Read Zeme Naga DEUTERONOMI 29 Bible Online

DEUTERONOMI 29 - Zeme Naga bible

DEUTERONOMI 29

¹Airamme ze Horeb ge bamme hangge hingde pa ne tewgaibe peireige du Moab dei ge Israelme dage Mosabe ne tew gai ra Tingwang ne diegaibe, samhatkaibe sam ramme de lei.

²Zai Mosabe ne Israelme ’nteumena je kûwang’ndui lu penui je, “Ijipram ge Pharaobe benai pe tâ ka’ngguame zai pe gu heramme ’nteumena dage Tingwang ne ningnui kengaube sing gene tâtewgaibe ningnui ’nteumena ne ngau kam lu de lei,

³kakedakbe kedibe ramme ning mik ne ngaube ’nchet ra tewliabe ramme, zai chi ningdaulakbe kedibe ramme zeu;

⁴kane nemai â Tingwang ne ningchu chirabe lung hang, ngaurabe mik hang zai seurabe kun hang pei bei de lei.

⁵Ningnui je I ne kum hedai hênamkang ge nguatat bei de lei; ningnui paîni ningnui pum gene kai’nsia gai mak, zai ningnui pîchûp ningnui pî gene kai’nsia gai mak lei;

⁶ningnui tingku teu mak, zai wain du sak mak, zai wain peranchibe du sak mak ze bam lei; chidezai I Tingwang ningnui Rapeu lei be ningnui chî ra hangge zeu.

⁷Zai ningnui aige wangchang dadege, Heshbon gu heguang Sihon benai Bashan gu heguang Ogbe anui je ’nggi ra hangge hang de lei; kane anui ne penai je duî ’ndi de lei;

⁸penai ram ze anui ne lu lu ze, Reubenme, Gadme, zai Manassebe zat pa’mpime hangge penui je pei gai bei de lei.

⁹Chidaze aipau hingde sam ze suichi le ra ’ntîngteî ze bam lau, chidezai ningnui tâtewgaibe ramme ge ’nggim ze bam ra hangge zeu.

¹⁰“Nemai ge ningnui ’nteumena Tingwang ningnui Rapeu masuage sap kai lau; ningnui zatme ruage besuitewme ningnui gu gechîngme, ningnui gu tâ-muipuame, ningnui Israelme leine,

¹¹ningnui name, ningnui nâu ramme, ningnui gu sieki ge hesang rêugaileume, mi-mige ningnui gu hechingriame benai ningnui gu hedui tuakme, haimena neu,

¹²dezai nemai ge Tingwang ning Rapeu ne ning dage tâtewgaibe Tingwang ning Rapeu gu samhatkaibe bâm ge nang gut le ra hangge zeu;

¹³chidezai pa ne ning peume, Abrahambe, Isaakbe zai Jakobbe dage samhatkai’ndibe luigum ze, zai ning dage pa deseugai’ndibe luigum ze pa ne ning Rapeu chang ra hang nemai ge pe gu ziemmena hangge peize ningchu tew’ntip kai ra hangge zeu.

¹⁴Ning dage runne aipau hingde ze hatkaibe kau mak te lei;

¹⁵kane nemai Tingwang anui Rapeu masuage anui dage sapbe kau dage gum ze nemai anui dage aige gabe kau hangge du hat kai lei.

¹⁶“Ijipram ge anui ’ndaigum lung mei, zai ’ndaigum ze heramzatme ruagene anui tatpelatat ze wang mei be ze ningnui chî lei;

¹⁷zai penui dage ngaukatenetbe merua ramme bambe ningnui ngau de lei, penui dage bambe heching benai tingchu ne, zai gepût benai gechâk ne tewlube heraluî ramme zeu.

¹⁸’Ntîng le lau, makchai â, ningnui ruage mige ’mpeumi mei, ’mpuimi mei, pe kilûngkang mei, nune pezat luî mei ze ningnui lung Tingwang ningnui Rapeu dagene tatlietat lu ze chipau heramzatme gu hera ramme je ’nggua di laleu du lei; makchai â, teu lu chairabe hîngbangma benai gekabe rachî ningnui ruage bam di ta du lei,

¹⁹mige ai samhatkaibe gu kadeseube sam ramme pa seu lu dege pe lung gene pa’nrîmyi ze, I ne a lungchi ze bam sedu I ring du de lei, kacheube zeu. Aize â gechimbe benai gechangbe zat biaktuabe riâ gum chang gu lei.

²⁰Tingwang ne pechu lun ra mak lei, kane Tingwang lumpum benai pa pe lunggailakbe ze chipau peu dage pa mekut hiarichu gu lei, zai desetkaibe zat ramme aipau leisikuak ge rawgai’ndibe pe peireige wangchang gu lei, dezai Tingwang ne pe ji ze tingkehube kang gene tew’ngga ’ndu lei.

²¹Chidezai Tingwang ne pechu â Israelme zat leine ruagene tewkahereube dau ra hangge kaichâm gai gu lei, aipau hingde leisikuak ge samhatkaibe gu desetkaibe sam ramme rawgai’ndibe bambe luigum zeu.

²²Hesua ge rehei lunghangkadaime, ningnui chaname benai hesangme gu heram kedeu ’mbe bamme ne mi duânggabe tewkahereube ramme benai lungkahereube ramme ningnui ram ge Tingwang ne teiwanggaibe ze ningnui ngau gu lei —

²³helu ramme ze Salphar benai ’nchaî ne kedei tewchat kam ’ndu lei; mâ du ling gai ra mak, zai chige reheubuâ du puakpat ra mak lei. Tingwang ne pe râta-kadesangbe luagene tew’nsiakamgaibeibe Adma benai Zeboiim gu, Sodom benai Gomorra gu namdi ramme gum ze ningnui ram du wangchang gu lei —

²⁴chidezai kedeirei gechu ne, ‘’Ndaitewbeibe ziegene Tingwang ne aize penui gu heram ge tew gai bei lau? ’Ndaitew ze pa pe lumpum-kadesang lau?’ ze ’nneu gu lei.

²⁵Dezaine ziemmena ramme ne acheu ze kak ku lei, ‘Aize â penui ne Tingwang penui paume Rapeu gu hingde penui je Ijip gene nguapatbe luage hatkai’ndibe sam ze sâu’ndibe ziegene de lei,

²⁶zai penui ne kêdabe hera penui chimakbe hera ramme penui hangge pa ne peigaimakbe hera ramme guâ ’nggua ze penui je kellumbeibe ziegene de lei;

²⁷chipauziegene aipau leisikuak ge rawgaibe desetkaibe zat ramme ze Tingwang ne teiwang ze penui peireige ’ntau gai bei de lei;

²⁸zai Tingwang ne penui ram gene puipat lu pe râta-desang di ze penui je heram kêda ’mbe tuâpat kai ’ndi de lei, nemai riâ chang ze bambe luigum zeu,’ ze acheu zeu.

²⁹“Mâ-tei’mbai’ndibe zat leine Tingwang anui Rapeu gu lei; kane mâ teiliagaibe leine ze â betingbeta anui benai anui chaname hang lei, chidezai anui ne aipau hingde gu sam leine ze teichi le ra hangge zeu.