Read Zeme Naga DEUTERONOMI 32 Bible Online

DEUTERONOMI 32 - Zeme Naga bible

DEUTERONOMI 32

¹“’Ngking gai lau, Hei, tingsung kedibe ramme gau, dezai I sam sa gu lei; zai kedeirei ne peize a mui gene samsapatbe ’ngking le lau.

²Peize a gu geteiliabe tingrui gum ze zaukeu lau, a samsa ze kezik gum ze peipat kai lau, timpei ka’nchiapbe peireige ting kezin-gaibe gum zai reheuneu peireige luakat tingsim ruigaibe gum zeu.

³Tingwang ji I ne rangba gai gu daseu. Tingwang ngeutew’ndi gai lau!

⁴“Chi Tingchutum, pe tatew â yi’nsangsiak lei; pe gu ’mpuî ramme leine ze â ka’nzei daseu. Lungsangtewbe benai hemui-helutgabe Hera, Pelingtewbe benai ka’nzeibe ze â pa lei.

⁵Pe dage pelingmakbe tâ penui tew gai de lei, penui dage heziâk bambe ziegene penui â pe name chang ta de lei; penui â lietattibe benai ka’ngkuibe rehei de lei.

⁶Aigumbe gene ningnui Tingwang je peiruî mei, ningnui kemiebe benai ka’nningbe gabe ziemmename gau? Pa ze ning peu, ningchu ka’ndampeu, ningchu ’ndam gai ze tei’nsapchugaipeu mak mei?

⁷’Ndâ gu naimikpui ramme ze chibam lau, rehei misonggabe gu tingkum ramme ’nning’mmi gai ni lau; ning peu je ’nneu lau, dezai pa ne ningchu teilia gu lei; ning gu gechîngme dage ’mmêt lau, dezai penui ne ningchu ranglia gu lei.

⁸Hulangbe Rapeu ne heramzat ramme je, zai penui heurâ hang peigaibe luage, ziemmename name je pa ne teichâmgaibe luage, pa ne Hera name bambe riak pie ze, zai ziemmename gu herai ramme teleu gai lei.

⁹Tingwang gu hedam ze â pe gu ziemmename de lei, Jakobbe ze pe gu diepatkaibe hedam de lei.

¹⁰“Pa ne pechu tingkangram gene, zai tingkangram gu ’nduloa tingkai guihim bambe gene ngaudau de lei; pa ne pechu guâgit bam de lei, pa ne pechu ’nningkatinggeu de lei, pa ne pechu pa kehungbe leine kai de lei.

¹¹Kelie pechip tew’ngngai ze, zai bepoine peireige pekan kelaprai-rai bambe gum, pe kan kehingpat ze penui je pua ze, pe kentua peirei gene penui je pungbe gum,

¹²Tingwang runne ne pechu kanggua de lei, zai hesangme ram gu hera pe dage bam mak lei.

¹³Pa ne kedeirei gu peloa kehube bâm ramme, benai peireige kinrua ra pechu tew gai bei de lei, zai helu gene tewpatbe rachî pa teu de lei; zai pa ne pechu tingchutum gene ’ngkuidui tup ra, zai chusang gene taudui pat ra tew gai bei de lei.

¹⁴Penui gu getum benai kemei ramme ne tungdui misongga pei lei; penui dage meli, kemei ramme, zai kauruidung, zai dekuîmeu yibe ramme benai wain yi-ka’nteube ramme bam lei.

¹⁵“Kane Jeshurun cha di de lei, zai pe pî kakesâng de lei; nang cha di de lei, nang heseudei di de lei, nang diluai bam di de lei; chidadege pechu ka’ndampeu Hera je pa sâu gai ’ndi de lei, zai pe gu tewka’nringbe Chutum je pa ngau’nna di de lei.

¹⁶Kêdabe hera ramme je pa hemimeu ra penui ne pechu hû’nrak kai bei de lei; ngaukatenetbe tatew ramme zene pa pe lumpum ra penui ne tew gai bei de lei.

¹⁷Penui ne hera makbe ramme, herasiabe ramme dage herâtewbe pei gai de lei, hera karchibe ramme zuapat karchibe, zai ningnui peume ne mâdau de hingmakbe hera ramme jeu.

¹⁸Ningchu lungkeugaibe Tingchutum je nang â ’nningkatelam de lei, zai ningchu lungkeugaibe Hera je nang â ’ngngaî ’ndi de lei.

¹⁹“Tingwang ne chize ngau lu, zai chiramme ngaugailak ti de lei, pe name ’mpeumi benai ’mpuimi ramme ne pe lumpum tewgaibeibe ziegeneu.

²⁰Zai pa ne rang ze, ‘I ne penui dagene a ju tei’mbia ’ndu lei, penui ’ndaikau chang gai gu mei be I pie gu lei, penui â lungmaudibe rehei, lungsangtewbe gabe napoine ramme daseu.

²¹Hera makbe je I hemimeu ra penui ne achu tew’nrak kai bei de lei; penui gu heraluîtewbe ramme ne penui ne a lumpum tew gai bei de lei. Chigum ze heramzat makme je penui hemimeu ra I ne tew’ngngai gai gu lei.

²²A lumpumbe zene hemi’ntau gai bei daseu; zai chize ne Kechaimeram gechukbe riâ tauchang lei, kedeirei zai chigene patbe leine rû’ngga ze, zai kedeiloa hube pîkam ramme hemi ne rû lei.

²³“ ‘Zai kesiabe ramme I ne penui peireige kuachu gai gu lei; I ne a gu bai’mpitu ramme penui peireige ’mpat kai gu lei;

²⁴ka’njeibe gene penui pum siakeu du lei, zai hemitaube kelumbe ted benai herarît kesiabe ne tew’ngga kam gai gu lei; zai penui je ’nggi ra hekaune gim ramme I ne lang gai gu lei, kedei ge liaruabe zat ’nchai geteube benai zeu.

²⁵Hela ge hiazutkie ne putzîng bam ra tew gai gu zai hekisiâm ramme ge mi kehingbe bam gu, rehang’mpeu benai heleu’mpui, ’ngngiêne tungbe kau benai pe peî pûdibe kau je tew’nsia gu lei.

²⁶I ne acheu ze sa gai bu lei, “Kedeu ’mbe penui je I ne kumtuararip kai gu lei, ziemmename ruage penui je chibam ta de ra I ne tew gai gu lei,” ze acheu zeu,

²⁷heteureime lumpum tewgairabe je I hing mak nung laîzai, penui teureime ne ’nningmau gai mak ra penui ne, “Anui ba ne duî lu de lei, Tingwang ne airamme leine tew gai mak lei,” acheu sa mak ra hangge neu,’ ze kacheu de lei.

²⁸“Penui â geteiliagaibe gabe heramzat daseu, zai penui ge â mâ-gechîbe ga lei.

²⁹Penui kaningching laîzai â, aize penui ’nningchi gu de lei, bechâng dezai penui dage wangchangrabe penui ’nningchi leu gu lei!

³⁰’Ndaigum ze hangkat ne changme je ’nsa ra, zai hangna ne chang kereume je guatuachi ra lau, penui je penui gu Tingchutum ne zua gai, zai Tingwang ne penui je peipat kai le makchai neu?

³¹Penui gu Tingchutum â anui gu Tingchutum gum mak daseu, anui teureime ’nsangne du chî lei.

³²Penui gu grepchîria â Sodom gu grepchîria gene pat, zai Gomorra gu helu ramme gene wang lei; penui gu grepchî ramme â tewchatrabe grepchî ramme lei. Grepchî huâ ramme â kari tai lei;

³³penui gu wain â henêu ’nchai geteube, zai mechinêu ramme ’nchai kesiabe lei.

³⁴“Aize a dage kaigekua gai ze, a gu a heu gekuagaibe bâm ge kainamting gai mak mei?

³⁵Hekûmtewbe benai peiruîrabe â a gu lei, penui pî chaîlîk’nderabe ting ge zeu; penui je tew’nsiagairabe mai a na di daseu, zai penui je tew’nsiagairabe kelua ze wang mui de lei.

³⁶Tingwang ne pe gume je samram’nzei gai gu, zai pe guâ ka’ngguame peireige pa ngauka’nggiabe bam gu lei, penui gu reziechibe â ga de lei be pa ngau dezai, zai kebang mei nune ripatlube kau mei be mî de ’nsakkaibe ga di dezai neu.

³⁷Chidezai, ‘Pa ne penui pe gu hera ramme ’ndaige la lau, penui ka’nseube tingchutum zeu,

³⁸penui herâtewbe peigaibe gu pechâ teube, zai penui gu sakbe herâtewbe peipatbe sakpeu zeu? Peize penui ne zuachu ze ningnui je ’ngnga be lau, peize penui ne ningnui je danggaihabe hang chang be lau!’ ze acheu gu lei.

³⁹“ ‘Pie gai ni lau, chunage I zeu, I ze du pa de lei; zai achu sâu ze hera kêdabe ga lei; I ne tewchat zai I ne tewka’nring lei; I ne tewjâm zai I ne teleuka’mmi lei; zai a ba gene ’nripatduibe kau mî de ga lei.

⁴⁰I a ba tinggîm ’mbe huachu gai de lei, I ne deseu gai ze, betingbeta I ring bam daze,

⁴¹I ne a gu hekie hâ’nchiepuangbe kedau gai dizai â, zai samrambe bâm ge a ba ne chize herak kai dizai â, a teureime peireige I hekûm lu gu, zai achu ngaugailakme je I ruî gu de lei.

⁴²A gu bai’mpitu ramme ne hejai ne meneu ra I ne tew gai gu, zai a gu hiazutkie ne hemei teu kam ’ndu lei — tewchatkai’ndime jai benai kebang changme jai gene, besuitewme heteureime peî ramme gene patbe geneu,’ ze kacheu de lei.

⁴³“Pe gu ziemmename benai hesuiyi’nta lau, Hei, ningnui heramzat ramme gau; pe guâ ka’ngguame gu hejaipâu pa ne ruî daseu, zai pe teureime peireige pa ne hekûm lu, zai pe gu ziemmename gu heram hangge desieyibe, zai kelunbe-râtewbe tew gai daseu,” kacheu de lei.

⁴⁴Mosabe wang lu baudime geseube gene aipau leu gu samkie leine kiâpat kai de lei, pa benai Nunbe na Joshuabe zeneu.

⁴⁵Zai Mosabe aipau sam ramme Israelme leine dage salia kam gai lu dege,

⁴⁶pa ne penui je rang gai ze, “Nemai ge ningnui peireige I sam ramme teihelakkaibe leine ningnui lung ge kai le lau, dezai chiramme ningnui ne ningnui name je rangliachi le ra hangge zeu, chidezai aipau hingde gu sam ramme leine ’ntîngteî ze penui teichi le ra hangge zeu.

⁴⁷Aize ningnui hangge mâ-peruânggabe mak daseu, kane aize ningnui gu keringbe de lei, zai chigene ningnui heram ’nram le ra Jordan kapat ze tatbe heram ge ningnui ringtie gu lei,” kacheu de lei.

⁴⁸Zai chipau mai gîmsing ge Tingwang ne Mosabe je rang gai ze,

⁴⁹“Aipau Abarim gu kedeiloa, Nebo Deiloa, Jeriko gene katlam ’mbia Moabram ge bambe ge chu de zu lau; zai heram ’nram ra hangge Israelme je I ne peigaibe Kanaanram ze senpie gai ni lau;

⁵⁰zai nang chugaibe deiloa gene chai de zu lau, zai ning sikina kau Aaronbe Hor Deiloa gene chai di ze pe gu ziemmena dage baiheruagai’ndibe gum ze ning gu ziemmena dage peize baiherua gai be zu lau;

⁵¹Zin gu tingkangram ge Meri-bath-kades sungkling ge Israelme bau ruagene ningnui ne achu ’nning’nsiagai’ndibe ziegeneu; Israelme ruage ningnui ne achu ka’nchibe hang riam gai ze hengêutewmakbe ziegeneu.

⁵²Ning suage heram ze nang ngau gu lei; kane chilia Israelme je I ne peibe heram lung ’mbe nang a gut ra mak lei,” kacheu de lei.