Read Zeme Naga DEUTERONOMI 30 Bible Online

DEUTERONOMI 30 - Zeme Naga bible

DEUTERONOMI 30

¹“Chunage I ne ningchu ’nnamgaibe benai kadesetbe kakge kelâng ra pei gai de lei. Airamme leine ning dage wangchang dezai, zai Tingwang ning Rapeu ne ningchu kumtuagaibe heramzat ramme ruage nang lung dezai, ningchu I ne kelâng ra peibe ze nang chibam gu lei,

²nang benai ning chaname ne Tingwang dage ’nreiwang dai ze, zai nemai ge ningchu I ne peibe pe gu samde ramme ze ning lung leine ne, zai nang keringbe leine ne pheu dizai â

³Tingwang ning Rapeu ne ningchu ngau’nggia gai gu lei. Ningchu pa ne hûraripkai’ndibe heram ramme gene pa ne ningchu nguawang dai gu lei, zai pa ne ning heurâ ze teiwang gai dai gu lei.

⁴Ning gu ziemmena tuâpatkai’ndibe kau ramme ze tingkehube lungge mâ-mâ ge bam dizai â, chigene Tingwang ne ningchu gekumwang gai dai gu lei, zai chigene tat ze ningchu ngua gu lei;

⁵zai Tingwang ning Rapeu ne ningchu ning peume heram ka’nrambe heram ge nguawang gai gu lei, nang ne heram ’nram ra hangge zeu; zai ning peume suadu nang lung’ntua ze bam ra, zai ning bau kie ze bam ra pa ne ningchu tew gai gu lei.

⁶Zai Tingwang ning Rapeu ne ning lung benai ning chaname lung ze rumgeten gai gu lei, dezai Tingwang ning Rapeu je nang ning lung leine ne, zai nang keringbe leine ne hungchi le ra, dezai nang ring le ra hangge zeu.

⁷Zai Tingwang ning Rapeu ne aipau desetkaibe ramme ze ningchu ka’nggime benai ning teureime ningchu tewsâme peireige kai gu lei.

⁸Zai nang Tingwang kuâ pheu dai ze nemai ge I ne ningchu diegaibe pe gu samde ramme leine tew gu lei.

⁹Ning batâ leine ge, ning chana piakeube ge, ning gu kaurui hingpatbe ge, zai ning gu kedei rachî ka’nchibe ge, misongga ze lung’ntua ze bam ra ningchu Tingwang ning Rapeu ne tew gai gu lei; ning peume dage pa ne pe suiyi gum ze Tingwang ne ningchu pe suiyi ze tei’ntua gai dai gu lei,

¹⁰aipau hingde leisikuak ge rawgaibe pe gu hingde rawgaibe ramme benai pe gu samde ramme tei ra hangge, Tingwang ning Rapeu kuâ nang ne pheu ze, zai Tingwang ning Rapeu dage ning lung leine ne, zai nang keringbe leine ne ’nreiwang dai dizaine ai.

¹¹“Aipau samdiegaibe nemai ge I ne ningchu diegaibe ze â ning hangge hungzû mak, zai chize deu du deu me lei.

¹²Anui ne chize seu lu tew le ra hangge, ‘Châu ne anui hangge tinggîm ’mbe hang ze anui tailam teikeu ra lau?’ ze acheu ra hangge chize tinggîm ’mbe bamdibe kau mak lei,

¹³zai anui ne chize seu lu tew le ra hangge, ‘Châu ne sungkling tatka ze anui hangge chize teipat ra lau?’ ze acheu ra lau, chize sungkling gene hela ’mbe du bam me lei.

¹⁴Kane chi sam ze â ning hiage la lei; chize â, ning mui ge benai ning lung ge la de lei, chidezai nang tewchi le ra hangge zeu.

¹⁵“Pie gai ni lau, nemai ge I ne ning suage keringbe benai keyibe, kechaibe benai kesiabe kai ’nde lei.

¹⁶Nang ne Tingwang ning Rapeu je hung ze pe gu ’mpuî ramme ge tat ze, zai pe gu samde ramme, zai pe gu rawgaibe hingde ramme, zai hingde-sie tewgaibe ramme tei ze nemai ge I ne ningchu diegaibe Tingwang ning Rapeu gu samde ramme pheu dizai â nang ring gu, zai pung-ze-sa gu lei, zai Tingwang ning Rapeu ne nang heram ’nram le ra gutrabe heram ge ningchu ’nnam gai gu lei.

¹⁷Kane ning lung lietat ti ze nang ne ’ngking mak, kane kêdabe hera ramme je kellum ze penui guâ ’ngguarabe zene ngualietat tizaine â,

¹⁸ningnui ga gu lei be nemai ge I ne ningnui je rang ’nchichiak kai de lei; Jordan ka ze nang gut ze ’nramlerabe heram ge ningnui ringtie ra mak lei.

¹⁹Nemai ge ningnui peireige sakki tew gai ra hangge tinggîm benai kedei je I ku de lei, ningnui suage I ne keringbe benai kechaibe, zai ’nnamgaibe benai desetkaibe kai ’nde lei be zeu; chidaze keringbe je kelâng le lau, dezai ningnui benai ningnui chaname ring le ra hangge zeu,

²⁰Tingwang ning Rapeu je hung ze, zai pe kuâ pheu ze, zai pechu ’mphêugit lu zeu; chize â, nang keringbe benai ning ringting hangge rang de lei; dezai ning paume Abrahambe, Isaakbe, zai Jakobbe dage ningnui je pei gai ra Tingwang ne hatkai’ndibe heram ge nang lung le ra hangge zeu,” ze kacheu de lei.