Read Zeme Naga JOHAN 10 Bible Online

JOHAN 10 - Zeme Naga bible

JOHAN 10

¹“Pelingsing, pelingsing ze ningnui je I rang lei, mi-mige de meli rielung ge kemuiki gene gut mak ze, kane kêdabe ’mpuî gene keuchube kau â, mâ-kahegabe kau, zai hegasutteube kau lei;

²kane mi-mige de kemui gene gutbe kau â melireîpeu lei.

³Kemuireîpeu ne pechu â ’ngkam lat kai lei; meli ramme ne pe kuâ seu lei, zai pa ne pe gu meli ramme je penui ji ji ne kû ze penui je nguapat lei.

⁴Pe gu meli ramme leine je nguapat lu penui sua ’mbe pa ne râitat lei, zai meli ramme ne pe chai sui lei, pe kuâ penui chi dadegeu.

⁵Hesang’mpeu (peluî chimakbe kau) chai â penui sui ra mak lei, kane pe dagene penui pak tu lei, hesang’mpeu kuâ â penui chimakbe ziegeneu,” ze kacheu de lei.

⁶Aipau sam’nda ne Isua ne penui je geteilia de lei, kane pa ne ’ndaikau penui dage sa mei be penui â ’nningchi mak lei.

⁷Chidadege Isua ne penui je rang dai ze, “Pelingsing, pelingsing ze ningnui je I rang lei, I â meli-kemui lei.

⁸A suagene wangme leine â, mâ-kahegame benai hegasut-teume kam lei; kane meli ramme ne penui kuâ ’ngking mak tai lei.

⁹I â meli-kemui lei; mige a dagene gut tizai â, pechu tew’nring gai bu lei, zai pa gut-ze-pat ze bam gu zai melitaning dau gu lei.

¹⁰Mâ-kahegabe kau â hega ra, zai tewchat ra, zai tew’nsia ra runne wang lei; I â peize penui keringbe ngau ra, zai misongga ze ngau le ra wang lei.

¹¹I â melireîpeu keyibe lei. Melireîpeu keyipeu ne meli ramme hangge pa keringbe pei gai lei.

¹²Melireîpeumakbe kau, reîkadeki kau â meli ramme pe gu mak dadege, henei wangbe pa ngau lu ze, meli ramme je sâu gai nan ze pak ti de lei, zai henei ne meli ramme je kedui bei, zai tewtimrarip kai bei tai lei.

¹³Pa â reîkadekipeu dadege pak ti ti de lei, zai meli ramme hangge mâ de ’nningtinggeu mak lei.

¹⁴I â melireîpeu keyibe lei; a gu ramme je I chî, zai a gu ramme ne achu chî lei,

¹⁵Bepeu ne achu chi gum ze I du Bepeu je chî lei; zai meli ramme hangge a keringbe pei gai lei.

¹⁶Zai a gu meli kêdabe ramme, aipau rielung ge bammakbe ramme lamui lei; chiramme je du I gekumwang himchang gu lei, zai penui ne a kuâ ’ngking gu lei. Chidezai melidung kat, melireîpeu kat bam ra hangge zeu.

¹⁷Aipau deu hangge Bepeu ne achu hung lei, keringbe I lu dai le ra hanggene I a keringbe peigaibeibe ziegeneu.

¹⁸Mî de chize a dagene lutat me lei, kane a suî’nning ne chize I pei gai lei. Chize I pei gai ra a dage rezie la lei, zai chize I ne lu dai ra du a dage rezie la lei; aipau hingde ze a peu dagene I ngau lu de lei,” kacheu de lei.

¹⁹Judame ruage aipau sam ramme ziegene pebau-pat kadai de lei.

²⁰Penui ruage misonggame ne, “Pe dage herasiabe la lei, zai pa mie di de lei; ’ndaitew ze pechu ka’ngking lau?” kacheu de lei.

²¹Zai kêdame ne, “Aipau sam ramme ze herasiabe bambepeu samsa zat mak lei. Herasiabe ne pe mikchitpeu mik latpatchi duî semei?” kacheu de lei.

²²Aize â Jerusalem ge Diepat’nchigaibe-ngi de lei;

²³chipau ting ze (kahegeibe) hetating de lei, zai Isua Solomonbe gu heki liâmpatkaibe kedibe rielung ge, kellumki ge tatrua bam lei.

²⁴Dadege Judame ne pechu guâwang’ndui lu ze, pechu, “’Ndaitie ge nang ne anui je (nang châu mei be) rang’nchi gai mak ze nang bam ra rei lau? Nang ze Krista lei zai â anui je rang’nchichiak kai zu lau,” kacheu de lei.

²⁵Zai Isua ne penui je kak ze, “Ningnui je I ranglia bei de lei, zai ningnui â ’nnum’mmi mak lei. A peu ji gene tâ ramme I tewbe ze chiramme zene achu sakkitew de lei;

²⁶kane ningnui â ’nnum’mmi mak lei, ningnui â a gu meli ramme mak dadegeu.

²⁷A gu meli ramme â a kuâ ka’ngking lei, zai I ne penui je chî lei, zai penui a chai sui lei;

²⁸zai I ne penui je keringbe betunmakbe pei gai lei, zai mâ-tew-tewsede penui ga ra mak, zai mî ne de a ba gene penui je sut-tat ra mak lei.

²⁹A peu, chi penui je achu peigaipeu ne ’nteumena sua dilang lei, zai mî ne de a peu ba gene chime je sutpatchi lak lei.

³⁰I benai Bepeu â kat lei,” kacheu de lei.

³¹Judame ne pechu tingchu tuâ ra tingchu kuaichu kadai de lei.

³²Isua ne penui je kak ze, “Bepeu dagene tâ keyibe ramme misongga ze ningnui je I tewlia bei de lei; aipau tâ ramme ruage ’ndaibe tâ ziegene tingchu ne achu ningnui tuâ ra lau?” kacheu de lei.

³³Judame ne pechu kak ze, “Tâ-keyibe tewbe ziegene ningchu tingchu ne anui tuâ ra mak lei, kane Hera je sakahebâbe ziegene lei; nang â ziemmena da, kane ning runne ne ningchu Hera hangge tewgaibe ziegeneu,” ze kacheu de lei.

³⁴Isua ne penui je kak ze, “ ‘I ne ningnui â Hera ramme de lei, ze acheu gai de lei’, kacheube ze ningnui gu hingde ge raw gai mak mei?

³⁵Penui dage Hera sam wangchangbeime je pa ne penui je hera ramme ze kû gai bei sede, (zai rawdiakkaibe leisi ze tew’nsiachi lak lei,)

³⁶Bepeu ne tew’nchi gai lu ze kedei ge langgaipeu je ningnui ne, ‘Nang â Hera je sakahebâ lei,’ ze ningnui pechu kacheu mei, ‘I â Hera Na lei,’ ze I ne kacheube ziegeneu?

³⁷A peu gu tâ ramme I tew mak tizai â, ningnui achu ’nnum’mmi se lau;

³⁸kane chiramme I tew dizai â achu ningnui ne ’nnum’mmi mak sede, tâtewbe ramme je ’nnum’mmi le lau, chidezai Bepeu ze I ge bam zai I Bepeu ge bam lei be ningnui chî lu ’nningchi le ra hangge zeu,” kacheu de lei.

³⁹Pechu nîm ra penui heka gai kadai de lei, kane penui ba gene pa ’mbiatat ti de lei.

⁴⁰Dadege Isua Jordan geuki kapat ze Johanbe ne raîlangbe ge baptistewbe bâm ’mbe tat dai lu ze chige pa ’nnaibam di lei.

⁴¹Zai misonggame ne pe dage wang de lei; zai penui ne sa ze, “Johanbe â tâningdaulakbe mâ de tew gai me lei, kane Johanbe ne aipaupeu deu ge kerangbe leine ze â gesang di de lei,” kacheu de lei.

⁴²Dadege chige misonggame ne pa ge ’nnum’mmi di de lei.