Read Zeme Naga DEUTERONOMI 9 Bible Online

DEUTERONOMI 9 - Zeme Naga bible

DEUTERONOMI 9

¹“Seu le lau, Hei Israel zat gau; nemai ge Jordan geuki nang kapat ku de lei, gut ze nang suadu di ze reziechibe heramzat ramme ze lu le ra namdi kedibe ramme, zai ting tûngteman ze kerie riegualube namdi ramme lu ra,

²ziemmena di ze tiebe zat, Anakbe na ’mpeumi ramme nang ne gechîme, zai penui rasam sa gai ze, ‘Anakbe name suage châu sapgimchi dui lau?’ ze sabe nang seulube zat gu heram lu le ra hangge zeu.

³Chidaze rûka’nggabe hemi gum ze ning suage tatkapatpeu â Tingwang ning Rapeu lei be nemai ge chî le lau; ning suage pa ne penui je tew’nsia gai gu zai penui je ’nnam gai gu lei; chidaze Tingwang ne ningchu hatkailube luigum ze nang ne penui je kumtua gai ra, zai penui je tew’ngga gai kelua ra lei.

⁴“Ning suage Tingwang ning Rapeu ne penui je kumtua gai bei dezai, ‘I kapelingbe ziegene aipau heram ze ’nram le ra Tingwang ne achu nguagut kai de lei,’ ze ning lung ge ’nning gai se lau; chize acheu meraine aipau heramzat ramme kesiabe ziegene Tingwang ne ning suage penui je kumtua lei.

⁵Ningnui kapelingbe benai ningnui lungka’nzeibe ziegene penui ram ’nram le ra nang gutrabe mak lei; kane aipau heramzat ramme tâ-kesiabe tewbe ziegene Tingwang ning Rapeu ne ning suagene penui je kelitua gu lei; chidezai ning peume, Abrahambe, Isaakbe, zai Jakobbe dage Tingwang ne hatkai’ndibe sam pa ne tew’ntip kai le ra hangge zeu.

⁶“Chidaze nang kapelingbe ziegene aipau heramyibe ’nram le ra Tingwang ning Rapeu ne peirabe mak lei be chî le lau; nang â hekuâpheumeube ziemmena zat daseu.

⁷Tingkangram ge ’ndaigum ze Tingwang ning Rapeu lumpum nang tew gai mei be chibam lau; zai ’ngngaî se lau; Ijipram gene nang zuapatbe mai gene aipau bâm ge ningnui wangchang mak tânege ningnui â Tingwang je ’nggi ze bam de lei.

⁸Horeb ge ’nsangdu Tingwang lumpum ningnui ne tew gai bei ze ningnui peireige Tingwang pe lumpum-desangdibe ziegene pa ne ningnui je tew’ngga ’nde ra tew di de lei.

⁹Ningnui dage Tingwang ne tewgaibe samhatkaibe tingchudepei ramme lu ra peloa ’mbe I hangdibe luage, kedeiloa’ntûm ge hezie hedai zai tingmuî hedai I bam di de lei; I â tingku du teu mak, zai hedui du sak mak te lei.

¹⁰Zai Hera bakêrang ne rawlube tingchudepei kena achu Tingwang ne pei de lei; zai chi tingchudepei kena ge ningnui wangka’nduibe mai ge hemi getaube zuilung gene kedeiloa gene Tingwang ne sapatbe rasam ramme leine bam de lei.

¹¹Zai hezie hedai benai tingmuî hedai kam gai dege tingchudepei kena, samhatkaibe gu tingchudepei kena ze Tingwang ne achu pei de lei.

¹²Chidadege Tingwang ne achu rang gai ze, ‘Zuachu zu lau, aigene wangkeu kelua zu lau; ning gu ziemmena Ijip gene nang ne nguapatme ne tâ-kesiabe tew gai ’ndi daseu; I ne penui je diegaibe ’mpuî gene penui â lietat kelua di daseu; penui hangge penui â langlualube heraluîtew lu la de lei,’ kacheu de lei.

¹³“Chipau peireige du Tingwang ne achu rang gai ze, ‘Aipau ziemmena zat je I ngau lu de lei, zai pie le lau, aime ze â hekuâpheumeube zat te lei;

¹⁴achu ’mbia gai lau, dezai penui je I tew’nsia gai be ra, zai tingkehube kang gene penui ji lutua ’nde ra hangge zeu; zai penui sua â heramzat kedibe benai reziechibe nang gene I ne tew gai gu lei,’ ze kacheu de lei.

¹⁵Chidadege I ’nreiwang dai ze kedeiloa gene wangkeu de lei, zai kedeiloa ze â hemitau bam de lei; zai samhatkaibe tingchudepei kena ze â a ba kena ge tei bam de lei.

¹⁶Zai I pie gai de lei, zai pie le lau, Tingwang ningnui Rapeu suage ningnui hemui gai ’ndi de lei; ningnui runne ningnui hangge getumpoine luî heki gai de lei; Tingwang ne ningnui je diegaibe ’mpuî gene ningnui lietat kelua di de lei.

¹⁷Chipauziegene tingchudepei kena ze I ne tei lu a ba kena gene tuâpat kai bei de lei, zai ningnui mikngau gene chize tewpâng gai bei de lei.

¹⁸Chidadege besua’ngka ge gum ze, hezie hedai tingmuî hedai Tingwang suage I tuâ’ntatui ze bam di de lei; pe lumpum tewrabe hangge Tingwang mikngau ge tâ-kesiabe tewbe gene ningnui ne hemui tâ tewgaibe leine gene I â tingku du teu mak, zai hedui ’nsangdu sak mak ze bam de lei.

¹⁹Ningnui peireige Tingwang lumpum benai pe lungteube gene ningnui je pa ne tew’nsia ra tewdibe ze I â hing di de lei. Kane chipau luage du Tingwang ne a kuâ ’ngking gai bei de lei.

²⁰Zai Tingwang ne Aaronbe peireige pe lumpum-desang di ze pechu tew’ngga ’nde ra tew di de lei; zai chipau luage du Aaronbe hangge du I kie gai de lei.

²¹Chidadege chi getumpoine luî ningnui ne tewgaibe kahemuibe merua ze I ne tei lu chize hemi ne rû lu tewniang gai ze, kemût gum ze pemoîpuppat mak tâne niakniang gai bei de lei; zai kedeiloa gene luakeube ’nggeuki geze chipau moîne ze I ne ’nruk kai bei de lei.

²²“Tabera ge du, zai Massah ge, zai Kibroth-hattaaba ge ningnui ne Tingwang lumpum tew gai de lei.

²³Zai Kades-barnea gene Tingwang ne ningnui je langpat kai ze, acheu sa ze, ‘Hang ze I ne ningnui je peigaibe heram ze ’nram le zu lau,’ kacheube luage Tingwang ningnui Rapeu gu samdiegaibe deze ningnui ka’nggi de lei, zai pechu ’nnumtew mak, zai pe kuâ pheu mak te lei.

²⁴Ningnui je I chîdibe mai gene seu ze Tingwang je ningnui ’nggi ze bam de lei.

²⁵“Chidadege, ningnui je pa ne tew’ngga gai gu de lei be Tingwang ne sagai’ndibe ziegene hezie hedai zai tingmuî hedai Tingwang masuage I kâu’ntatui ze bam de lei.

²⁶Zai Tingwang dagene I kie gai de lei, ‘Hei, Tingwang Hera gau, ning ngeudibe ne nang ne ripatkailume, reziechibe ba ne Ijipram gene nang ne nguapatlume, ning gu ziemmena benai ning heurâ je tew’ngga gai se lau.

²⁷Ning guâ ka’ngguame, Abrahambe Isaakbe, zai Jakobbe je chibam lau; aipau ziemmena hekuâpheumeube, penui kesiabe zai penui gu hemui ze mâ-hangge du riam gai se lau,

²⁸nang ne anui je nguapatkaibe heram zene, “Penui je pa ne hatkaiberam ge Tingwang ne penui je nguapatchilaktibe ziegene zai pa ne penui je ngaugailakbe ziegene, tingkangram ge penui je tewchat kai ra penui je pa ne nguapat kai de lei,” ze sa gai mak ra hangge zeu.

²⁹Penui â ning ngeudibe benai reziechibe zai ning ba getuapatbe ba ne nang ne nguapatlume ning gu ziemmename benai ning heurâ daseu,’ ze kacheu de lei.