Read Zeme Naga DEUTERONOMI 27 Bible Online

DEUTERONOMI 27 - Zeme Naga bible

DEUTERONOMI 27

¹Chunage Mosabe benai Israelme gu gechîngme ne baudime je samdie gai ze, “Nemai ge I ne ningnui je hingde leine diegaibe tei’mmi le lau.

²Zai Tingwang ning Rapeu ne ningchu peigaibe heram ’mbe tat ra hang ningnui Jordan (geuki) kapatbe mai ge tingchukâng kedibe ramme keniak ’ndiaupiau gai lu tei’nsapchu gai ra lei;

³zai ning peume Rapeu Tingwang ne ningchu peibe heram chi ’ngkuidui benai tungdui ne luabe heram ge gut ra tatkapat dezai aipau hingde sam ramme leine ze nang ne chi tingchukâng ramme ge raw gai ra lei.

⁴Zai ningnui Jordan kapat dezai I ne nemai ge samdiegaibe deu geze aipau chukâng ramme Ebal loa’ntûm ge ningnui teichu gai lu nang ne keniak’ndiau gai ra lei.

⁵Zai chige Tingwang ning Rapeu hangge tingchu ne tewbe herâtewbe-kaira nang tew gai ra lei; chipau peireige hegeîkerua nang teichu gai mak ra lei.

⁶Tingwang ning Rapeu hangge tingchu giapângmakbe ne herâtewbe-kaira nang tew gai ra lei; zai Tingwang ning Rapeu hangge rûkambe-râtewbe chipau peireige nang peipat kai ra lei;

⁷zai chige nang desieyibe-râtewbe peipat kai ra lei; zai chigene nang mâ-teu ra lei; zai Tingwang ning Rapeu masua gene ning suiyi’nta ze bam ra lei.

⁸Zai chipau hingde gu sam ramme tingchu ramme peireige nang raw’nchichiak kai ra lei,” ze kacheu de lei.

⁹Zai Mosabe benai Lebi zat gu tingkume ne Israelme leine je salia gai ze, “Hei Israel gau, rim ze bam gai lau, zai ’ngking le lau: nemai gene Tingwang ning Rapeu gu ziemmena nang chang de lei.

¹⁰Chipauziegene nemai ge I ningchu diegaibe pe gu hingde ramme benai pe gu hingde rawgaibe ramme ze pheu ze Tingwang ning Rapeu kua nang pheu ra lei,” kacheu de lei.

¹¹Zai Mosabe ne aipau mai gîmsing ge baudime je rang gai ze,

¹²“Ningnui Jordan kapat lu dezai aime zat ramme (Simeon, Lebi, Juda, Issakhar, Josep zai Benjamin) â Gerizim loa ge baudime je ’nnam gai ra sap kai ra lei.

¹³Zai aime zat, Reuben, Gad, Asher, Zebulun, Dan, zai Naphtali zene desetkairabe hangge Ebal loa ge sap kai ra lei.

¹⁴Zai Lebime ne Israelme zat ’nteumena je penui rankai ze rang’nchichiak kai ra lei:

¹⁵“ ‘Ziemmena hechiâm chiamchime ba gene tewbe zat mâ-luî hang giabe mei nune ka’ndambe mei be ne tewpeu zai reine ze teichugaibeipeu je â desetkaibe peize wangchang lau,’ acheu zeu. Dezai baudime ’nteumena ne, kak ze, ‘Amen’ acheu ra lei.

¹⁶“ ‘Mige pe peu je mei nune pe pui je mei hengêutewmakbe kau je â desetkaibe peize wangchang lau,’ zeu. Dezai baudime ’nteumena ne, ‘Amen’ acheu ra lei.

¹⁷“ ‘Mige pe ramhuâzie’mpeu gu heramrai chukâng puika’mbiabe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

¹⁸“ ‘Mige puidi ge pemikchipeu je nguaka’mmiebe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

¹⁹“ ‘Mige bamgaileupeu, bepeu-gapeu zai kemîpui ziegene samrambe-sie ka’nzeibe tewkakedetbe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

²⁰“ ‘Mige pe peu nâu taige jeibe kau je â desetkaibe peize wangchang lau, pa ne pe nî gâu bei daseu,’ acheu zeu. Dezai baudime ’nteumena ne, ‘Amen’ acheu ra lei.

²¹“ ‘Mige hekaubena dage jeibe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

²²“ ‘Mige pe peu na ’mpuimi mei pe pui na ’mpuimi mei pe sikina ’mpuimi dage jeibe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

²³“ ‘Mige pe nâu pui (pe nai) dage jeibe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

²⁴“ ‘Mige reine ze pe ramna’mpeu je tewchatbe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

²⁵“ ‘Mige pemâugabe kau je tewchat ra henim luteube kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.

²⁶“ ‘Mige aipau hingde gu sam ze teitâtewbe ge peling-gesang hangge chize lugaimakbe kau je â desetkaibe peize wangchang lau,’ acheu zeu. Dezai baudime ’nteumena ne, ‘Amen’ acheu ra lei.