Read Zeme Naga DEUTERONOMI 7 Bible Online

DEUTERONOMI 7 - Zeme Naga bible

DEUTERONOMI 7

¹“Nang heram ’nram le ra gutrabe heram ge Tingwang ning Rapeu ne ningchu nguawang gai ze, heramzat ramme misongga ze ning suagene ning sua â di ze peranchibe heramzat sena, Hethme, Girgashme, Amorme, Kanaanme, Perizme, Hibme, zai Jebusme je kechaîtua’nchichiak kai dezai,

²zai Tingwang ning Rapeu ne penui je ning ba ge pei gai bei dezai nang ne penui je ngam ne ra lei; zai penui je nang tew’nsia kam gai ra lei; penui dage nang samriatew gai mak ra lei; zai penui je ngau’nggia gai mak ra lei.

³Ning na ’mpuimi ramme je penui name nâu hang kai zai ning name nâu hangge penui name ’mpuimi ramme je lu ze penui dage nang henâu-hegai mak ra lei.

⁴Kêdabe hera ramme guâ ’nggua ra hangge penui ne ning name je a chai sui ze bambe gene ngualietat kû daseu; chidezai â, Tingwang lumpum ningnui peireige ’ntau gai gu lei, zai kelua ze ningchu pa ne tew’ngga ’ndu lei.

⁵Kane penui dage aigum ze ningnui tew ra lei: Ningnui ne penui gu herâtewbe-kaira ramme tewkau gai ra, zai penui gu tingchusum ramme lakhitruai gai ra, zai penui gu Asherah râ luî ramme kechiakau gai, zai penui gu heraluîtewbe ramme hemi ne rû ra de lei.

⁶“Nang â Tingwang ning Rapeu hangge ka’nchibe zat chang daseu; kedeirei ge bambe ziemmena zat leine gene Tingwang ning Rapeu ne ningchu pe gu kau chang ra kelâng lu de lei.

⁷Tingwang ne ningnui peireige pa kehungbe kai ze ningnui je kakelângbe ze kêdabe zat sua â ningnui ziemmena riak kiebe ziegene mak lei, ziemmename zatme leine ruage ningnui â chamlang ze bam daseu;

⁸kane kebangki gene zai Ijip gu heguang Pharaobe ba gene Tingwang ne ningnui je meupat kai ze pe ba ranchibe ba ne nguapatkaibe ze â Tingwang ne ningnui je kehungbe ziegene benai ningnui peume dage pa hatkailube bambe ziegene de lei.

⁹Chidaze rehei chang kat ria chang ze pechu kehungme benai pe gu samde ramme teime dage samhetlube benai hungka’ntipbe teibe pe lungyibe Rapeu, Tingwang ning Rapeu â Hera lei be chî le lau,

¹⁰zai pechu ngaugailakme je â penui je tew’nsia gai ze penui masua sing gene peiruîgaipeu, pechu ngaugailakbe kau je â tezietau bam ra mak lei, pe sua sing gene pechu pa ne peiruî gai gu lei.

¹¹Chidaze nemai ge I ne ningchu diegaibe hingde, zai hingde rawgaibe ramme, zai hingde-sie ramme chî’mmi ze nang tew ra lei.

¹²“Zai aipau hingde-sie ramme nang ne pheube ziegene, zai chize tei ze tewbe ziegene pa ne ning peume ne tei ra hatkaibe, samhatkaibe benai hungka’ntipbe ze Tingwang ning Rapeu ne ningnui dage kai gu lei;

¹³pa ne ningchu hung gu zai ’nnam gai gu, zai ningchu pung-ze-sa ra tew gai gu lei; pa ne heram ningchu pei gai ra ning paume dagene hatkai’ndibe heram lungge ning pumrachî benai kedeirachî, ning gu hemeurachî benai ning gu wain zai ning gu kauruidung pung-ze-sabe benai ning gu melidung ’nnakeube ramme peireige du pa ne ’nnam gai gu lei.

¹⁴Ziemmename zat leine peireige ningchu â ’ngkeukia ze ’nnam gai bam gu lei; ningnui ruage ’mpeumi mei nune ’mpuimi mei nune ningnui gu kauruidung ruagene mei ze henagabe kau bam ra mak lei.

¹⁵Zai ’nrâteuneube zat leine Tingwang ne ning dagene lutua ’ndu lei; zai nang ne chîbe Ijipram gu herarît kesiabe ramme zene ningnui peireige pa ne tewhereu gai ra mak lei. Kane ningchu ngaugailakme leine peireige pa ne chiramme kai bu lei.

¹⁶Zai Tingwang ning Rapeu ne ning ba ge peigairame ziemmename zat leine je nang tew’nsia gai ra lei, penui je nang ngau’nggia gai mak ra lei; penui gu hera ramme guâ du nang ’nggua mak ra lei, chize ning hangge ’mpia chang gu daseu.

¹⁷“Ning lung gene nang ne, ‘Aipau heramzat ramme â I sua â di lei; ’ndaigum ze I ne penui gu sutchi le ra lau?’ ze acheu dizai â,

¹⁸penui je nang hing mak ra lei, kane Pharaobe benai Ijipme leine dage Tingwang ning Rapeu ne ’ndaikau tew gai mei be ze nang chibam ra lei,

¹⁹kakedakbe kedibe ramme ning mik ne ngaube, ka’nchetbe teiliabe ramme, ’nningdaulakbe ramme, reziechibe ba, zai getuapatbe ba, chize ne Tingwang ning Rapeu ne ningchu nguapatkaibeibe zeu; chigum ze nang hingbe heramzatme leine dage Tingwang ning Rapeu ne tâtew gai gu lei.

²⁰Chipau peireige du ’nsakpatme benai ning dagene ’mbai ze bamme je tew’ngga ’nde mak tâne penui ruage Tingwang ning Rapeu ne kehingbe lang gai gu lei.

²¹Penui je nang hing ra mak lei, kedibe benai mi kehingbe Rapeu, Tingwang ning Rapeu â ningnui ruage bam daseu.

²²Zai aipau heramzatme ze mit-mit ze ning masua gene Tingwang ning Rapeu ne kechaîtua’nchichiak ’ndu lei; luakat ze penui je nang tew’ngga’nzâu gai ra mak lei, chidezai hênam gu hekaune ramme ning hangge kiezû mak ra hangge zeu.

²³Kane penui je tew’nsia ’nde mak tâne Tingwang ning Rapeu ne ning dage bala gai gu, zai penui je tewdepâp kai bu lei.

²⁴Zai penui gu heguangme je pa ne ning ba ge pei gai gu lei, zai tingkehube kangge penui ji ga de ra penui je nang ne tew gai ra lei; nang ne penui je tew’ngga ’nde mak tâne ningchu tingkang ra mi hangkatte sapchuchi ra mak lei.

²⁵Penui gu hera ramme luî tewbe ramme ze hemi ne ningnui rû ra lei; gepût mei nune gechâk mei ze penui dage bambe je nang ’nchie se lau, zai ning hangge lu se lau, chize ne ningchu mi mak ra hangge zeu; chize â, Tingwang ning Rapeu hangge katenetbe daseu.

²⁶Zai chipau peireige gum ze desetkai’ndibe chang mak ra hangge ningnui ki ge mi ngaukatenetbe merua teiwang gai se lau; chipau peireige ze nang ’nneî-’nrie sing ra lei; chize â, desetkai’ndibe merua daseu.