Read Zeme Naga DEUTERONOMI 4 Bible Online

DEUTERONOMI 4 - Zeme Naga bible

DEUTERONOMI 4

¹“Zai chunage Israelme gau, I ne ningnui je geteiliabe hingde tewgaibe benai hingde rawdiakkaibe ramme ge ningnui lung kai ze chiramme tew lau; chidezai ningnui ring le ra zai gut ze Tingwang ningnui peume Rapeu ne ningnui je peibe heram ze ’nram le ra hangge zeu.

²Ningnui je I ne diegaibe sam ge ningnui ne kaisî gai mak ra zai chigene lu du lutua mak ra lei; chidezai Tingwang ningnui Rapeu gu samde ramme ningnui je I ne diegaibe ramme ze ningnui reîchi le ra hangge zeu.

³Baal-peor ge Tingwang ne ’ndaikau tew gai mei be ningnui mik ne ngau lu de lei; Peor gu Baal chaisuime ziemmename leine je ningnui ruagene Tingwang ning Rapeu ne tew’ngga gai bei daseu;

⁴kane Tingwang ningnui Rapeu je tei’ntiplume â nemai ge ’nteumena ring la lei.

⁵Pie le lau, Tingwang a Rapeu ne achu diegaibe luigum ze hingde tewgaibe ramme benai hingde rawgaibe ramme ningnui je I geteilia gai ’nde lei, chidezai heram ’nram le ra ningnui gutrabe heram ge chiramme ningnui tewrabe hangge zeu.

⁶Chiramme reî ze ningnui tew lau; ziemmename ne aipau hingde tewgaibe ramme leine seu lu ze, ‘Aipau heramzat kedibe zat ze â pelingsing ze kaningchingbe benai mâ-gechîbe ziemmename run lei,’ ze acheu dezai chize ningnui kaningchingbe benai mâ-gechîbe chang gu daseu.

⁷Anui ne pechu kûgaibeibe luage anui dage wang’nchut-desang ze bambe Tingwang anui Rapeu gum ze ’ndaikau heramzat kedime gu hera la lau?

⁸Nemai ge ningnui suage I kaigaibe hingde tewgaibe ramme benai hingde rawgaibe ramme aipau hingde leine gum ze pelingsingbe hingde teibe heramzat kedibe ’ndaikau la lau?

⁹“Kane ’ntîng le lau, zai nang â ning lung ’ntiprip ze bam lau, ning mik ne ngaulube ramme nang ’ngngaî mak ra zai nang keringbe ting tâluî ning lung gene chiramme rimna mak ra hangge zeu; ning name benai ning chame je chiramme geteilia gai lau —

¹⁰’ndaigum ze Horeb loa ge Tingwang ning Rapeu suage nang sapbe mai ge nang ne a dage rang gai ze, ‘A dage ziemmena je gekumwang’ndui gai lau, dezai a sam ramme penui seu le ra I pei gai le ra, chidezai kedeirei ge penui ringbeting tâluî achu hingchi le ra zai chigum ze penui name je geteiliachi le ra hangge zeu,’ ze kacheu mei be zeu.

¹¹Zai ningnui wang’nna ze tinggîm riâ chang ze, kedeiloa hemitau ze, kemuîbe, kemua zai muîruibe ne chûmgit bambe luage kedeiloa pî ge ningnui sap te lei.

¹²Chidadege hemi zuilung gene Tingwang ne ningnui je ’mpau pat te lei; sam ramme sabe kuâ ningnui seu de lei, kane bekau ngau mak te lei; hekuâ runne seu de lei.

¹³Zai pe gu hingde ningnui tew ra pa ne diegaibe pa ne ningnui je rangba gai de lei; chize hingde kereu de lei, zai chiramme tingchudepei kena ge pa ne raw gai de lei.

¹⁴Zai ningnui je hingde tewgaibe ramme benai hingde rawgaibe ramme geteilia ra Tingwang ne chipau ting ge achu samdie gai de lei, dezai ningnui heram ’nram ra tatkapatrabe heram ge chiramme ningnui tewchi le ra hangge zeu.

¹⁵“Chidaze ningnui runne ’ntîng le lau. Hemi zuilung gene Horeb loa ge Tingwang ne ningnui je ka’mpaube mai ge bekau ningnui ngau mak daze,

¹⁶ningnui runne ningnui hangge heraluî hang tew gai ze, mâ-luî, ’mpeumi luîtak gene mei nune ’mpuimi luî ka’nzuâbe gene mei,

¹⁷kedeirei ge hekaune bambe luî gene mei, tingkai ge liamruabe ’nruine luî gene mei,

¹⁸kedei ge liaruabe kau luî gene mei, kedeisîng ’mbe hedui ge hekâ bambe kau luî gene mei ze tew gai ze bambe gene tâ-kesiabe tew gai mak ra ’ntîng le lau.

¹⁹Zai tinggîm ’mbe ning ma pie’ngngangchu gai ze, naimik benai hekêu zai hegi ramme, tinggîm ge misongga bambe ramme nang ngau dezai tingkehube kangge ziemmena bamme leine hangge Tingwang ning Rapeu ne peigai’ndibe ramme peireige ning lung pei gai ’ndi ze chiramme je kellum ze penui guâ ’nggua ze bam mak ra ’ntîng le lau.

²⁰Kane nemai riâ chang ze bambe luigum ze, Tingwang ne ningnui je tei lu hegeî rube ’mmang gene Ijipram gene pe gu ziemmena chang ra ningnui je nguapat kai bei de lei.

²¹Chipau peireige du ningnui ziegene a peireige Tingwang pe lumpum de lei, zai I â Jordan ka mak ra zai Tingwang ning Rapeu ne ning heurâ hang peigaibe heramyibe ge I â gut ra mak lei ze pa ne hat kai ’ndi de lei.

²²I â aipau dei ge chai gai himchang gu daze, I â Jordan ka mak sing gu lei; kane ningnui â kapat ze chipau heram yibe ze ’nram gu lei.

²³Ningnui dage Tingwang ningnui Rapeu ne pe gu samde tewgaibe ramme ’ngngaî nan ze Tingwang ning Rapeu ne ningchu nambe heraluî chiam mak ra hangge ningnui runne ’ntîng le lau.

²⁴Tingwang ning Rapeu â rûka’nggabe hemi, pelunggailakbe Rapeu daseu.

²⁵“Ning name zai ning chame je ning dagene piakeu ze, zai heram ge ningnui gechîngbe riâ chang dezai, mâ-luîtew ze heraluîtewbe gene tâ-kesiabe ningnui tew dizai â zai Tingwang lumpum tew gai ra Tingwang ningnui Rapeu mikngau ge kesiabe tew dizai â

²⁶Jordan kapat ze ningnui heram ’nram-lerabe heram gene kelua ze ningnui ga’nzâu gai du lei be nemai ge ningnui peireige sakkitew gai ra tinggîm benai kedei je I ku de lei; chipau dei ge ningnui bamtie mak ku lei, kane tew’ngga kam ’ndu lei.

²⁷Zai heramzat kêdame ruage Tingwang ne ningnui je tewtimrarip kai bu lei, zai ningnui je Tingwang ne kumpatkairabe heramzat kêdame ruage ningnui â periak cham ze bam ra sâudiak kai bu lei.

²⁸Zai chige ningnui â heching-tingchu râ ramme, ziemmename ba ne chiamgaibe, ngauchi mak, seu du seuchi mak, zai mâ-rîm du chimakbe râ ramme guâ ’nggua gu lei.

²⁹Kane Tingwang ning Rapeu je chigene nang peu gu lei, zai pechu nang peudau gu lei, nang ne ning lung leine ne zai ning keringbe leine ne pechu peu dizai ai.

³⁰Nang lungkahereube ge bambe luage, zai bechâng dezai airamme leine nang peireige wangchangbe luage, Tingwang ning Rapeu dage nang helatwang ze pe kuâ pheu gu lei,

³¹Tingwang ning Rapeu â ngauka’nggiabe Rapeu daseu; ningchu pa ne put kai ra mak, zai tew du tew’nsia ra mak, zai ning peume dage samhatkaibe penui dage pa ne deseugai’ndibe ze du ’ngngaî ra mak lei.

³²“Kedeirei ge Hera ne ziemmena je ’ndamgaibe gene seu ze ning sua ’mbe tattibe ramme tingtie rasam chunage ’mmêt kai ni lau, zai aigumbe mâ-kedibe mâdauge wangchang gai di de mei nune mâdau seutâu gai ’ndi de mei be tingmik katlam ’mbia gene kêda ’mbia riâ chang ze ’mmêt kai ni lau.

³³Nang seu lu da zai ring ze la daze, mâdauge â hemi zuilung gene Hera kuâ sapatbe seulube kau ziemmena mige â la mei?

³⁴Ningnui mikngau gene Tingwang ningnui Rapeu ne ningnui hangge Ijipram ge tewgaibe ramme leine gum ze, kakedakbe ramme gene, ’nchet ra teiliabe ramme gene, tâningdaulakbe ramme gene, zai kahereibe gene, reziechibe ba gene benai heba getuapatbe gene, zai mi kehingbe kedibe ramme gene, kêdabe heramzat ruagene heramzat kat ze pe hangge tat ze lu le ra hekagaibe hera mâdauge â la mei?

³⁵Tingwang â Hera lei be nang chî le ra ningchu â chize teilia bei de lei; pechu sâu ze kêdabe mî de ga lei.

³⁶Pa ningchu laddeigaichi le ra hangge tinggîm gene pe kuâ patbe nang seu le ra pa ne pei bei de lei; zai kedei ge nang pe gu hemi reziechibe ngau le ra pa ne pei bei de lei, zai hemi getaube lung gene pe sam ramme nang seu de lei.

³⁷Zai ning peume je pa ne hung ze penui chângge lungleîme penui chaname je pa ne kelânglube ziegene, zai pa ne ngau lu ze Ijipram gene ningchu nguapat kai bei, zai pe gu reziechibe gene

³⁸nemai ge gum ze ningnui heu hang penui ram pei gai ra ningchu nguagut kai ra hang ning masua gene ningnui suadu pezat kedime benai peranchime heramzatme je kumtua gai bei de lei;

³⁹nemai ge chidaze chî le lau, zai kehu ’mbe tinggîm ge benai ’ngkang ’mbe kedei ge Tingwang â Hera lei be ning lung ge kai le lau; kêdabe kau â ga de lei.

⁴⁰Chidaze nemai ningchu I diegaibe pe gu hingde ramme benai samdiegaibe ramme nang tei ra lei, dezai nang benai ning chaname ning chângge lungleîme hang yi gu lei, chidezai betingbeta hang Tingwang ning Rapeu ne ningchu peibe heram ge nang ringtie le ra hangge zeu,” kacheu de lei.

⁴¹Chidadege Mosabe ne Jordan gene tingbia ’mbia giam ge namdi kechum diepatchâm gai de lei,

⁴²Chidezai ziemmena je tewchatbe kau, tingtie’ngka ge pe teurei chang ze bambe gene mak ze, kane tewmaube (hemâu-hemâ) gene pe kining’mpeu je tewchat’ndibe kau aipau namdi ramme ruage namdi kat ge pakkaibe gene pa keringbe kechai ’nreipatchi le ra hangge zeu;

⁴³Reubenme hangge tingkangram gu peloaningsing ge Bezer namdi, zai Gadme hangge Gilead ge Ramoth namdi, zai Manasseme hangge Bashanram ge Golan namdi ze de lei.

⁴⁴Aize Israel name suage Mosabe ne kaibe hingde de lei;

⁴⁵airamme ze Israel name dage Ijipram gene penui zuapatbe ting ge Mosabe ne ranggaibe, geteiliabe ramme, hingde tewgaibe ramme, zai hingde rawgaibe ramme de lei,

⁴⁶Jordan ka ze katlam giam Beth-peor gene kêda ’mbia bekâm ge, Mosabe benai Israel name ne Ijipram gene penui patbe ting ge duî’ndipeu, Heshbon ge lungpeu, Amorme gu heguang Sihonbe ram gezeu.

⁴⁷Zai penui ne Sihonbe gu heram benai Bashan gu heguang Ogbe ram, Jordan gene tingbia ’mbia giam ’mbe lungbe Amorme gu heguang kena ram lu ’ndi de lei,

⁴⁸Arnon kâm betun-gaibe ge bambe Aroer gene Sirion Deiloa riâ chang ze (chize Hermon loa de lei),

⁴⁹Jordan gene tingbia ’mbia Pisga loa ’ngkum ge Araba dei pelane Araba gu sungkling riâ chang zeu.