Read Zeme Naga DEUTERONOMI 33 Bible Online

DEUTERONOMI 33 - Zeme Naga bible

DEUTERONOMI 33

¹Aize Hera gu ziemmena Mosabe gu ’nnam Israel name je pa chairabe suage ’nnamgaibe de lei.

²Pa ne sa ze, “Sinai gene Tingwang wang de lei, zai Seir gene anui peireige tingbapat te lei, Paran Deiloa gene pa ne pa’mbi lerbapat kai de lei, pa hezat’mbia ge hemi tauben ze, ziemmena ka’nchime chang kereume ruagene pa â zuapat te lei.

³Eu lei, pe gu ziemmena je pa hung de lei, pe dage diepat’nchilube kau leine â, pe ba ge bam de lei; chigum ze ning pîpa ramme chai penui sui de lei, ning dagene teiliabe ngau lu zeu,

⁴anui zatme heurâ hang yilangbe chang ze, Mosabe ne anui je hingde peibe luage zeu.

⁵Chigum ze Jeshurun ge Tingwang ne heguang chang di de lei; ziemmename gu besuitewme je teiwang heruagaibe luage, zai Israelme kibau leine wangheruagaibe zeu.

⁶“Peize Reubenbe chai mak ze ring bam lau, pe gu ziemmena ramme du peize gechâmne bam se lau.”

⁷Zai Juda je pa ne aize sa gai de lei: “’Ngking gai lau, Hei Tingwang, Judabe kuâ zeu, zai pe gu ziemmena dage pechu nguawang gai be lau. Pe hangge ning ba ne ’nggi gai lau, zai pe teureime je ka’nggibe ge pechu ka’ngngâpeu chang be lau,” kacheu de lei.

⁸Zai Lebibe deu ge pa ne aize sa gai de lei, “Lebibe je ning gu Thummim pei be lau, zai Urim ze nang ne ka’nchâme ziemmename je pei be lau, Massah ge nang ne kedaklube kau je, Meriba gu sungkling ge nang kedaklube kau jeu;

⁹pe pui benai pe peu je pa ne, ‘I â penai je mâ-hangge chak kai mak lei,’ kacheupeu zeu; pe sikiname je pa â chî mak te lei, zai pe name je ’nningtinggeu mak te lei. Penui â ning sam ze reî ze, zai ning gu samhatkaibe tei daseu.

¹⁰Penui ne Jakobbe je ning gu hingde tewgaibe ramme geteilia gu, zai Israel je ning gu hingde geteilia gu lei; penui ne ning masuage mâ-perîmyibe kai gu, zai ning gu herâtewbe-kaira ge rûkambe-râtewbe pei gai gu lei.

¹¹Hei Tingwang gau, pe gu merua je ’nnam gai be lau, zai pe ba tatew lutau gai be lau; pe teureime zai pechu ngaugailakme kia ramme tew’nsia gai be lau, dezai penui zuachu dai mak ra hangge zeu,” ze acheu zeu.

¹²Benjamin je pa ne, “Tingwang kehungpeu, pe taihia ge pa tenang mak ze bam lei; naimikpui tâluî pa ne pechu guâgit bam lei, zai pe keîtoa kena kakge pa lungbe bâm hang tew lei,” kacheu de lei.

¹³Zai Josepbe dage pa ne rang gai ze, “Pe ramdei ze Tingwang ne ’nnamgaibe peize chang lau, kehu ’mbe tinggîm gu kela yilangbe ramme neu, zai ’ngkang ’mbe jeibe gechukbe gu neu,

¹⁴naimik gu mâ-hêrachi yilangbe ramme ne, zai hekêu ting ramme gu keheube patbe neu,

¹⁵gechîng ting deiloa ramme gene perachî keyibe patbe ne, zai betunmakbe deiloa ramme gu keheube neu,

¹⁶kedei gu kela yilangbe ramme benai chige puiting ze bambe ne, zai reheupuîtum ge bambepeu pe suiyibe neu. Airamme ze Josepbe peireige peize wangchang lau, zai pe sikiname ruagene kaheguangpeu peize chang lau.

¹⁷Pe gu lungkeuraibe getumsei â pengêudi lei, zai bekie ramme â mangbui kie ramme de lei; chiramme zene ziemmena je ’ntâu gu lei, penui ’nteumena je kedei mik deulang ’mbe ’ntâutua ’ndu lei; Ephraimme gu chang kereume â chigum de lei, zai Manassebe gu changme â chigum de lei,” kacheu de lei.

¹⁸Zai Zebulun deu ge pa ne sa ze, “Zebulun gau, nang tatpatbe ge hesuiyi’nta lau; zai Issakarbe gau, ning gu hetiampaîki ramme ge hesuiyi’nta lau.

¹⁹Penui ne ziemmename je penui gu kedeiloa ’mbe kûwang gu lei; chige penui ne kagesangbe herâtewbe ramme pei gai gu lei; penui â sungkling gu lungyibe tupteu, zai deseîzeu gu keheube baigaibe luteu daseu,” kacheu de lei.

²⁰Zai Gad deu ge pa ne sa ze, “Gadram tew’ndigaibe kau je â ’nnam gai be lau! Gad â duilui gum ze lîmkua bam lei, pa ne heba’ngkoâk zai hepeî’nning kuipâng lei.

²¹Pa ne heram yilangbe pe hangge kakelâng lei, chige hereikang muitewpeu gu hedam reîkua gai bam daseu; zai ziemmename gu besuitewme dage pa wang de lei, Israelme dage Tingwang gu samdiegaibe ramme, benai hingde kapelingbe ramme pa ne tew gai de lei,” kacheu de lei.

²²Zai Dan deu ge pa ne sa ze, “Danbe â Bashan gene ’nsakpatbe duilui poine lei,” kacheu de lei.

²³Zai Naphtali deu ge pa ne sa ze, “Hei Naphtali gau, ka’nchâbe ge helungwângchang ze bam lau, zai Tingwang gu ’nnamgaibe zene puigit ze bambe kau gau, ’ngkiêzai benai tingpî lu le lau,” kacheu de lei.

²⁴Zai Asher deu ge pa ne sa ze, “’Mpeuminapoine ramme peireige Asherbe je ’nnam gai ze bam lau; pa ze â peize pe sikiname ne ’nchâlangbe chang lau, zai peize taudui ge pe pî sûm lau.

²⁵Ning gu ’ngkamcha ramme â hegeî benai kangngâgeî ne gu lei; zai nang ring bam tâne ning ran du chi ze bam gu lei.

²⁶“Hera gumbe kau mî de ga lei, Hei Jeshurun gau, ningchu ’ngngâ ra hangge pa â tinggîm ramme gene chua lu wang lei, zai pe gu pengêudibe gene tinggîm tatpelatat lei.

²⁷Betunmakbe Hera ze nang ka’nseube bâm lei, zai bekang ’mbe â betunmakbe ba bam de lei. Zai pa ne heteureime je ning sua ’mbe guatua gai ze, zai tew’nsia gai be lau,” kacheu de lei.

²⁸Chigum ze Israelme temichai ze lung de lei, Jakobbe gu depin runne lei, chêu benai wain ramme ge zeu; eu lei, pe gu tingsung kedibe ramme ne kezik kêu lei.

²⁹Ning paurega lei, Hei Israel gau! Nang gumbe kau zeu, Tingwang ne ripatkaibeibe kau, ningchu ka’ngngâbe hinggei, zai ning gu kengambe hiazutkie changgaibeibe gumbe kau châu la lau! Ning teureime hingkedun ze ning dage wang gu lei; zai nang ne penui gu kehube bâm ramme chaîkeniak ku lei,” kacheu de lei.