Read Zeme Naga DEUTERONOMI 34 Bible Online

DEUTERONOMI 34 - Zeme Naga bible

DEUTERONOMI 34

¹Zai Mosabe â Moab kâm gene Nebo Deiloa ’mbe, Jeriko gene kêda ’mbia, Pisga loa ’ntûm ’mbe hang di de lei. Zai heram leine Tingwang ne pechu teilia kam bei de lei. Gilead gene Dan,

²Ephraim benai Manasse, Naphtali leine, Judaram leine, Tingrun Sungkling riâ changbe,

³Negeb, zai Bekâmram, chize â, mêupi bang ramme gu namdi Jeriko kâm, Zoar riâ chang zeu.

⁴Zai Tingwang ne pechu acheu ze, “ ‘Ning chaname je I pei gai gu lei’ ze, Abrahambe, Isaakbe, zai Jakobbe dage I deseugaibe heram ze aize de lei. Chize ning mik ne ngau le ra I ne lun bei de lei, kane chilia ’mbia nang kapat mak ra lei,” kacheu de lei.

⁵Chigum ze Tingwang gu sam luigumbe gene, Moab dei ge Tingwang guâ ka’ngguapeu Mosabe chige chai gai di de lei,

⁶zai pa ne pechu Beth-peor gene katlam ’mbia Moabram ge pechu bekâm ge bai gai bei de lei; kane nemai riâ chang ze mî de pe chu baigaibe bâm chî mak lei.

⁷Mosabe â pa chaibe ting ge pe kum haî kat ze ’ngkai di de lei; pe mik kezin mak, zai pe ranchi du ’ngngînkeu mak bam de lei.

⁸Zai Israelme Moab kâm ge Mosabe je hezie himreu kechaiheu ze bam de lei; chipau châng dege Mosabe je puîhapbe ting benai kadesuibe ting ze kam gai di de lei.

⁹Zai Nunbe na Joshuabe â kaningchingbe herui ne puigit bam de lei, Mosabe ne pe peireige pe ba die gai bei dadegeu; chipauziegene Israelme ne pe kuâ pheu de lei; zai Tingwang ne Mosabe je diegaibe luigum tew de lei.

¹⁰Zai Israelram ge Mosabe gumbe kau kemeu’mpeu, Tingwang ne pe ju luitak chibe kau, mî de pat mak lei,

¹¹ka’nchetbe benai ningdaulakbe ramme tew gai ra Ijipram ge, Pharaobe benai pe guâ ka’ngguame dage zai pe ram pelane ge Tingwang ne pechu langgaibe ge,

¹²zai Israelme leine mikngau ge Mosabe ne pe ranchibe rezie leine zai tâ kedibe benai kehingbe leine tewgaibe ge pa gumbe kau mî de ga de lei.