Read Zeme Naga DEUTERONOMI 3 Bible Online

DEUTERONOMI 3 - Zeme Naga bible

DEUTERONOMI 3

¹“Chidadege anui ’nreiwang ze Bashan tatbe ’mpuî ’mbe hang de lei; zai Bashan gu heguang Ogbe, pa benai pe gu ziemmename leine Edrei ge anui je ’nggi ra zuapat te lei.

²Kane Tingwang ne a dage rang gai ze, ‘Pechu hing se lau; pa benai pe gu ziemmename leine je benai pe ram ze ning ba ge I pei gai ’ndi daseu; zai Heshbon ge lungpeu, Amorme gu heguang Sihonbe peireige tewgaibe gum ze pe peireige nang tew gai ra lei,’ kacheu de lei.

³Chigum ze Tingwang anui Rapeu ne Bashan gu heguang Ogbe benai pe gu ziemmename leine je du anui ba ge pei gai bei de lei; zai pe dage ziemmena ga’nzâu mak tâne pechu anui ne tew’nsia gai bei de lei.

⁴Zai chipau ting ge pe gu namdi leine anui ne lu kam ’ndi de lei—penui dagene anui lumakbe namdi katte ga di de lei—namdi riakseruk, Bashanram ge Ogbe gu heguangram ge bambe Argob huâzie luî lu ’ndi de lei.

⁵Airamme leine ze kerie rieguamakbe keloa ramme misongga bambe du sâu ze, keriehube ramme, kerie’ngkam zai bechâp ramme kai ze riegualube namdi ramme de lei.

⁶Zai Heshbon gu heguang Sihonbe peireige anui tew gai gum ze anui ne namdi leine, ’mpeumi ramme ’mpuimi ramme, zai napoine ramme je tew’ngga gai ze penui je tew’nsia kam gai bei de lei.

⁷Kane kaurui leine benai namdi heurâ sutlube leine â anui gu hereichâ chang ze anui lu de lei.

⁸Chigum ze chipau ting ge Jordan gene helagiam ge bambe Amorme gu heguang hangna ba gene heram ze Arnon kâm gene Hermon Loa riâ changbe anui ne lu ’ndi de lei

⁹(Hermon je Sidonme ne Sirion ze kû, zai Amorme ne Senir ze ku lei),

¹⁰peloaram gu peningsing ge namdi ramme leine zai Gilead benai Bashan leine, Saleka benai Edrei riâ chang ze, Bashanram ge Ogbe gu heguangram gu namdi ramme lu kam ’ndi de lei.

¹¹(Rephaime ’nsakpatme ruage Bashanram gu heguang Ogbe runne bam di daseu; pie le lau, pe jeîra â hegeî jeîra de lei; chize Ammonme gu Rabba ge la mak semei? Chize ziemmena sâu ka’ndeube luî gene petâ sâu sekui, zai pedit sâu medai lei.)

¹²“Chipau ting anui ne aipau heram lube luage, Reubenme benai Gadme hangge Arnon kâm betun-gaibe ge bambe Aroer gene chu ze, zai Gilead peloaram pa’mpi benai pe gu namdi ramme ze I ne heram pei gai de lei;

¹³Gileadram ka’nsakbe zai Ogbe gu heguangram Bashan leine, chize Argob huâzie leine Manassebe zat pa’mpi je I pei gai de lei. (Chipau Bashanram pelane je Rephaimme dei ze ku de lei.

¹⁴Manasse’mpeu Jairbe ne Bashanram kacheube Argob huâzie pelane, Geshurme benai Makathme gu heramrai riâ chang ze lu kam ’ndi de lei, zai nemai riâ chang ze bambe luigum ze keloa ramme ji hangge pe ji gene ’ntak kai ze, Habboth-jair ze kû la lei.)

¹⁵Makir hangge Gilead I pei gai de lei,

¹⁶zai Reubenme benai Gadme hangge I ne Gilead gene Arnon kâm riâ chang ze chipau kâm sûngngangkelî zene heramrai chang ra Ammonme gu heramrai Jabbok geuki riâ chang ze pei gai de lei;

¹⁷Arabahram ze du, Jordan zene heramrai chang ze, Kinnereth gene Araba gu sungkling, ’Nchaî Sungkling riâ naimik pat ’mbia Pisga loa ’ntûm ramme pî riâ chang ze pei gai de lei.

¹⁸“Zai chipau ting ge I ne ningnui je samdie gai ze, ‘Tingwang ningnui Rapeu ne aipau ram ze ningnui ’nram le ra hangge pei gai de lei; ningnui puiname Israelme suage ningnui ziemmena gekume leine ne penui gu hereimerua tei’nsangsiak lu tat ra de lei.

¹⁹Kane ningnui nâu ramme, hename, zai ningnui gu kaurui (Ningnui dage kaurui misongga bambe I chibe) ze â ningnui je I ne peigaibe namdi ramme ge bamkuâ ra lei,

²⁰ningnui je pei gai bei gum ze Tingwang ne ningnui puiname je sautemi ra pei gai mak tâne, zai penui du Jordan ze katlam giam Tingwang ningnui Rapeu ne penui je peibe heram ze ’nram le mak tâne gezeu; chipau châng dezai I ne ningnui je peigaibe pe gu-gu heram ’mbe ningnui ziemmena leine helatwang dai ra lei,’ ze kacheu de lei.

²¹Zai chipau ting ge Joshuabe dage I samdie gai ze, ‘Aipau heguang kena peireige Tingwang ningnui Rapeu ne tewgai’ndibe leine ning mik ne ngau lu de lei; chipau luigum ze nang tatkapat ze gutkairabe heguangram ramme leine dage Tingwang ne tew gai gu lei.

²²Penui je ningnui hing mak ra lei; ningnui hangge ’nggigaibe ze Tingwang ningnui Rapeu ne daseu,’ acheu bei de lei.

²³“Zai chipau ting ge Tingwang je I ne kiam de lei,

²⁴‘Hei, Tingwang Hera gau, ning guâ ka’ngguapeu je ning gu reziechibe benai ning ba ranchibe nang teiliadîmchugaibe runne rei de lei; nang tew gum ze aigumbe tatew ramme benai reziechibe tâ ramme tewduibe kau ting-kedeirei ge hera châu la lau?

²⁵I tatkapat ze Jordan ze wîgiam heram yibe, chi peloaram peluiyibe benai Lebanon ze ngau le ra achu pei lau, ze I kie lei,’ ze acheu zeu.

²⁶Kane ningnui ziegene a peireige Tingwang pe lumpum de lei, zai a kuâ ’ngkingmeu de lei; zai Tingwang ne achu rang gai ze, ‘Aize ning hangge peize kebuibe chang de zu lau; aipau deu ge achu ’mpau ta lau.

²⁷Pisga loa ’ntûm ’mbe hang zu lau, zai tingrun ’mbia zai tingpeî ’mbia zai tingpî ’mbia benai tingbia ’mbia heguapie gai ni lau, zai ning mik ne chize ngau le lau; aipau Jordan nang kapat ra mak daseu.

²⁸Kane Joshuabe je geteilia gai be lau; zai pechu gecheu gai ze, pe ran tew’nchi gai be lau; aime bau suage pa ne raî ze kapat kû zai nang ngaurabe heram ze ’nram le ra pa ne penui je tew gai gu daseu,’ ze kacheu de lei.

²⁹Chipau luigum ze Beth-peor gene katlam ’mbia bekâm ge anui sau gai di de lei.