Read Zeme Naga DEUTERONOMI 8 Bible Online

DEUTERONOMI 8 - Zeme Naga bible

DEUTERONOMI 8

¹“Nemai ge I ne ningchu diegaibe hingde leine ’ntîngteî ze ningnui tew ra lei, chidezai ningnui ring le ra, zai pung-ze-sa ra, zai Tingwang ne ningnui peume je pei ra hatkai’ndibe heram ge gut ze ’nramchi le ra hangge zeu.

²Zai hênamkang ge aipau kum hedai Tingwang ning Rapeu ne nguatatbe ’mpuî leine nang chibam ra lei, chidezai pa ne ningchu tewhelêu gai ze ning lung ge ’ndaikau bam mei be chi ra ningchu kedak le ra hangge zeu, pe gu hingde ramme nang tei lêu gu mei nune tei ra mak mei be zeu.

³Zai pa ne ningchu tewhelêu gai ze, (tak) ’njei ra pei gai ze nang du chî mak, zai ning peume du chimakbe manna ne ningchu kei de lei; chidezai ziemmena â tingku runne ne ring mak lei, kane ziemmena â Tingwang mui gene zuapatbe leine gene ring lei be nang chî le ra pa ne tewlia ra hangge zeu.

⁴Aipau kum hedai lungge ning paîni du ning pum ge siakeu gai mak, zai ning pî du pum mak te lei.

⁵Chidaze ziemmena ne pe na je kaladdei gum ze, Tingwang ning Rapeu ne ningchu kaladdei lei be ning lung ge chi le zu lau.

⁶Chidaze pe gu ’mpuîki ramme ge tat ze, zai pechu hingbe gene Tingwang ning Rapeu gu samdiegaibe ramme nang tei ra lei.

⁷Heram yibe, hedui bambe geuki ramme, depin ramme benai heduitering geuki ramme bekâm ramme ge benai peloaramme gene lua ze bambe heram ge Tingwang ning Rapeu ne ningchu nguagutzi gu daseu,

⁸dekuîmeu benai barli, grepchî benai ’mbeuchî zai saibeturiechî kiebe heram, olib bang ramme benai ’ngkuidui kiebe heram,

⁹teu ra gakeu mak ze ningnui hetak teurabe heram, hereu ze daulakbe gabe heram, pe gu tingchu ramme ze â hegeî changbe, zai chipau dei gu peloaram gene hetageî nang sutduibe heram gezeu.

¹⁰Dezai nang teu ze ’nggeuting ze bam gu, zai heram yibe ningchu pa ne peigaibeibe ziegene Tingwang ning Rapeu je nang toa gu lei.

¹¹“Nemai ge ningchu I diegaibe pe gu samdiegaibe ramme, zai pe gu hingde-sie ramme benai pe gu hingde rawgaibe ramme teimakbe ziegene Tingwang ning Rapeu je nang ’ngngaî mak ra chî’mmi le lau:

¹²nang teu ze ’nggeu gai lu, zai heki keyibe ramme tew gai lu ze chiramme ge lung dezai,

¹³zai ning gu kebuidung ramme benai melidung ramme pungpat dezai, zai ning gu gepût benai gechâk tewpung gai dezai, zai ning dage bambe leine pungpat dezai,

¹⁴ning lung kengang di ze Tingwang ning Rapeu, Ijipram ge kebang changbeki gene nguapatkaipeu je nang ’ngngaî nan ze,

¹⁵mi kehingbe hênamkang ge henêu kesiabe ramme benai heruimegapui ramme, zai hedui ga ze kedei changbe tingkangram kedibe benai mi kehingbe ge ningchu nguapelapatkaipeu, tingchugeu chutum gene ning hang hedui lupatkaipeu,

¹⁶nâlangbe ge ningnui hang keyibe tewgairabe hangge pa ne ningchu tewhelêu gai, zai ningchu kedak le ra hangge tingkangram ge ning peume ne chimakbe manna ne ningchu keipeu je ’ngngaî mak ra hangge zeu.

¹⁷‘A gu reziechibe benai a ba ranchi ne aipau heurâ ze I ngau lu de lei,’ ze nang acheu mak ra hangge ’ntîng le lau.

¹⁸Tingwang ning Rapeu je nang chibam ra lei, pa ne ningchu keheube ngaurabe rezie peipeu daseu; chidezai nemai ge bambe gum ze, ning paume dage samhatkaibe ze pa ne tew’ntipkaichi le ra hangge zeu.

¹⁹Zai nang ne Tingwang ning Rapeu je ’ngngaî ’ndi, zai kêdabe hera ramme je peutat ze penui guâ ’nggua zai penui je kellum dizai â, ningnui ga gai himchang gu lei be nemai ge I ne ningnui chî’mmi ra rang’ntua gai de lei.

²⁰Tingwang ningnui Rapeu kuâ ningnui pheumakbe ziegene ningnui suage Tingwang ne ga de ra tewgaibe heramzatme gum ze ningnui du ga gai gu lei.