bamme ’nteumena je bichatkam’ndibe tak zeu; zai pa â Hera je hing mak lei.

¹⁹Chipauziegene Tingwang ning Rapeu ne ning ram hang peibe heram lungge ning huâzie ge ning teureime leine dagene nang zêune bam ra ningchu peibeibe ting ge Amelekbe je chibambe rasam ze tingkehube kangge nang ne tew’ngga ra de lei; nang ’ngngaî ra mak lei.