Read Zeme Naga DEUTERONOMI 31 Bible Online

DEUTERONOMI 31 - Zeme Naga bible

DEUTERONOMI 31

¹Chigum ze Mosabe ne Israelme leine je aipau sam ramme sa’nduâ gai de lei.

²Zai pa ne penui je, “Nemai ge I â a tingkum haî kat ze ’ngkai chang de lei; I â tatpat-tatgutchi ta de lei. Tingwang ne achu, ‘Nang â aipau Jordan kapat ra mak lei,’ kacheu de lei.

³Tingwang ning Rapeu gîmsing ne ning sua tatka raî gu lei; aipau heramzat ramme je pa ne ning suagene tew’nsia ’ndu lei, chidezai nang ne penui ram lu ne ra hangge zeu; zai Tingwang ne ranggai’ndibe luigum ze Joshuabe ne ning sua raî ze kapat ku lei.

⁴Zai Amorme gu heguangme, Sihonbe benai Ogbe zai penai gu heram ze tewka’nsiabe ting ge pa ne tew gai gum ze Tingwang ne penui je tew gai gu lei.

⁵Zai Tingwang ne penui je ningnui ba ge pei gai bu lei, zai I ne ningnui je diegaibeibe samde leine luigum ze penui peireige ningnui tew gai ra lei.

⁶Ranchi ze kuugiereu ze bam lau, penui je hing se lau, zai hingkedun ze bam se lau: ningchu nguatatpeu â Tingwang ning Rapeu daseu; pa ne ningchu ’ngngaî ra mak, zai put kai ra mak lei,” ze kacheu de lei.

⁷Chidadege Mosabe ne Joshuabe je kû gai de lei, zai Israelme leine mikngau gene pechu rang gai ze, “Ning ranchi ze kuugiereu ze bam lau; penui je heram pei gai ra Tingwang ne penui peume dage hatkai’ndibe heram ge nang ne aime bau je ngua lu tatgut kû daseu; zai chige nang ne penui hangge chize ’nzi gai ra lei.

⁸Ning suage tatbepeu ze â Tingwang de lei; ning dage pa bam gu lei, pa ne ningchu ’ngngaî ra mak, zai put kai ra mak lei; hing se lau, zai ning lung chei se lau,” ze kacheu de lei.

⁹Zai Mosabe ne aipau hingde raw gai lu, chize Lebibe name tingkume, Tingwang gu hingdebung puame dage, zai Israelme gu gechîngme leine dage pei gai bei de lei.

¹⁰Zai Mosabe ne penui je die gai ze, “Kum sena kam gai tânege ka’mpatbe tingkum gu ’mpatkaibe hî ge, hetiamki-ngi ramme ge,

¹¹Tingwang ning Rapeu masuage pa ne kelânggairabe bâm ge Israelme leine saplia ra wang dezai, penui seube gene Israelme leine je aipau hingde nang kiâliâ gai ra lei.

¹²Ziemmename, ’mpeumi, ’mpuimi, napoine ramme, zai ning gu namdi ramme ge hesang-rêu ze bamme leine je kûwang’ndui gai lau, chidezai penui seu lu chî lu ze Tingwang ning Rapeu je hingchi le ra, zai ’ntîngteî ze aipau hingde gu sam ramme leine tewchi le ra hangge zeu,

¹³zai chidezai penui name chize chimakme ne seu lu ze Tingwang ning Rapeu je hingchi le ra, ningnui heram ’nram le ra Jordan tatkatatbe heram ge ningnui lung tânege zeu,” kacheu de lei.

¹⁴Zai Tingwang ne Mosabe je, “Pie le lau, nang chairabe ting ze nawang mui de lei; Joshuabe je ku gai lau, zai kakellumbe hetiampaîki ge ningnai wang gai lau, chidezai I pechu rezie langpatkaichi le ra hangge zeu,” kacheu de lei. Zai Mosabe benai Joshuabe tat ze kakellumbe hetiampaîki ge wang gai de lei.

¹⁵Zai kakellumbe-paîki ge kemâu’ntung gene Tingwang ne lia de lei; zai paîki kemui hiage kemâu’ntung sapbam de lei.

¹⁶Zai Tingwang ne Mosabe je rang gai ze, “Pie le lau, nang â ning peume dage jeikeu gai zi gu de lei; chidezai aipau ziemmename ne chu ze penui lung ra tatkairabe heram gu hera kêdabe ramme dage penui pum hangleutew ra peipat kai ze bam gu, zai penui ne achu put kai gu, zai I ne penui dage a gu samhatkaibe I tewgaibe ze penui ne tew’nsia gu lei.

¹⁷Chidezai chipau mai ge penui peireige a lumpumbe kai gu lei, zai penui je I ne sâu gai gu zai penui dagene a ju teitimbai gu lei, dezai penui ga gai kam gu lei; zai kesiabe ramme benai tewkahereube ramme misongga ze penui peireige wang gu, chidezai chipau mai ge penui, ‘Anui Rapeu anui dage bammakbe ziegene aipau kesiabe ramme anui peireige wangchang mak mei?’ acheu gu lei.

¹⁸Zai kesiabe leine penui ne tewgai’ndibe ziegene chipau mai ge I ne a ju tewtimbai sing gu lei, kêdabe hera ramme lam penui ’nreitattibe ziegeneu.

¹⁹Chuna chidaze aipau leu ze ningnai hangge ningnai raw gai le lau, zai Israelme je geteilia gai lau; chize penui mui ge kai be lau, chidezai a hangge aipau leu zene Israelme je sakkitew’ngkuigaibe chang le ra hangge zeu.

²⁰Penui peume je pei gai ra I ne hatkai’ndibe, tungdui benai ’ngkuidui ne luabe heram ge I ne penui je nguawang gai bei dezai, zai penui teu’nggeuting lu penui diluaipat dezai, kêdabe hera ramme lam penui ’nreitat ze penui guâ ’nggua gu, zai achu ngau’nna ze a gu samhatkaibe tew’nsia gu daseu.

²¹Zai penui peireige kesiabe ramme benai tewkahereube ramme misongga ze wangchang dezai, aipau leu zene sakki chang ze penui je gitâu gu lei (penui chaname mui ge aize ’ngngaî ta di ze ring bam gu daseu) penui je I ne pei gai ra hatkai’ndibe heram ge I nguawangrabe suage penui tew ra ’nning’ntua ze bambe tak ramme I â chî daseu,” ze kacheu de lei.

²²Chigum ze chipau mai gîmsing ge aipau leu ze Mosabe raw gai de lei, zai chize Israelme je geteilia gai bei de lei.

²³Zai Nunbe na Joshuabe je Tingwang ne rezie langpat kai ze, “Ning ranchi zai kuugiereu ze bam lau; penui je pei gai ra I ne samhatkaibe heram ge Israel name je nang ne nguagut kai gu daseu; ning dage I bam gu lei,” kacheu de lei.

²⁴Aipau hingde gu sam ramme betun riâ chang ze leisikuak ge Mosabe ne raw kam gai lu dege,

²⁵Mosabe ne Tingwang gu samhatkaibe hingdebung puame Lebime je samdie gai ze,

²⁶“Aipau hingde leisikuak tei lu, Tingwang ningnui Rapeu gu samhatkaibe hingdebung taige kai lau, dezai chize ne ning peireige sakki chang ze chige bam bam ra hangge zeu.

²⁷Nang ’ndaizeuge hekuâpheumeube zai ning lungchibe I â chî daseu; pie le lau, ningnui ruage I ring ze bambe luage, nemai ge Tingwang je ningnui ’nggi ze bam di de lei; I chaidibe chângge ’ndaizeuge ’nggi ze bam ra lau!

²⁸Ningnui zatme gu gechîngme benai ningnui gu saibe ramme je a dage kûwang’ndui gai lau, dezai penui seube ge aipau sam ramme ze I salia gai ra, zai penui peireige sakkitew gai ra tinggîm benai kedei je I kû gai le ra hangge zeu.

²⁹I chaidibe chângge â tâ-kesiabe ningnui tew sing gu, zai I ne ningnui je diegaibe ’mpuî gene lietat sing gu lei be I chî daseu; zai ningnui ba tatew gene pe lumpum tew gai ze, Tingwang mikngau ge tâsiabe ningnui ne tewgairabe ziegene wangdairabe ting ge ningnui peireige kesiabe wangchang gu lei,” kacheu de lei.

³⁰Chidadege Israelme wang ka’nduime leine geseube gene aipau leu gu sam ramme betun-gaibe riâ chang ze Mosabe ne salia de lei: