Read Zeme Naga DEUTERONOMI 5 Bible Online

DEUTERONOMI 5 - Zeme Naga bible

DEUTERONOMI 5

¹Zai Mosabe ne Israelme leine je kûwang’ndui lu, penui je rang gai ze, “’Ngking le lau, Hei Israelme gau, nemai ge ningnui geseube ge hingde tewgaibe ramme benai hingde rawgaibe ramme I saliabe zeu, zai chiramme ningnui getei ra, zai chiramme tew ra hangge chî’mmi le lau.

²Horeb ge Tingwang anui Rapeu ne anui dage samhatbe tew gai de lei.

³Anui peume dage Tingwang ne aipau samhatbe tew gai mak lei, kane anui ’nteumena nemai ge ring ze aige bamme dage hat kai de lei.

⁴Hemi getaube zuilung gene Tingwang ne kedeiloa gene heju ne heju hedau ze ningnui je ka’mpau de lei,

⁵Tingwang gu sam ningnui dage rangba gai ra hangge chipau luage Tingwang benai ningnui kakge I sapbe luage zeu; hemi getaube je ningnui â hing ze ningnui â kedeiloa ’mbe chu mak tai dadegeu, chigum ze pa ne rang ze:

⁶“ ‘I â Tingwang ning Rapeu, Ijipram gene kebangtewbeki gene ningchu nguapatkaipeu lei.

⁷“ ‘Achu sâu ze kêdabe hera ramme je nang kellum mak ra lei.

⁸“ ‘Ning runne ning hangge heraluî tew gai mak ra lei, zai kehu ’mbe tinggîm ge bambe kau mei, nune ’ngkang ’mbe kedei ge bambe kau mei, nune kedeisîng hedui ge bambe kau mei be luî hang tew gai mak ra lei;

⁹chiramme je nang keikeu kellum mak ra, zai penui guâ ’nggua mak ra lei; I Tingwang ningnui Rapeu â pelunggailakbe Rapeu, penui paume gu hemui-helut ziegene achu ngaugailakme chaname rehei kechum benai medai riâ chang ze ’ngkiâmie bampeu lei,

¹⁰kane achu hungme, a gu hingde ramme teime changsenângme dage hungka’ntipbe teiliabe Rapeu lei.

¹¹“ ‘Peruânggabe gene Tingwang ning Rapeu ji nang tei mak ra lei; peruânggabe gene pe ji teibe kau peireige Tingwang ne pemâugabe kau hang tei gai ra mak daseu.

¹²“ ‘Tingwang ning Rapeu ne ningchu samdiegaibe luigum ze ’ntakbambe mai ze, chize ka’nchibe chang ra, reibam ra lei.

¹³Hezie seruk ne nang tâtew ra, zai ning tâ leine tew ra lei;

¹⁴kane pasenabe mai â Tingwang ning Rapeu hangge ’ntakbambe mai lei; chipau mai ge mâta du nang tew mak ra lei, nang mei nune ning na ’mpeumi mei nune ning na ’mpuimi mei, nune ning guâ ka’ngguapeu mei, nune ning guâ ka’ngguapui mei, nune ning gu getumsei mei, nune ning gu hekunmerângne mei, nune ning gu kaurui mei, nune ning gu keriekemui ramme lungge hesang chang ze bambe kau mei ne du tâtew mak ra lei, dezai nang gum ze ning guâ ka’ngguapeu benai ka’ngguapui du sau’ntak kai le ra hangge zeu.

¹⁵Ijipram ge nang â kebang chang ze bam de lei, zai Tingwang ning Rapeu ne reziechibe ba benai pe ba getuapatbe gene chigene ningchu nguapat kai bei de lei be chibam ra lei; chipauziegene ’ntakbambe mai reibam ra Tingwang ning Rapeu ne ningchu samdie gai de lei.

¹⁶“ ‘Tingwang ning Rapeu ne ningchu samdiegaibe luigum ze ning peu benai ning pui ngeutew lau; dezai nang keringting tew’ntie gai be ra hang, chidezai Tingwang ning Rapeu ne ningchu peibe heramyibe ge nang bam le ra hangge zeu.

¹⁷“ ‘Nang gî mak ra lei.

¹⁸“ ‘Kahemabe tâ du nang tew mak ra lei.

¹⁹“ ‘Nang hega mak ra lei.

²⁰“ ‘Ning kining’mpeu peireige nang karasa ne sakki tew gai mak ra lei.

²¹“ ‘Ning kining’mpeu nâu je nang ’nchie mak ra lei; ning kining’mpeu ki, pe gu helu, pe guâ ka’ngguapeu mei, nune pe guâ ka’ngguapui mei, pe gu getumsei mei, nune pe gu hekunmerângne mei, nune mâge â pe gu chang ze bambe zat je nang ’nchie se lau,’ kacheu de lei.

²²“Aipau sam ramme ze hemi getaube, kemâu, zai muiterîngbe zuilung gene, hekuâchibe gene ningnui ’nteumena wangka’nduibe ge Tingwang ne ningnui je ka’mpaube sam ramme de lei; zai pa mâ de sapeî dai ta di de lei. Zai chiramme ze tingchudepei kena ge pa ne raw gai de lei, zai chiramme achu pei de lei.

²³“Zai kedei loa ge hemi taube muiterîngbe zuilung gene hekuâ ningnui seube luage, ningnui gu hezat ramme ruage besuitewme leine, zai ningnui gu gechîngme a dage wangka’nna de lei;

²⁴zai ningnui ne sa ze, ‘Pie le lau, Tingwang anui Rapeu ne pa pengêudibe benai reziechibe anui je teilia gai de lei, zai hemi getaube zuilung gene pe kuâ patbe anui seu lu de lei; Hera ne ziemmena je ’mpau bei ze ziemmena ring ze bamlube nemai ge anui ngau de lei.

²⁵Chidaze chunage ’ndaitew ze anui chai ra lau? Aipau hemi kedibe ne anui je rûmut kai gu daseu; Tingwang anui Rapeu kuâ anui seu dai dizai â, anui chai gu de lei.

²⁶Anui gum ze chauge hemi getaube zuilung gene keringbe Rapeu kuâ seu lu ze ringbambe kau ziemmena leine ruage la lau?

²⁷Nang wang’nna le lau, zai Tingwang anui Rapeu ne ’ndaikau salia ra mei be leine seu le lau; zai Tingwang anui Rapeu ne ningchu rangliabe leine anui je ranglia lau; dezai anui seu gu zai chize tew gu lei,’ kacheu de lei.

²⁸“Zai ningnui achu ka’mpaube luage Tingwang ne ningnui kuâ seu di de lei; zai Tingwang ne a dage rang gai ze, ‘Penui ne ningchu ka’mpaube aime sam ramme I seu lu de lei; penui sagai’ndibe leine satâu de lei.

²⁹Hei, achu hingchi ra, zai a gu hingde ramme leine teirabe hangge aigumbe lung pung’nzie ze bam nung laîzai! Chidezai betun mak ze penui benai penui name hangge yi ze bam le ra hangge zeu.

³⁰Tat ze penui dage rang gai be lau, “Ningnui gu hetiampaîki ramme lam’mbe helatwang dai de zu lau,” acheu zeu.

³¹Kane nang â a taige sap lau, dezai penui je nang geteiliarabe hangge samdiegaibe leine zai hingde tewgaibe ramme benai hingde rawgaibe ramme ningchu I ranglia gu lei, chidezai penui heram ’nram le ra I ne penui je peibe heram ge chiramme tewchi le ra hangge zeu,’ kacheu de lei.

³²Chidaze Tingwang ningnui Rapeu ne ningnui je diegaibe luigum ze tew ra ningnui chî’mmi ra lei; hezat’mbia mei nune heku’mbia mei ze ningnui tatchâmtat mak ra lei.

³³Ningnui ring le ra, zai ningnui hang yi ra, dezai ningnui ’nramrabe heram ge ningnui ringtie le ra hang Tingwang ningnui Rapeu ne ningnui je diegaibe ’mpuî leine ge ningnui tat ra lei.