Read Zeme Naga DEUTERONOMI 28 Bible Online

DEUTERONOMI 28 - Zeme Naga bible

DEUTERONOMI 28

¹“Zai nemai ge nang ne Tingwang ning Rapeu kuâ pheu ze I ningchu diegaibe pe gu samde leine ’ntîngteî ze tâtew dizai â, Tingwang ning Rapeu ne kedeirei ge pezat leine peireige ningchu teichu gai gu lei.

²Zai Tingwang ning Rapeu kuâ nang ne pheu bei zaine â aipau ’nnamgaibe ramme leine ze ning peireige wangchang gu lei.

³Ningchu namdi lungge benai helu ge ’nnam gai gu lei.

⁴Ning dagene patbe ning chaname, ning gu kedei rachî zai ning gu kaurui hingpatbe, zai ning gu melipoine ramme peireige ’nnam gai gu lei.

⁵Ning gu ’ntui benai tingku kakeneibe kuak peireige ’nnam gai bu lei.

⁶Nang pat ze gutbe ge ningchu ’nnam gai gu lei.

⁷“Ning teureime ning dage zuachume je kelakbe chang ra ning masua gene Tingwang ne tew gai gu lei; penui ne ningchu ’nggi ra ’mpuîki kat gene wang gu, kane ning mikngau gene ’mpuîki sena ge rarip tat kam du lei.

⁸Tingwang ne ning gu ’nseu ramme ge benai nang tâtewgaibe leine ge ’nnam gai gu lei; zai Tingwang ning Rapeu ne ning ram hang peibe ge ningchu ’nnam gai gu lei.

⁹Nang ne Tingwang ning Rapeu gu hingde teichi ze pe gu ’mpuî ramme ge tat bei zai â pe runne pe hangge ’nchi ze bambe kau ziemmena zat hang Tingwang ne ningchu tew’ntip kai gu lei, pa ne ning dage deseulube luigum zeu.

¹⁰Dezai kedeirei ge ziemmena zat leine ne nang â Tingwang ji gene kûpatlube kau lei be ngaupat ku lei; zai ningchu penui hing gu lei.

¹¹Nang lung’ntua ze bambe ge ning dagene ning chana wangkeube ge, ning gu kaurui hing-zeha-ze bambe ge, zai ning gu kedei gene mâ-hîmra patbe ge misongga bam ra pa ne tew gai gu lei, ningchu heram pei ra Tingwang ne ning peume dage hatkaiberam lungge zeu.

¹²Tingwang ne pe heurâ gekuatinggaibe bâm tinggîm ze ning hangge latpat kai gu lei, ning ram ge beting sing ge tingruikeu gai zai ning ba tatew ramme leine ge ’nnam gai ra hangge zeu; zai heramzat misonggame je nang ne hepuk kai gu lei, kane nang â hepuk ra mak lei.

¹³Zai Tingwang ne ningchu bepeî chang ra tew gai gu lei, pemi hang mak zeu; zai lung’ntuachu ze bam gu lei, ’nsînkeu ra mak lei; nang ne Tingwang ning Rapeu gu hingde ramme nemai ge I diegaibe ze pheu ze ’ntîngteîne ze chiramme tew ze bam bei zaine ai,

¹⁴zai nemai ge I ne ningchu chi diegaibe sam ramme gu mâ-mâ gene hera kêdabe ramme guâ ’nggua ra tatrabe hanggene heku’mbia, hezat’mbia tatkelik ze nang ne ’nreitat dai mak zaine ai.

¹⁵“Kane nang ne Tingwang ning Rapeu kuâ pheu mak, zai pe gu hingde ramme benai rawgaibe hingde ramme nemai ge ningchu I peibe leine ze ’nningtelam dizaine â, aige desetkaibe leine ze ning peireige wangchang gu lei.

¹⁶Namdi ge ningchu deset kai gu, zai helu ge ningchu deset kai gu lei.

¹⁷Ningnui gu ’ntui benai tingku kakeneibekuak ge deset kai gu lei.

¹⁸Ning name peireige zai ning gu kedei gene mâ-hîmra ngaube peireige, ningnui gu kaurui hingpat ze bambe peireige, zai ning gu melipoine ramme peireige deset kai gu lei.

¹⁹Nang tatgut tatpat dezai desetkaibe ning peireige bam gu de lei.

²⁰“Nang ne tâ-kesiabe ramme tew, zai achu sâugai’ndibe ziegene nang ’ngga’nzâu kelua de mak tânege nang tâtew ra ’mpunggaibe leine ge desetkaibe ramme, kakebuakbe, zai mi lunggailakbe, Tingwang ne ning peireige lang gai gu lei.

²¹Tingwang ne ningchu herarît ’nnâk kai ra tew gai gu lei, nang heram ’nram ra gutbe heram gene pa ne ningchu tew’ngga’nzâu gai mak tâne gezeu.

²²Tingwang ne ningchu geteube, ka’nrâbe, geteuted liebe, kelumbe ted lielakbe, naichiê-rakûm, zai heratingkai, zai kezai gene tewsâ gu lei; chiramme ne ningchu tew’nsia kam mak tâne ning chu gua’nsa bam gu lei.

²³Zai ning peireige tinggîm ze hetageî chang gu, zai kedei ning kangge bambe ze hegeî chang gu lei.

²⁴Tingwang ne ning ram ge mâ-moîne benai kemût ruikeu ra tew gai gu lei; ningchu tew’nsia kam mak tâne chize tinggîm gene ning peireige ruikeu bam gu lei.

²⁵“Tingwang ne ningchu ning teureime masua gene duilak ra tew gai gu lei; penui je ’nggi ra nang ’mpuîki kat gene zuapat kû, zai penui suagene ’mpuî sena ge nang pak kai gu lei; chidezai kedeirei gu heguangram leine ne ningchu hing gu lei.

²⁶Dezaine ning gu kechaipum ze tingkai ge ’nruine liamruabe ramme benai kedei ge mârekaune ramme gu hetak hang chang gu lei; zai chige mî ne du penui je guatuarabe kau bam ra mak lei.

²⁷Ijipme je tewsabe teuteriêne zat, zai heteu benai ka’nchakbe rarît zai kûmpai tew’mmi-daichilakbe ramme zene ningchu Tingwang ne tewsâ gu lei.

²⁸Miebe benai hemikchitbe zai helungsuilam hang peulakbe ramme zene Tingwang ne ningchu tewsâ gu lei;

²⁹zai pemikchitme kemuîbe ge getamrua gum ze tîngna’nding ge nang getamrua gu lei, zai nang tâtewbe ge ’ntuachu ra mak lei; ningchu â miramme ne tega ze sutteu bam gu lei, dezai ningchu barigairabe kau mî du bam ra mak lei.

³⁰Nang ning nâu hang rang gu lei, zai miramme (’mpeumi kêdabe kau) ne pe dage jei gu lei; nang ne heki tewchu gai gu lei, zai chige nang bam ra mak lei; nang ne grepchî merie tew gu lei, zai nang perachî raiteu ra mak lei.

³¹Ning mikngau sing gene ning gu getumsei gîchat ku lei, zai chize nang ne teu ra mak lei; ning gu hekunmerângne ning mikngau gene suttat tu lei, zai chize ningchu pei dai ra mak lei; ning gu meli ning teureime je pei gai ’ndu lei, zai chige mî ne du ningchu ’ngngârabe kau bam ra mak lei.

³²Ningnui name ’mpeumi benai ’mpuimi ramme je miramme dage pei gai ’ndu lei, nang ne piebambe luagene zai nang ’nninghereu ze lei-’nggahimmui gai gu lei; zai chize nam ra ning ba ge rezie bam ra mak lei.

³³Nang chimakbe heram zatme ne kedei ge nang ’nrî ze tâtewgaibe rachî raiteu ’ndu lei; chidezai ningchu â geted ze tewhereu-teniangtiang gai ze bamrabe runne de lei;

³⁴chiramme nang ngaurabe zene ningchu â tew’mmie nan ta du lei.

³⁵Tingwang ne ning kukloa kena benai ning pî kena ge mi duânggabe heteu kedibe tew’mmichilakbe ning pîdei gene ning peî’nning riâ chang ze bam ra tew gai gu lei.

³⁶“Tingwang ne nang benai ning gu heguang, chi nang ne ning peireige kaipeu je nang benai ning peume ne chimakbe heramzatme dage nguawang gai gu lei.

³⁷Dezaine nang â Tingwang ne ningchu nguatatkairabe bâm ziemmena zat leine ruage miramme ne hing ze bamrabe zat ruage tei’nda ze teisa bamrabe zat zai teiherangtewbamrabe zat hang chang gu lei.

³⁸Ning gu helu ge helei misongga ze nang pungtat kai gu, zai kecheîne runne gekumwang gu lei; heriâmkau ne dûm’nsia ’ndu dadegeu.

³⁹Nang grepchî merie tew ze teleu ze bam gu lei, kane nang grepchî zau sak ra ngau ra mak, zai pechî gekum’ndui ra du ngau ra mak lei; pa’ngkit ne teu ’ndu dadegeu.

⁴⁰Ning ram lung leine ge olib chingbang ramme bam gu lei, kane nang chipau gu taudui ’nnuk ra ngau ra mak lei; ning gu olib ramme ’ngngaîtat kam du daseu.

⁴¹Nang ne ning name ’mpeumi benai ’mpuimi lungkeu gai gu lei, kane penui ze ning gu chang ra mak lei; penui â kebang changbe bâm ge tat kai du dadegeu.

⁴²Ning gu hingbang ramme benai ning gu kedei ge mâ-hîmra ramme leine ze heriâmkau hang chang gai du de lei.

⁴³Ning dage lunggaileume zene ning peirei hubi-bi gu lei; zai nang a nakeubi-bi du lei.

⁴⁴Pa ne ningchu hepuk kai gu lei, kane nang ne pechu â hepuk kai ra mak lei; pa ne bepeî chang gu, zai nang ne pemi chang gu lei.

⁴⁵Pa ne diegaibe pe gu samde ramme benai pe gu hingde rawgaibe ramme rei’mmi ra hangge nang ne Tingwang ning Rapeu kuâ ’ngkingmakbe ziegene ai desetkaibe ramme ning peireige wang gu lei, zai ningchu tew’nsia kam mak tâne ningchu gua’nchu ze guachang ze bam gu lei.

⁴⁶Chiramme zene betingbeta ning peireige benai ning chaname peireige ka’nchetbe benai mi ningdaulakbe zat hang chang ze bam gu lei.

⁴⁷“Ning dage getaleine dangsangbamdibe ziegene Tingwang ning Rapeu je hesuiyibe benai helungsuiyibe ne pe guâ ’ngguamakbe ziegene de lei,

⁴⁸chipauziegene nang â ’njei-herei ze pumlâng gene ning dage mâ de ga ze ningnui teureime, Tingwang ne ningchu ’nggi ra langgaime guâ ’nggua gu lei; dezai pa ne ningchu tewchat kai mak tâne pa ne ning guang ge hegeî guangkam luak kai gu lei.

⁴⁹Ning dagene kedeu ’mbe bambe kedeirei deulangbe bâm ’mbene ning teureime heramzatme nang ne penui lad chimakme je Tingwang ne ningchu ’nggi ra keliengrie liambe ka’nzetbe riâ ’nzet ze ning peireige nguawang gai gu lei,

⁵⁰chime heramzatme ze â penui marak siabe zat, gechîngme je mâ-hang du chak kai mak, zai hename je du ’nchâ mak,

⁵¹zai ningchu tew’nsia gai mak tâne ning gu kaurui poine benai ning gu mâ-hîmra ramme teurame bau de lei; zai ningchu tew peduângkerutkaibe riâ chang mak tâne penui ne, chêu, wain, taudui, ning gu getum hingpatbe ramme, zai melipoine ramme ning hang ’nsakkaimakrame bau zeu.

⁵²Nang ne ’nnum’mmi ze bambe ning gu kerie kehube benai kerie peranchibe ramme ne ning ram pelane bakêu ze tuâtiam gai mak tâne penui ne ning gu namdi ramme tuaguâ ze bam gu lei; zai Tingwang ning Rapeu ne ningchu peigaibe ning gu heram leine ge, penui ne ningchu tuaguâ ze bam gu lei.

⁵³Heram kagechimbe benai mi lung tewkahereube zene ning teureime ne ningchu ning lung tewhereurabe ting dezai Tingwang ne ningchu peigaibe ning name, ning dagene patme ’mpuimi benai ’mpeumi ramme ji nang teu gu lei.

⁵⁴’Mpeumi ningnui ruage renualangpeu zai ’nchuilangpeu ne du pe sikina, pe nâu zai pe na henalangbe poine je tak (teu ra) pei lak tu lei;

⁵⁵zai pe hangge mâ de ’nsakkaitadibe ziegene pa pe name pumji teube ze penui mi-mi hangge du peilak tu lei, ning reime ne ning gu namdi tuaguâ ze ningchu tewhereugairabe ting dezai neu.

⁵⁶Ningnui ruage renualangpui zai mâ-teleuchilangpui pa mâ-teleuchibe benai pa karenuabe ziegene pe pîdei kedei kagaisiabe-tew mak bambepui zene pe napeu je zai pe name ’mpuimi benai ’mpeumi,

⁵⁷pa ne lungkeulube poine zai pe name pa ne pung ze bamme je mâ-mâ teu ra pa ne peilak tu lei, ning reime ne ning gu namdi tuaguâ ze ning chu tewhereugairabe mai dezai pe dage mâ de ga di, reine ze pa penui je du teu ra changdibe ziegeneu.

⁵⁸“Ai pengêudibe benai ningdaulakbe ji, Tingwang ning Rapeu, je nang hingchi le ra aipau leisikuak ge rawgaibe aipau gu hingde sam ramme pelane sui ze tew ra nang ne ’nningtelam dizai â

⁵⁹nang benai ning name peireige Tingwang ne mêkeu lungkahereube, tewsabe betedteube, hereu-teuneube, mi duânggabe betinggetie bam ra pei gu lei.

⁶⁰Zai pa ne ning dage Ijipme rarît, nang ne hing ze bambe teiwang gai dai gu lei; zai chiramme zene ningchu rat ze bam gu lei.

⁶¹Hereu-teuneube zat leine du, zai tewkahereube zat leine aipau hingde leisikuak ge rawgaimakbe zat ne ningchu tew’nsia gai mak tânege chize Tingwang ne ning peireige teiwang gai gu lei.

⁶²Ningnui tinggîm ge hegi ramme gum dungdi bambe ze ningnui je ziemmena gechâmne runne ’nsak kai gu lei; nang ne Tingwang ning Rapeu kuâpheumakbe ziegeneu.

⁶³Zai Tingwang ne ning hang mâ-yibe tewgaibe ge benai ningchu tewpunggaibe ge ’nchâlai ze tew gum ze, ning hang tew’nggarabe teiwangbe ge benai ningchu tew’nsiarabe ge ’nchâlai ze tew gu lei; zai nang heram ’nram ra gutbe heram gene ningchu lupat ’ndu lei.

⁶⁴Zai Tingwang ne ningchu kedeirei tingmik katlam gene mik katlam riâ pezat leine ruage kum gai gu lei, chige nang ne, nang benai ning peume ne chimakbe hera kêdabe ramme, heching benai tingchu râ ramme je kellum ze bam gu lei.

⁶⁵Zai aime heramzatme ruage ning lungwângchangbe ngau ra mak lei, zai chige ning pî sautemichai gai ra ngau ra mak lei; kane Tingwang ne ning lung kedun ze bam ra, ning mik kena rakkailak te ra zai ring ning jiesiarei ze bam ra tew gai gu lei;

⁶⁶nang mâ-’nning ra du ’nningdaichi ta di ze bam gu lei; kemuî-keba nang ’nringgepûn bam gu lei, zai ning runne ningchu ’nnumtew dai ra ga du lei.

⁶⁷Hechua ge, ‘Hegî di laîzai!’ ze acheu, zai hegî ge, ‘Hechua di laîzai!’ ze ningnui acheu sa gu lei, chize ning lung gene mâ-hingrabe ramme benai ning mik gene mâ-ngaurabe ramme bambe ziegeneu.

⁶⁸Dezai Tingwang ne hedui’nneikuak gene Ijipram ’mbe ningchu nguatat kai dai gu lei, chige mâtew-tewsedu nang tebeîtew dai mak ra hangge I ne hatkai’ndibe zeu; zai chige ningnui run-runne ningnui teureime dage kebang ’mpeumi benai ’mpuimi chang ra ningnui je zua gai gu lei, kane mî ne du ningnui je lui ra mak lei,” kacheu de lei.