Read Zeme Naga DEUTERONOMI 26 Bible Online

DEUTERONOMI 26 - Zeme Naga bible

DEUTERONOMI 26

¹“Tingwang ning Rapeu ne ningchu ning ram hang peigaibe ram ge nang gut ze heram ’nram dezai,

²ning gu kedei rachî raîlangbe ning dei hangge Tingwang ning Rapeu ne peigaibeibe gene ngaube ze ’ntui ge kai lu ze Tingwang ne kelânggairabe bâm ’mbe teitat ra lei, chige Tingwang ji kûbe bâm gezeu.

³Zai chipau ting ge tingku tâ tewpeu dage nang tat ze pe dage salia ra lei, ‘Anui paume je Tingwang ne hatkaiberam ge I wangchanglube ze Tingwang dage nemai ge I rangba gai de lei,’ ze acheu zeu.

⁴Chidezai tingkupeu ne ning ba gene ’ntui lu lu Tingwang ning Rapeu gu herâtewbe-kaira suage kai ra lei.

⁵“Zai Tingwang ning Rapeu suage rang’nchichiak kai ra lei. ‘Kezitrua ze bambe Aram’mpeu ze a peu de lei; zai Ijip ge wangkeu lu chige penui ziemmena gechâmne lung gai lêu ze bam de lei; zai chigene pezat hangpat zai dipat, peranchipat zai pung-ze-sapat ti de lei.

⁶Zai Ijipme ne anui ze getadautew, tewhereu, zai tâ kerit-ritbe tew ra tua gai lei.

⁷Chidadege â anui Tingwang, anui peume Rapeu dage hap kai de lei, zai Tingwang ne anui kuâ ’ngking gai lu pa ne anui je tewkahereube, anui ne tâtewkahereube zai gesâbe liebe ngau de lei;

⁸zai Tingwang ne Ijipram gene pe ba ranchi benai pe ba getuapatbe ba mi kehingbe kedibe, ka’nchetbe, ningdaulakbe zene anui je nguapat kai bei de lei;

⁹zai aipau bâm ge pa ne anui je nguawang gai lu ze tungdui benai ’ngkuidui ne luabe heram ze anui je pei gai bei de lei.

¹⁰Zai pie le lau, Hei Tingwang gau, nang ne achu peigaibeibe kedei rachî raîlangbe chunage I teiwang de lei,’ ze acheu zeu. Dezai Tingwang ning Rapeu masauge chize ’ngking gai nan ze Tingwang ning Rapeu je nang kellum ra de lei;

¹¹zai Tingwang ning Rapeu ne nang benai ning ki hangge zai ningnui ruage bamme Lebi’mpeu benai hesanglunggaileupeu hangge mâ-keyibe peigaibe leine peireige nang ning suiyi’nta ze bam ra lei.

¹²“Pakechumbe kum, chize kereu ge kat peibe kum ge ning gu mâ-himlei ngaube gene ning gu kereu ge kat peirabe leine, chize ne ning gu namdi lungge Lebi’mpeu, hesanglunggaileupeu, bepeugabe kau, zai kemîpui teu’nggeu ze bam ra hangge nang ne penui je pei gai lu dezai,

¹³Tingwang ning Rapeu je, ‘A ki gene ka’nchibe dam ze lupat kai de lei, zai chipau peireige du Lebi’mpeu, hesanglunggaileupeu, bepeugabe kau, zai kemîpui hangge I pei gai de lei, ning gu samde achu peigaibe luigum zeu; ning gu samde ge katte I ’ngka mak, zai ’ngngaî de ’ngngaî me lei;

¹⁴I desui ze bambe luage du I â kereu ge kat ze teu me lei, zai I ’nchi mak bambe luage du chize mâ de tei’mbia me lei; zai kechaibepeu hangge du chize mâ de peipat kai me lei; Tingwang a Rapeu kuâ I pheu lei, I â nang ne achu samdiegaibeibe luigum ze tew lu de lei.

¹⁵Tinggîm nang bambe bâm ka’nchibe gene piekeu gai lu ning gu Israelme benai nang ne anui peume dage tungdui benai ’ngkuidui ne luabe heram pei ra hatkai’ndibe nang anui je peibe kedei je ’nnam gai lau,’ acheu ze nang sa ra lei.

¹⁶“Nemai ge Tingwang ning Rapeu ne aipau hingde rawgaibe ramme benai hingde tewgaibe ramme tew ra ningchu die gai lei; chidaze ning lung leine ne benai nang keringbe leine ne nang ’ntîng ze tew ra lei.

¹⁷Nemai ge Tingwang â ning Rapeu lei be nang chî lu, zai pe gu ’mpuî ge nang tat ra, zai pe gu hingde rawgaibe ramme, zai pa samde ramme, zai pe gu hingde tewgaibe ramme ge tat ra, zai pe kuâ lu ra nang hat lu de lei;

¹⁸zai nemai ge pa ne ningchu hatkai’ndibe luigum ze nang â pe gu ziemmena de lei, zai nang â pe gu hingde leine tei ra de lei, ze Tingwang ne rang’nchichiak kai de lei,

¹⁹dezai pa ne tewgaibe pezat leine peireige getoabe gene, hejidibe gene, pengêudibe gene pa ne ningchu teichu gai gu de lei, zai pa sagai’ndibe luigum ze nang ne Tingwang ning Rapeu hangge ka’nchibe chang ra de lei,” kacheu de lei.