Read Zeme Naga DEUTERONOMI 6 Bible Online

DEUTERONOMI 6 - Zeme Naga bible

DEUTERONOMI 6

¹“Chunage aize ningnui kapat ze ’nramlerabe heram ge ningnui tewtat bamrabe hangge ningnui je geteilia ra Tingwang ningnui Rapeu ne achu diegaibe hingde, hingde tewgaibe, zai hingde rawgaibe ramme de lei;

²chidezai nang kering ting tâluî pe gu hingde tewgaibe ramme benai hingde rawgaibe ramme ningchu I diegaibe ramme teibe ziegene Tingwang ning Rapeu je nang benai ning na zai ning chame ne hingchi le ra hangge zeu; zai nang kering ting tew’ntie gai le ra hangge zeu.

³Chidaze seu le lau, Hei, Israel gau, zai chize reî ze tew ra hangge chî’mmi le lau; chidezai Tingwang ning peume Rapeu ne ning dage hatkaibe luigum ze tungdui benai ’ngkuidui ne luabe heram ge ning hang yi ze bam le ra, zai misongga ze nang pung-ze-sachi le ra hangge zeu.

⁴“’Ngking le lau, Hei, Israel gau: Tingwang â anui Rapeu lei, Tingwang â kat runne lei;

⁵zai Tingwang ning Rapeu je ning lung leine ne, zai ning ranchi leine ne nang hung ra lei.

⁶Zai nemai â aipau sam ramme I ningchu diegaibe ze ning lung ge littei bam ra lei;

⁷zai chiramme ze lungsangsing ne ning name je nang geteilia ra, zai ning kilûng ge ka’ntaube luage, zai ’mpuîki ge nang tatbe luage, zai nang jeikaugaibe luage benai nang zuachukadaibe luage chiramme ze nang sa bam ra lei.

⁸Zai ka’nchetbe chang ze chiramme ning ba ge nang ’nta gai ra lei, zai chiramme zene ning telie ge kakbe chang ra lei.

⁹Zai chiramme ze ning ki kemuichia ramme benai ning gu ’ngkam ramme ge nang raw gai ra lei.

¹⁰“Zai Tingwang ning Rapeu ne ning peume, Abrahambe, Isaakbe, zai Jakobbe dage nang ne tewgaimakbe namdi kedibe benai keheube namdi ramme,

¹¹zai nang ne tewpuigaimakbe ki ramme, mâ-keyibe ramme ne puigit bambeki ramme, zai nang ne kuigaimakbe dekuaki ramme, zai nang ne linggaimakbe grepchî merie ramme, zai olib bang ramme, zai chize nang teu gai lu ’nggeubamderabe heram ningchu pei ra pa ne penui je hatkai’ndibe heram ge ningchu Tingwang ning Rapeu ne nguagut kai dezai,

¹²Ijipram gene kebangtewbeki gene ningchu nguapatkaipeu Tingwang je ’ngngaî mak ra ’ntîng le lau.

¹³Tingwang ning Rapeu je nang hingchi ra lei; pe gua nang ’nggua ra, zai pe ji gene deseu ra lei.

¹⁴Kêdabe hera ramme ning huâzie ge lungbe zatme gu hera ramme chai nang sui mak ra lei;

¹⁵ningnui ruage bambepeu Tingwang ning Rapeu â pelunggailakbe Rapeu daseu; Tingwang ning Rapeu lumpum ning peireige ’ntau gai mak ra, zai kedeirei luî gene ningchu tew’ngga gai mak ra hangge zeu.

¹⁶“Massah ge pechu ningnui kakedak gum ze Tingwang ningnui Rapeu je ningnui kedak mak ra lei.

¹⁷Tingwang ningnui Rapeu ne ningnui je diegaibe pe gu samdiegaibe ramme, zai sam rawdiakkaibe ramme, zai pe gu hingde rawgaibe ramme nang reî’mmi ra lei.

¹⁸Zai Tingwang mikngau ge ’ndaikau ka’nzei mei zai yi mei be nang tew ra lei, chidezai ning hangge yi gu, zai ning paume je peirabe Tingwang ne hatkai’ndibe heramyibe ge nang gut ze heram ’nram le ra hangge zeu,

¹⁹Tingwang ne deseugailube luigum ze ning masua gene ning teureime leine je kumtuagaibeibe ziegeneu.

²⁰“Bechâng rehei lunghangkadaibe ting ge ning na ne, ‘Tingwang anui Rapeu ne ningnui je diegaibe, sam rangliabe ramme, zai hingde rawgaibe ramme, zai hingde-sie ramme rimba ze ’ndaikau lau?’ ze ningchu sam’nneu dezai,

²¹nang ne ning na je, ‘Ijipram ge anui â Pharaobe gu kebang chang ze bam de lei; zai reziechibe ba ne Ijipram gene Tingwang ne anui je nguapat kai bei de lei;

²²zai anui mikngau gene Ijipme benai Pharaobe zai pe kiduîme leine peireige ka’nchetbe teiliabe ramme benai tâningdaulakbe kedibe ramme benai keritbe ramme Tingwang ne tew gai bei de lei;

²³zai anui paume je pei ra pa ne hatkai’ndibe heram ge pa ne anui je ngua gai ze anui je heram pei gai be ra hangge chilia ’mbia ne anui je nguapat kai de lei.

²⁴Zai anui hang yi bam ra, zai Tingwang anui Rapeu je hingchi ra, aipau hingde rawgaibe ramme leine tew ra Tingwang ne anui je die gai de lei; dezai nemai riâ chang ze bambe gum ze pa ne anui je ’ngkut’nring gai be ra hangge zeu.

²⁵Zai pa ne anui je samdiegaibe luigum ze Tingwang anui Rapeu masuage aipau hingde leine tew ra anui ne chî’mmi dizai â chize anui hangge kapelingbe chang gu lei,’ ze acheu salia ra lei.